លោក ឯក ប៊ុនថា កាលពីប្រគល់រង្វាន់ក្នុងការប្រកួតគំនូរវ៉ាយខេនវា៉ស ឆ្នាំ ២០២០។ រូបថត ហ្វេសប៊ុក
.jpg)
ភ្នំពេញៈ ការប្រកួតប្រជែងស្នាដៃសិល្បៈគំនូរវ៉ាយខេនវា៉ស ឆ្នាំ ២០២១ ( White Canvas 2021) ដែល ជាការចាប់ផ្តើមបង្កើតឆាកសិល្បៈថ្មីមួយ ផ្អែកលើមធ្យោបាយថ្មី ដើម្បីគាំទ្រសិល្បករនោះ បានបើកដំណើរការប្រកួតលើកទី២ នៅកម្ពុជា រៀបចំដោយក្រុមហ៊ុន Social Compass Cambodia។
ការប្រកួតស្នាដៃគំនូរវ៉ាយខេនវា៉ស មានគោលបំណងប្រមូលស្នាដៃរបស់សិល្បករឆ្នើម និងលេចធ្លោ ក្នុងតំបន់ ហើយនឹងបើកចំហសម្រាប់មនុស្សគ្រប់វ័យ មានបំណងប្រាថ្នាចង់ក្លាយជាសិល្បករអាជីពក្នុងតំបន់អាស៊ី។
ក្រោយពីបញ្ចប់ការទទួលយកស្នាដៃប្រកួតប្រជែងពីក្រុមសិល្បករទាំង ២ ប្រភេទ គឺសិល្បករពេញវ័យ និងកុមារ កាលពីថ្ងៃទី ៣១ ខែ សីហា ឆ្នាំ ២០២១ ក្រុមអ្នករៀបចំកម្មវិធីឆ្នាំនេះ ក៏បានបង្ហាញសមាសភាពក្រុមគណៈកម្មការដាក់ពិន្ទុស្នាដៃគំនូរ របស់ក្រុមសិល្បករផងដែរ។ សមាសភាពក្រុមគណៈកម្មការដាក់ពិន្ទុ នៃការប្រកួតប្រជែងស្នាដៃសិល្បៈគំនូរវ៉ាយខេន-វា៉សឆ្នាំ២០២១ មានចំនួន ៥ រូប ដោយជនជាតិខ្មែរ ២ រូប និងជនជាតិជប៉ុន ៣ រូប ហើយលទ្ធផល នឹងប្រកាសធ្វើនៅខែវិច្ឆិកា ឆ្នាំ ២០២១ ខាងមុខ។
លោក ប៉ោយ ឈុនលី។
បើតាមសេចក្តីប្រកាសក្នុងគេហទំព័រផ្លូវការ White Canvas Cambodia បានឱ្យដឹងពីសមាសភាពក្រុមគណៈកម្មការទាំង ៥ រូបនោះថា៖ «លោក ឯក ប៊ុនថា ជាអគ្គនាយករងទទួលបន្ទុកបេតិកភណ្ឌវប្បធម៌អរូបីនៃក្រសួងវប្បធម៌ និងវិចិត្រសិល្បៈ។ លោកក៏ជាសាស្ត្រាចារ្យផ្នែកនរវិទ្យាវប្បធម៌នៅសាកលវិទ្យាល័យភូមិន្ទវិចិត្រសិល្បៈ និងបានបញ្ចប់ការសិក្សាបរិញ្ញាបត្របុរាណវិទ្យាឆ្នាំ ១៩៩៤ និងបញ្ចប់ថ្នាក់អនុបណ្ឌិតផ្នែកសិល្បៈ នរវិទ្យាវប្បធម៌ពីសាកលវិទ្យាល័យ Sophia ប្រទេសជប៉ុន នៅឆ្នាំ ១៩៩៩។
លោក ប៉ោយ ឈុនលី គឺជាសិល្បករម្នាក់ដែលបានបញ្ចប់ការសិក្សានៅអង្គការហ្វារពន្លឺសិល្បៈខេត្តបាត់-ដំបង និងសាលា Ecole Pivaut ប្រទេសបារាំង។ លោកបានសាងស្នាដៃសិល្បៈជាច្រើនទម្រង់ រួមមានគំនូរ-ចម្លាក់ វីដេអូ និងគំនូរជីវចលជាដើម។
បច្ចុប្បន្នលោកបាន បើកស្ទូឌីយោផ្ទាល់ខ្លួនមួយឈ្មោះថា «ប៉ោយស្ទូឌីយោ» ខណៈលោកធ្លាប់រៀបចំការតាំងពិព័រណ៍ស្នាដៃសិល្បៈ និងចម្លាក់ នៅបាត់ដំបង ទីក្រុងភ្នំពេញ នៅប្រទេសចិន និងជាចុងក្រោយ ឆ្នាំ ២០១៨ នៅប្រទេសបារាំង»។
លោក ប៉ោយ ឈុនលី (កាន់មេក្រូ) និងកញ្ញា ឡូរ៉េន អុីអិុដា។ រូប ហ្វេសប៊ុក
ប្រភពដដែលបន្តថា៖ «កញ្ញា ឡូរ៉េន អ៊ីអ៊ីដា ជាស្ថាបនិក Open Studio Cambodia និងជាសិល្បការិនីកូនកាត់ជប៉ុន-អាមេរិក ចេះនិយាយភាសាខ្មែរច្បាស់ ខណៈកញ្ញាបានបញ្ចប់ថ្នាក់បរិញ្ញាបត្រផ្នែកវិចិត្រសិល្បៈពីមហាវិទ្យាល័យ Cornish នៅឆ្នាំ ២០១៤។ លោកស្រី យូកុ សាកាតា ជាជនជាតិជប៉ុន បញ្ចប់ការសិក្សាផ្នែកសិក្សាអាស៊ីនៅសាកលវិទ្យាល័យ Temple នៃទីក្រុង Philadelphia នៅឯសហរដ្ឋអាមេរិក និងបានមករស់នៅក្រុងសៀមរាប ប្រទេសកម្ពុជា តាំងពីឆ្នាំ ២០០៩ ហើយបានបង្កើតសាលាវាយោសិល្បៈ (Small Art School) ជាមួយអ្នកគ្រូសិល្បៈម្នាក់ឈ្មោះ Komoko Kasahara។ លោកស្រីបានក្លាយជាអ្នកសម្របសម្រួលផ្នែកសិល្បៈ ទទួលបន្ទុកការផលិតបោះពុម្ពផ្សាយ ទីផ្សារ និងផ្នែកលក់គ្រឿងសិល្បៈរបស់សាលា។ ឯលោកស្រី ក្យូកុ អាបិ សិល្ប-ការិនីជាតិជប៉ុន រស់នៅទីក្រុងបាងកក ប្រទេសថៃ និងទទួលបន្ទុករៀបចំកម្មវិធី White Canvas នៅថៃផងដែរ»៕
