រូបតំណាង៖ ឆ្លាមត្រូវបានបំពាក់ឧបករណ៍បំពាក់តាមដាននៅព្រុយខាងលើរបស់វា។
.jpg)
ក្រុងស៊ីដនី: បុរសអូស្ដ្រាលីម្នាក់ ត្រូវបានចោទប្រកាន់ពីបទលួចឧបករណ៍តាមដានពីឆ្លាមយក្សស ១ ក្បាល ដោយបង្កើតជាសញ្ញាប្រកាសអាសន្នក្លែងក្លាយ ពីវត្ដមានមច្ចុរាជចង្កូមសនៅភាគខាងលិចប្រទេសអូស្ដ្រាលី។
ប៉ូលិសក្នុងក្រុងអាល់បានី បានចោទប្រកាន់បុរសវ័យ ៤៨ ឆ្នាំពីបទលួច «ឧបករណ៍តាមដានសំឡេង» ដែលប្រើដើម្បីតាមដានឆ្លាមយក្សសនៅក្បែរឆ្នេរ ដោយពួកគេបានឱ្យដឹងក្នុងសេចក្ដីថ្លែងការណ៍កាលពីសប្ដាហ៍កន្លងទៅនេះ។
បុរសរូបនេះប្រឈមមុខនឹងសវនាការនៃតុលាការក្រុងអាល់បានី នៅថ្ងៃទី ៤ ខែវិច្ឆិកា ខាងមុខនេះ។
ឧបករណ៍តាមដានឆ្លាមបានបង្កជាសំឡេងរោទ៍ ពេលពួកវាហែលមកក្បែរសេនស័រចំនួន ៣៤ បំពាក់នៅតាមឆ្នេរភាគខាងលិច ដែលផ្ដល់ជាសញ្ញាព្រមានពីគ្រោះថ្នាក់នៅតាមទីតាំងនីមួយៗដល់មនុស្ស។
ថ្វីដ្បិតតែប៉ូលិសមិនបានផ្ដល់ព័ត៌មានលម្អិត តែរបាយការណ៍ ១ ចុះផ្សាយលើកាសែត West Australian បានឱ្យដឹងថា បុរសរូបនោះបានយកឧបករណ៍តាមដានជាប់ខ្លួនត្រីឆ្លាម ពេលលោកចាប់ឆ្លាមយក្ស សនេះដោយចៃដន្យ រួចក៏បានលែងវាចូលទឹកវិញ។
ឧបករណ៍នោះក្រោយបានបង្កជាសំឡេងរោទ៍ ៧ ដងចន្លោះថ្ងៃទី ១៣ ខែសីហា និងថ្ងៃទី ៤ ខែកញ្ញា។
ប្រទេសអូស្ត្រាលី មានករណីវាយប្រហារដោយឆ្លាមប្រមាណ ១៦ ករណី កាលពីឆ្នាំ ២០២០ និងប្រមាណ ១៣ ករណី ក្នុងឆ្នាំ ២០២១ នេះ បើយោងតាមវេបសាយ Shark Attack Map។
ការបំពាក់ឧបករណ៍តាមដានឆ្លាម ជួយឱ្យអ្នកស្រាវជ្រាវសិក្សាពីជីវិតពួកវាក្នុងជម្រកធម្មជាតិនៃដែនសមុទ្រ និងចលនារបស់វាក្នុងករណីប្រកាសអាសន្ននានា៕ AFP/HR
