ភ្នំពេញៈ សម្រាប់ពិភពប្រកួតប្រជែងរាជិនីសម្រស់ប្រចាំឆ្នាំ ២០២១ នេះ អាចនិយាយបានថា កញ្ញា ជា ចារ៉ានី គឺជាបេក្ខនារីទី៤ ដែលនាំសំណាងល្អ និងជាកិត្តិយសល្បីជាទីមោទនៈនៃទឹកដីខេត្តបាត់ដំបង នៅក្នុងតំណែងកញ្ញាឯកអន្តរជាតិកម្ពុជាឆ្នាំ ២០២១។ ខណៈអ្នកទី១ កញ្ញា សុក សារិតុលា ជាម្ចាស់មកុដ Miss Wisdom Cambodia 2021 អ្នកទី២ កញ្ញា ប៉ូគឹមថេង សុធីតា ជាម្ចាស់មកុដ Miss Grand Cambodia 2021 និងអ្នកទី៣ កញ្ញា ម៉ៅ រស្មី ជាម្ចាស់មកុដ Miss Tourism Cambodia 2021។
ជាមួយនឹងរូបសម្ផស្ស ស្រស់សោភា មានវ័យ ២៦ ឆ្នាំ មានកម្ពស់ ១,៦៥ ម៉ែត្រ ទម្ងន់ ៤៦ គីឡូ និងមានទំហំដងខ្លួនទាំងបី ៣២/២៦/៣៤ ធ្លាប់ជាគ្រូបង្រៀនភាសាអង់គ្លេសកម្រិតមត្តេយ្យ និងបឋម នៅសាលាអន្តរជាតិយូអេសអេ កាលពីនៅខេត្តបាត់ដំបង កញ្ញា ជា ចារ៉ានី បានក្លាយជាកញ្ញាឯកអន្តរជាតិកម្ពុជាឆ្នាំ ២០២១ (Miss International Cambodia 2021) ក្នុងកម្មវិធីកញ្ញាឯកកម្ពុជាប្រចាំឆ្នាំ ២០២១ ដើម្បីជ្រើសរើសម្ចាស់មកុដទាំង ៣ កន្លងមកថ្មីៗនោះ។
គួរបញ្ជាក់ផងដែរថា កម្មវិធីប្រកូតរកកញ្ញាឯកកម្ពុជាប្រចាំឆ្នាំ ២០២១ (Miss Cambodia 2021) ដើម្បីជ្រើសម្ចាស់មកុដទាំង ៣ ដោយជាលទ្ធផល គឺកញ្ញាឯកទេសចរណ៍កម្ពុជា ឆ្នាំ ២០២១ បានទៅលើកញ្ញា ម៉ៅ រស្មី មកពីខេត្តបាត់ដំបង ហើយកញ្ញាឯកអន្តរជាតិកម្ពុជាឆ្នាំ ២០២១ គឺជាកញ្ញា ជា ចារ៉ានី ខ្លួនឯង ក៏មកពីខេត្តបាត់ដំបង និងកញ្ញាឯកភពផែនដីឆ្នាំ ២០២១ បានលើកញ្ញា ដាំ សុភ័ក្ត្រស៊ីនឌី វ័យ ២៦ ឆ្នាំ មកពីខេត្តពោធិ៍សាត់។
ស្រីស្អាតបច្ចុប្បន្នជាជយលាភីកញ្ញាឯកអន្តរជាតិកម្ពុជាប្រចាំឆ្នាំ ២០២១ ដែល បានបញ្ចប់ការសិក្សាកម្រិតបរិញ្ញាបត្រជំនាញធនាគារ និងហិរញ្ញវត្ថុ នៅសាកលវិទ្យាល័យបៀលប្រាយ និងអតីតជាជយលាភីរង ទី១ ក្នុងកម្មវិធី «ធីតាឯកសង្ក្រាន្ត» រដូវកាលទី២ ផងដែរ។
កញ្ញា ជា ចារ៉ានី បង្ហើបពីអារម្មណ៍រីករាយផ្ទាល់ខ្លួន និងការតាំងចិត្តសម្រាប់ប្រកួតអន្តរជាតិនាឆ្នាំ ២០២២ ថា៖ «នាងខ្ញុំពិតជាសប្បាយរីករាយ និងរំភើបក្រៃលែង ជាពិសេសនោះ មិននឹកស្មានថា ខ្ញុំអាចទទួលបាននូវជោគជ័យដ៏ធំមួយក្នុងជីវិត។ នាងខ្ញុំអាចនិយាយបាន ២ ភាសា គឺជាភាសាខ្មែរ និងភាសាអង់គ្លេស។ ខ្ញុំនឹងចូលរួមជាតំណាងឱ្យកម្ពុជា នៅលើឆាកអន្តរជាតិនៅឆ្នាំ ២០២២ ខាងមុខនេះនៅឯប្រទេសជប៉ុន៕