ភ្នំពេញៈ កាលពីចុងខែសីហា ឆ្នាំ ២០២១ កន្លងមកនេះ កញ្ញា ស៊ីន សេដ្ឋសុជ្ឈតា ត្រូវបានខាងស្ថានទូតអាមេរិកប្រចាំកម្ពុជាបង្ហាញ MV បទចម្រៀងផលិតឡើងវិញ មានចំណងជើងថា «ស្នេហ៍បាត់សម្រស់» ដែលជាបទចម្រៀងឆ្លើយឆ្លងរវាងចៅស្រី និងតា ដើម្បីចេញឱ្យនៅចំថ្ងៃគម្រប់ខួប ៨៨ ឆ្នាំ របស់អតីតតារាចម្រៀងអធិរាជសំឡេងមាសលោក ស៊ីន ស៊ីសាមុត។
ខណៈចុងខែកញ្ញា ឆ្នាំ ២០២១ នេះ ស្រាប់តែកញ្ញា ស៊ីន សេដ្ឋសុជ្ឈតា ត្រូវបានសារព័ត៌មានអាមេរិក ឈ្មោះ Rolling Stone ទម្លាយនូវបទសម្ភាសស្តីពីខ្សែជីវិតនៃការកសាងកេរ្តិ៍ឈ្មោះលើវិថីសិល្បៈទៅតាមគន្លងជីតារបស់ខ្លួនបង្កើតភាពភ្ញាក់ផ្អើលពីមហាជននៃបណ្តាញសង្គម។
កញ្ញា ស៊ីន សេដ្ឋសុជ្ឈតា តារាចម្រៀងស្រីមានវ័យ ២៧ ឆ្នាំ ដែលជាចៅស្រីលោកតា ស៊ីន ស៊ីសាមុត បានសាងកេរ្តិ៍ឈ្មោះដំបូងតាមកម្មវិធី Klapyahandz ក្លាបយ៉ាហ៊ែន នោះបានឱ្យដឹងពីអារម្មណ៍ចំពោះកិច្ចសម្ភាសន៍ជាមួយសារព័ត៌មានបរទេស មានមូលដ្ឋានអាមេរិកនោះថា៖ «នាងខ្ញុំ ស៊ីន សេដ្ឋសុជ្ឈតា សូមអរគុណដល់ក្រុមសារព័ត៌មាន Rolling Stone ដែលផ្តល់បទសម្ភាសដ៏ពិសេសក្នុងអត្ថបទមួយនេះមកកាន់នាងខ្ញុំ។ ក្នុងអត្ថបទនេះផងដែរ អ្នកទាំងអស់ និងបានជ្រាបច្បាស់អំពីនាងខ្ញុំ រួមជាមួយដំណើរនៃការលូតលាស់ធំធាត់ និងការស្វែងរកខ្លួនឯងក្នុងនាមជាសិល្បករ និងអ្នកនិពន្ធឯករាជ្យម្នាក់»។
ក្រៅពីរឿងបទសម្ភាសន៍ជាមួយសារព័ត៌មានអាមេរិក កញ្ញា ស៊ីន សេដ្ឋសុជ្ឈតា ក៏ទម្លាយពីការខិតខំពុះពារនៃការតាក់តែងបទចម្រៀងស្តីពីខ្សែជីវិតខ្លួន និងគ្រួសារ ដែលខ្លួនមិនហ៊ាននិយាយឱ្យដឹងដែរថា៖ «ដំណើរជីវិត និងរឿងរ៉ាវទាំងអស់ ដែលនាងខ្ញុំបានសរសេរ នៅក្នុងបទចម្រៀងទាំង ៣ បទ (បទ «ទទួលការពិត Truth» បទ «ជឿជាក់ Believe» និងបទ «មិនស្តាយក្រោយ No Regrets») សុទ្ធសឹងតែជារឿង ដែលនាងខ្ញុំមិនដែលគិតថា នឹងអាចនិយាយចេញ។ នាងខ្ញុំ សូមអរគុណអ្នកទាំងអស់គ្នា ដែលបានទស្សនាវីដេអូចម្រៀងទាំង ៣ របស់នាងខ្ញុំ។ នាងខ្ញុំសូមឧទ្ទិសចម្រៀងទាំង ៣ បទនេះ ជូនទៅដល់លោកតា ស៊ីន ស៊ីសាមុត លោកប៉ា ស៊ីន ច័ន្ទឆាយា និងបងប្រុស ស៊ីន សេដ្ឋកុល។ នាងខ្ញុំក៏សូមអរគុណក្រុមការងារទាំងមូល ដែលបានចូលរួមសហការក្នុងគម្រោងនេះ»។
គួរបញ្ជាក់ដែរថា នាពេលថ្មីៗនេះ ឃើញមានការផលិតចម្រៀងឡើងវិញនូវបទមានចំណងជើងថា «ស្នេហ៍បាត់សម្រស់» ដែលជាការច្របាច់បញ្ចូលគ្នាឱ្យក្លាយជាបទចម្រៀងឆ្លើយឆ្លងរវាងចៅស្រី និងតា គឺសំឡេងកញ្ញា ស៊ីន សេដ្ឋសុជ្ឈតា និងសំឡេងលោកតា ស៊ីន ស៊ីសាមុត ដើម្បីចេញនៅចំថ្ងៃគម្រប់ខួប ៨៨ ឆ្នាំ អតីតតារាចម្រៀង អធិរាជសំឡេងមាស ស៊ីន ស៊ីសាមុត នៅថ្ងៃទី ២៣ ខែ សីហា ឆ្នាំ ២០២១ កន្លងមកនេះ៕