ភ្នំពេញ៖ ក្រោយពីបាត់មុខពីសង្គមសិល្បៈប្រមាណជិត ២ ឆ្នាំ អតីតជាម្ចាស់មកុដកញ្ញា Miss Grand Cambodia ឆ្នាំ ២០១៦ កញ្ញា ហេង ចន្ថា ស្រាប់តែលេចមុខមកវិញ ក្នុងនាមជាគណៈកម្មការនៃកម្មវិធីប្រកួត Miss Grand Cambodia 2021 ម្តងទៀត។
បើតាមគេហទំព័រផ្លូវការ Miss Grand Cambodia បង្ហើបឱ្យដឹងពីបេក្ខភាពជាគណៈកម្មការថា៖ «សូមជម្រាបជូនថា ក្នុងការប្រកួត Miss Grand Cambodia 2021 ឆ្នាំនេះ Miss Grand Cambodia 2016 នឹងជាគណៈមេប្រយោគក្នុងការដាក់ពិន្ទុដល់បេក្ខនារីទាំង ២៥ នាក់! តើនៅចាំឈ្មោះគាត់បានទេ?»។
ស្រីស្រស់ជាតារាសម្តែង និងជាអតីតម្ចាស់មកុដ Miss Grand Cambodia ឆ្នាំ ២០១៦ ក៏បានបង្ហោះសារប្រាប់អ្នកគាំទ្រថា៖ «ជួបគ្នានៅក្នុងថ្ងៃផ្តាច់ព្រ័ត្រថ្ងៃទី ២៤ ខែកញ្ញានេះ ណាចាស! តែបងប្អូនកុំភ្ញាក់អីណាតិចថា ឃើញ ចន្ថា ឥឡូវចាស់ខុសពីក្នុងរូបអីហា ក្នុងរូបតាំងពីឆ្នាំ ២០១៦ ដល់ឥឡូវឆ្នាំ ២០២១ គឺ ៥ ឆ្នាំហើយ អ៊ីចឹង ចន្ថា រាងចាស់បន្តិចហើយ ហេហេ!»។
ដោយឡែកកញ្ញាឯកដ៏អស្ចារ្យនៃកម្ពុជាក្នុងឆ្នាំ ២០១៦ ដែលមានសម្រស់ផូរផង់ ស័កិ្តសមជាម្ចាស់ជយលាភីរូបនេះ ក្រោយពីបានបង្ហាញវត្តមានសម្តែងខ្សែភាពយន្តចុងក្រោយរឿង «បន្តោងឆ្នាំងដី» កាលពីឆ្នាំ ២០១៨ មកក៏បានបាត់មុខពីការសម្តែងកុន ដោយគេឃើញត្រឹមតែជាភ្ញៀវចូលរួមកម្មវិធីសិល្បៈ និងសម្ពោធភាពយន្តតែប៉ុណ្ណោះ។
ទោះបីមិនសូវបង្ហាញមុខសម្តែងក៏ដោយ ប៉ុន្តែនាងនៅតែទទួលបានការគាំទ្រ ពីមហាជនតាមរយៈការសម្តែង MV ឱ្យផលិតកម្មហង្សមាសជាបន្តបន្ទាប់ ខណៈស្រីស្អាតញញឹមស្រស់កញ្ញា ហេង ចន្ថា ធ្លាប់ប្រាប់ ភ្នំពេញ ប៉ុស្តិ៍ថា ខ្លួនសម្រាកពីការសម្តែងមួយរយៈសិន ដោយសារចង់មករៀបចំការរកស៊ីផ្ទាល់ខ្លួន ហើយយ៉ាងយូរពាក់កណ្តាលឆ្នាំ ២០២០ នឹងវិលទៅសម្តែងវិញ តែពេលវេលាបានរំលងជិត ២ ឆ្នាំទៅហើយ។
ព្រោះរូបឆោមកាន់តែល្អ សម្រស់ស្រស់សោភា តារាស្រីរូបនេះ ក៏ល្បីថា មានកន្លង់តាមសុំស្នេហ៍ជាច្រើនទាំងក្នុងរង្វង់សិល្បៈ និងក្រៅសិល្បៈ ហើយកញ្ញា ហេង ចន្ថា ក៏បានបង្ហើបថា មានអ្នកតាមស្រឡាញ់ច្រើនមែន ប៉ុន្តែនាងកំពុងតែមានទំនាក់ទំនងជាមួយកូនប្រុសអ្នកជំនួញធំម្នាក់នៅក្នុងទីក្រុងភ្នំពេញ។
ទន្ទឹមនឹងនេះ កញ្ញា ហេង ចន្ថា ក៏បានបង្ហើបប្រាប់ពីទំនាក់ទំនងមើលចិត្តគ្នា ជាមួយនឹងបុរសដែលជាកូនចៅអ្នកជំនួញនោះដូច្នេះដែរថា៖ «គេបានស្រឡាញ់យើងហើយ អ៊ីចឹងក៏សាកមើលចិត្តគ្នាសិនទៅ។ ប៉ុន្តែក៏មិនទាន់ក្លាយជាគូស្នេហ៍នឹងគ្នាដែរ។ សម្រាប់គាត់អាចនិយាយបានថា គាត់ជាអ្នកសិល្បៈក៏បាន មិនមែនសិល្បៈក៏បាន ដោយសារគាត់ក៏ធ្លាប់ចូលរួមក្នុងការប្រឡងកម្មវិធីមួយដែរ។ ប៉ុន្តែគាត់មិនទទួលបានការសម្តែងអី្វមួយនោះទេ ហើយដោយសារគ្រួសារគាត់ជាអ្នកជំនួញធំដែរនោះ អ៊ីចឹងហើយទើបបានជាគាត់ធ្វើជំនួញមិនចូលសម្តែងទេ»៕