មហោស្រពភាពយន្តខ្លីចតុមុខ ចូលរួមពីសំណាក់ផលិតករ សមិទ្ធករ និងអ្នកដែលស្រឡាញ់វិស័យ ភាពយន្ត ទាំងក្នុង និងក្រៅប្រទេស។ សហការី
.jpg)
ភ្នំពេញ៖ ការចាក់បញ្ចាំងភាពយន្តខ្លីនៃកម្មវិធីមហោស្រពភាពយន្តខ្លីចតុមុខ (CSFF) នឹងត្រូវបើកសម្ពោធនៅថ្ងៃទី ២៣ ខែ តុលា ឆ្នាំ ២០២១ តាមរយៈការចាក់បញ្ចាំងអនឡាញលើ Facebook Page ផ្លូវការ របស់មហោស្រពភាពយន្តខ្លីចតុមុខ។ នៅឆ្នាំនេះ ជាលើកទី១០ ដែលមហោស្រពភាពយន្តខ្លីចតុមុខបានរៀបចំកម្មវិធីប្រកួតភាពយន្តខ្លីនៅប្រទេសកម្ពុជា ដោយមានការចូលរួមពីសំណាក់ផលិតករ សមិទ្ធករ និងអ្នកដែលស្រឡាញ់វិស័យភាពយន្ត ទាំងក្នុង និងក្រៅប្រទេស។
កម្មវិធីមហោស្រពភាពយន្តខ្លីចតុមុខ (CSFF) គឺជាកម្មវិធីប្រកួតភាពយន្តខ្នាតខ្លីដំបូងនៅប្រទេសកម្ពុជា ដែលឱ្យតម្លៃដល់ស្នាដៃថ្មីរបស់យុវជនកម្ពុជា និងសមិទ្ធិករពីបរទេស។ សមិទ្ធផលក្នុងស្រុកដែលបានជ្រើសរើសសម្រាប់ប្រកួតផ្តាច់ព្រ័ត នឹងត្រូវបានទទួលការវាយតម្លៃពីសំណាក់ គណៈមេប្រយោគរបស់មហោស្រព ដែលមានជំនាញផ្សេងៗក្នុងវិស័យភាពយន្ត។
ខ្សែភាពយន្តចិន ជាប់ជម្រើសប្រកួតថ្នាក់អន្តរជាតិ The Speech របស់ផលិតករ Haohao Yan។ សហការី
កម្មវិធី CSFF នៅឆ្នាំនេះ បានបន្ថែមប្រភេទវីដេអូ ដែលអាចផ្តល់ឱកាសដល់អ្នក ដែលចំណូលនៅវិស័យភាពយន្តអាចធ្វើការបន្ថែមទៅលើប្រភេទវីដេអូ ដែលសមិទ្ធិករនានាចាប់អារម្មណ៍។ ប្រភេទវីដេអូដែល អាចចូលរួមនៅក្នុងការចាក់បញ្ចាំង រួមមាន ខ្សែភាពយន្តប្រឌិតខ្លី ភាពយន្តឯកសារខ្មែរខ្នាតខ្លី វីដេអូចម្រៀងខ្មែរ និងភាពយន្តអន្តរជាតិខ្លីប្រឌិត និងឯកសារ។
បើយោងតាមសេចក្តីជូនដំណឹងពីសន្និសីទសារព័ត៌មាន កាលពីថ្ងៃទី ១៦ ខែ តុលា ឆ្នាំ ២០២១ កន្លងមកនេះ ប្រភេទនៃវីដេអូនីមួយៗ ដែលបានជាប់ជម្រើស ចាក់បង្ហាញពីមហោស្រពចតុមុខលើកទី១០ រួមមានដូចជា៖ «ភាពយន្តខ្លីក្នុងស្រុកសម្រាប់ការប្រកួត (៧) ភាពយន្តខ្លីក្នុងស្រុកសម្រាប់ការចាក់បង្ហាញ (៩) ភាពយន្តឯកសារខ្លីក្នុងស្រុក សម្រាប់ការចាក់បង្ហាញ (១៣) វីដេអូតន្ត្រីក្នុងស្រុកសម្រាប់ការចាក់បង្ហាញ (៤) ភាពយន្តខ្លីអន្តរជាតិសម្រាប់ការប្រកួត(៨) ភាពយន្តខ្លីអន្តរជាតិសម្រាប់ការចាក់បង្ហាញ (៤) ភាពយន្តឯកសារអន្តរជាតិសម្រាប់ការចាក់បង្ហាញ (៣) ភាពយន្តខ្លីពី«ឈូករ័ត្ន» សម្រាប់ការចាក់បង្ហាញ (៤) ភាពយន្តខ្លីពី «តោះថតឯកសារនៅកម្ពុជា» សម្រាប់ការចាក់បង្ហាញ (៨) ភាពយន្តឯកសារខ្លីពី«ជម្រើសដែលមានសុវត្ថិភាព» សម្រាប់ការចាក់បង្ហាញ (៦)»។
