រ៉ូបូតដឹកជញ្ជូនស្វ័យប្រវត្ដិបានកើនឡើងដល់ ២០០គ្រឿងក្នុងទីក្រុង Milton Keynes និង Northampton។ AFP
.jpg)
ក្រុងឡុងដ៍៖ ជាកន្លែងដែលមានឈ្មោះល្បីខាងសម្បូររង្វល់មូលធំៗ និងចម្លាក់គោបេតុង ទីក្រុងរបស់អង់គ្លេស Milton Keynes ពេលនេះមានអ្វីថ្មីបង្អួតពិភពលោកទៀតហើយគឺកងដឹកជញ្ជូនរ៉ូបូត។
យានស្វ័យប្រវត្ដិកង់ ៦ ដែលត្រូវបានរចនាឡើងកាលពី ៣ឆ្នាំមុន ទទួលបានការចាប់អារម្មណ៍ខ្លាំងពេលពួកវាបរកាត់វិថីលំនៅឋានពលរដ្ឋ ចម្ងាយប្រមាណ ៨០គីឡូម៉ែត្រភាគខាងជើងទីក្រុងឡុងដ៍។
ចំនួនយានដឹកជញ្ជូនស្វ័យប្រវត្ដិបានកើនឡើងដល់ ២០០គ្រឿងក្នុងទីក្រុង Milton Keynes និងទីក្រុងក្បែរខាង Northampton ដែលបានផ្ដើមសេវាកម្មក្នុងឆ្នាំ២០២០ ជាមួយគម្រោងដំណើរការយាន ៥០០គ្រឿងនៅតាមទីកន្លែងចំនួន ៥ ទូទាំងប្រទេស។
រ៉ូបូតស្វ័យប្រវត្ដិឈ្មោះ Starship មានភារកិច្ចដឹកជញ្ជូនគ្រឿងទេសទៅកាន់ទីតាំងអតិថិជន។ AFP
យោងតាមប្រតិបត្ដិកររ៉ូបូត បានបង្ហាញថា យានពណ៌សរាងបួនជ្រុងនេះបានមកដល់ទីក្រុងនេះ ពេលចក្រភពអង់គ្លេសត្រូវបានបិទខ្ទប់កាលពីឆ្នាំមុន អំឡុងពេលវីរុសកូរ៉ូណាវាយលុកខ្លាំង។
លោក អេនឌ្រូ ឃើរធីស ប្រធានប្រតិបត្ដិការនៅក្រុមហ៊ុន Starship Technologies ប្រចាំចក្រភពអង់គ្លេសបានប្រាប់ទីភ្នាក់ងារ AFP ថា៖ «មនុស្សគ្រប់រូបសុទ្ធតែមិនចង់ប៉ះពាល់គ្នាអំឡុងពេលដឹកជញ្ជូនក្នុងសម័យកូវីដនេះ»។
ក្រុមហ៊ុនអាមេរិក ដែលបានផ្ដល់សេវាកម្មដឹកជញ្ជូននៅចក្រអង់គ្លេសនេះ បច្ចុប្បន្នធ្វើការដឹកជញ្ជូនប្រមាណ ១ពាន់ជើងរៀងរាល់ថ្ងៃ។
រ៉ូបូតស្វ័យប្រវត្ដិឈ្មោះ Starship មានភារកិច្ចដឹកជញ្ជូនគ្រឿងទេស និងចតនៅតាមផ្សារទំនើប Co-op។ AFP
ក្រុមហ៊ុនបានចុះកិច្ចព្រៀមព្រាងថ្មីៗជាមួយដៃគូយូរអង្វែង Co-op Group ជាសម្ព័ន្ធផ្សារទំនើប ដើម្បីផ្ដល់រ៉ូបូតថ្មី ៣០០គ្រឿងនៅត្រឹមបំណាច់ឆ្នាំ និងបង្កើនការដឹកជញ្ជូន ៣ដង។
នៅហាងលក់រាយមួយក្នុងទីក្រុង Milton Keynes ដែលប្រើបច្ចេកវិទ្យាយានដឹកជញ្ជូនដំបូងគេក្នុងឆ្នាំ២០១៨ រ៉ូបូតជាច្រើនគ្រឿងបានត្រៀមខ្លួនជាស្រេច និងកំពុងរង់ចាំបម្រើសេវាកម្ម។
រ៉ូបូតស្វ័យប្រវត្ដិឈ្មោះ Starship មានភារកិច្ចដឹកជញ្ជូនគ្រឿងទេសទៅកាន់ទីតាំងអតិថិជន។ AFP
ពេលកូនឡានដឹកជញ្ជូននេះទៅដល់គោលដៅ អ្នកស្រី សៃឡា រ៉ូស អាយុ ៧១ឆ្នាំ បានដើរចេញពីផ្ទះ និងដោះសោរគម្របរបស់វាតាមរយៈកម្មវិធីទូរស័ព្ទ ដើម្បីទទួលយកគ្រឿងទេស និងផ្កា។
ដោយចាត់ទុករ៉ូបូតជាជំនួយការដែលព្រះប្រទាន អ្នកស្រីនិយាយទាំងដៃម្ខាងកាន់ឈើច្រត់ថា៖ «បើខ្ញុំអាចប្រើវា នរណាដ៏ចេះប្រើវាដែរ។ ដោយសារតែបញ្ហាសុខភាពរបស់ខ្ញុំ ខ្ញុំពិបាកចេញក្រៅទិញរបស់របរណាស់»៕ AFP/HR
អ្នកស្រី សៃឡា អាយុ ៧១ឆ្នាំ ទទួលយកសម្ភារកុម្ម៉ង់ពីកូនឡានរ៉ូបូតដឹកជញ្ជូនដល់មុខផ្ទះ។ AFP
រ៉ូបូតស្វ័យប្រវត្ដិឈ្មោះ Starship មានភារកិច្ចដឹកជញ្ជូនគ្រឿងទេស និងចតនៅតាមផ្សារទំនើប Co-op។ AFP