សន្និសីទព័ត៌មានខាងលើបន្តឱ្យដឹងថា៖ «សម្រាប់ការប្រកួតរបស់មហោស្រពភាពយន្តខ្លីចតុមុខលើកទី១០ នេះ ខ្សែភាពយន្តខ្លី ដែលបានជាប់ជម្រើស នឹងបានទទួលប្រាក់រង្វាន់ច្រើនជម្រើស រួមមានដូចជាជយលាភីភាពយន្តខ្លីលេខ ១ ក្នុងស្រុករង្វាន់បាន ១ ០០០ ដុល្លារ ដាក់ពិន្ទុដោយមេប្រយោគជយលាភីភាពយន្តខ្លីលេខ ២ ក្នុងស្រុករង្វាន់បាន ៥០០ ដុល្លារ ដាក់ពិន្ទុដោយមេប្រយោគ។ រង្វាន់ជម្រើសទស្សនិកជន សម្រាប់រឿងខ្លីក្នុងស្រុកទឹកប្រាក់បាន ៣០០ ដុល្លារ បោះឆ្នោតដោយទស្សនិកជនតាម Google Form រង្វាន់ជម្រើសទស្សនិកជនសម្រាប់រឿងខ្លីអន្តរជាតិទឹកប្រាក់បាន ៥០០ ដុល្លារ បោះឆ្នោតដោយទស្សនិកជនតាម Google Form»។
ខ្សែភាពយន្តខ្មែរខ្នាតខ្លីជាប់ជម្រើសចាស់បង្ហាញ «ដើមឈើបញច្រាស» របស់ផលិតករ សេង ប៉ឆាយ។ សហការី
លោក ស៊ុំ ស៊ីថែន ប្រធានមហោស្រពភាពយន្តខ្លីចតុមុខលើកទី១០ មានប្រសាសន៍ ក្នុងសន្និសីទនោះថា៖ «ការប្រារព្ធកម្មវិធីនៅឆ្នាំនេះតាមរយៈអនឡាញបានបង្ហាញឱ្យឃើញថា ទោះនៅក្នុងបរិបទណាក៏ដោយ មហោស្រពភាពយន្តខ្លីចតុមុខនៅតែព្យាយាមស្វះស្វែងក្នុងការរួមចំណែកមួយផ្សារភ្ជាប់វិស័យភាពយន្តខ្មែរទៅកាន់ទស្សនិកជន ទាំងក្នុងប្រទេស និងក្រៅប្រទេសឱ្យកៀកគ្នា ថ្វីបើនៅក្នុងបរិបទកូវីដ ១៩ នេះ»។
រីឯលោកលោក Lattapol Jirapathomsakul មន្ត្រីកម្មវិធី និងទំនាក់ទំនងរបស់ SEA Junction ដែលជាតំណាងអ្នកឧបត្ថម្ភ និងដៃគូមហោស្រពឆ្នាំនេះ បានថ្លែងពីចំណាប់អារម្មណ៍ខ្លួនថា៖ «នៅក្នុងបរិបទកូវីដ ១៩ នេះបានប៉ះពាល់ ទៅដល់វិស័យជាច្រើន ដែលក្នុងនោះក៏មានវិស័យភាពយន្តផងដែរ ជាពិសេសផលិតករ សមិទ្ធិករ។ ទោះយ៉ាងណា មហោស្រពភាពយន្តខ្លីចតុមុខ បានបង្ហាញនូវការប្តេជ្ញាចិត្ត ក្នុងការបន្តការងាររបស់ពួកគេទោះបីជានៅក្នុងកាលៈទេសៈលំបាកក្តី»។
ខ្សែភាពយន្តជប៉ុនជាប់ជម្រើសប្រកួតថ្នាក់អន្តរចាតិ West End Girls របស់ Hiroki Kataoka។ សហការី
លោក ប៉ុក បូរក្ស ប្រធាននាយកដ្ឋាន សិល្បភាពយន្ត និងផ្សព្វផ្សាយវប្បធម៌ ថ្លែងក្នុងសន្និសីទសារព័ត៌មានថា៖ «នាយកដ្ឋានតែងតែ សម្តែងនូវការគាំទ្រទៅលើរាល់ការងាររបស់ក្រុមឈូករ័ត្ន ក្នុងការរៀបចំមហោស្រពភាពយន្តខ្លី ចតុមុខ។ តាំងពីឆ្នាំឆ្នាំទី១ មកដល់ឆ្នាំនេះជាឆ្នាំទី១០ ក្រសួងអប់រំនិងវិចិត្រសិល្បៈតែងតែគាំទ្រ និងសហការជាមួយ មហោស្រពភាពយន្តខ្លីចតុមុខ»។
លោក បូរក្ស បានមានប្រសាសន៍បន្ថែមថា៖ «បញ្ហារីករាលដាលកូវីដ-១៩ បានជំរុញឱ្យកម្មវិធីនេះប្រព្រឹត្តតាមរយៈអនឡាញ យើងមើលឃើញថា ឆន្ទៈ និងការស្រឡាញ់របស់យុវជនយើងនៅតែបន្តមានចំពោះការផលិត ភាពយន្ត»។
លោកបានបន្តនិយាយថា៖ «តាមរយៈរបាយការណ៍របស់មហោស្រពភាពយន្តខ្លីចតុមុខបានសរបញ្ជាក់ថា ទោះបីជាមានការប្រឈមនឹងបញ្ហាកូវីដ ១៩ ក្តីប៉ុន្តែសមិទ្ធិករនៅតែបន្តផលិត ហើយក្រុមការងាររបស់ក្រុមឈូករ័ត្ននៅតែបន្ត ការកិច្ចខំប្រឹងប្រែងរៀបចំឱ្យកម្មវិធី ចាក់បញ្ចាំងភាពយន្តក្នុងមហោស្រពភាពយន្តខ្លីចតុមុខនៅឆ្នាំនេះបានកើតឡើង»។
អ្នកចូលរួមសន្និសីទសារព័ត៌មានអនឡាន មហោស្រពភាពយន្តខ្លីចតុមុខ ឆ្នាំ២០២១។ សហការី
ចំពោះកម្មវិធី CSFF ឆ្នាំនេះក៏មានការគាំទ្រពីស្ថាប័នក្នុងស្រុក ៦ គឺ៖ ក្រសួងវប្បធម៌ និងវិចិត្រសិល្បៈ ក្រសួងព័ត៌មាន Sabay News, FilmTalk Cambodia, Alien Express និងមូលនិធិ «ពន្លក» របស់អង្គការសិល្បៈខ្មែរអមតៈ ហើយក្រៅស្រុក ២ គឺ៖ SEA Junction និង culture360។
សម្រាប់បច្ចុប្បន្នភាពបន្ថែម សូមចូលមើលតាមប្រព័ន្ធផ្សព្វផ្សាយនៃកម្មវិធី CSFF តាមគេហទំព័រ៖ http://csff.co ទំព័រហ្វេសប៊ុក៖ https://www.facebook.com/CSFF.co/ តាមតេឡេក្រាម៖ https://t.me/csffkh និងតាម YouTube: https://www.youtube.com/c/ChaktomukShortFilmFestival/ ៕
ខ្សែភាពយន្តខ្មែរជាប់ជម្រើសប្រកួត Dream Catcher ដោយ គង់ តុលា។ សហការី
ខ្សែភាពយន្តក្រូអាតជាប់ជម្រើសប្រកួតអន្តរជាតិ I'm not telling anything, just sayin។ សហការី
ខ្សែភាពយន្តខ្មែរជាប់ជម្រើសប្រកួត ស្នេហ៍ឆ្លងវេលា ដោយ គឹមអាន សុផាស័ក្ក។ សហការី
