តារាចម្រៀងរ៉េប និងអ្នកច្នៃម៉ូដ កាញ៉េ អូម៉ារី វ៉េស ដែលបានប្ដូរឈ្មោះផ្លូវការថា Ye តែមួយម៉ាត់។ AFP
.jpg)
ក្រុងញូវយ៉ក៖ តារាចម្រៀងរ៉េបប្រាក់ពាន់លានដុល្លារ ដែលពីមុនត្រូវបានគេស្គាល់ថា កាញ៉េ វ៉េស ត្រូវចៅក្រហមសម្រេចឱ្យប្រើឈ្មោះ យេ (Ye) តែមួយម៉ាត់ ជាផ្លូវការហើយ តាមការស្នើសុំរបស់សាម៉ីខ្លួន។
មន្ត្រីទំនាក់ទំនងនៅតុលាការជាន់ខ្ពស់ទីក្រុងឡូសអេនជើលេសបានប្រាប់ AFP កាលពីថ្ងៃច័ន្ទថា ចៅក្រមឡូសអេនជើលេស បានទទួឡការស្នើសុំផ្លាស់ប្តូរឈ្មោះរបស់តារាចម្រៀងអាយុ ៤៤ ឆ្នាំរូបនេះ។
តារាចម្រៀង និងអ្នកច្នៃម៉ូដល្បីរូបនេះបានដាក់ពាក្យស្នើសុំកាលពីខែសីហា ដោយលើកឡើងពី «ហេតុផលផ្ទាល់ខ្លួន»។
ការផ្លាស់ប្តូរឈ្មោះនេះមានន័យថា តារាចម្រៀងរ៉េប និងផលិតករដែលឈ្នះពានរង្វាន់ Grammy លែងមាននាម ត្រកូល ឬឈ្មោះកណ្តាលទៀតហើយ។ ឈ្មោះពេញរបស់លោកពីមុនគឺ កាញ៉េ អូម៉ារី វ៉េស (Kanye Omari West) ត្រូវបានប្ដូរមកត្រឹមតែ ១ ម៉ាត់គឺ យេ (Ye)។
នៅឆ្នាំ ២០១៨ លោក យេ បានចេញអាល់ប៊ុម ដែលមានឈ្មោះដូចគ្នាដែលជាឈ្មោះនេះ។
អតីតស្វាមីតារាទូរទស្សន៍ គីម កាដាសៀន អាយុ ៤៤ឆ្នាំ ធ្លាប់ឈរឈ្មោះបោះឆ្នោតជាប្រធានាធិបតីសហរដ្ឋអាមេរិក។
គ្រានោះ លោកបានថ្លែងបទសម្ភាសន៍តាមវិទ្យុថា៖ «ខ្ញុំជឿថា «យេ» គឺជាពាក្យដែលគេប្រើច្រើនជាងគេនៅក្នុងព្រះគម្ពីរ ហើយនៅក្នុងព្រះគម្ពីរវាមានន័យថា «អ្នក»។
អតីតស្វាមីតារាទូរទស្សន៍ គីម កាដាសៀន រូបនេះបានពន្យល់ទៀតថា៖ «យេ បានមកពី កាញ៉េ ដែលមានន័យថា តែមួយគត់។ យេ គ្រាន់តែជាអ្នកដែលឆ្លុះបញ្ចាំងពីភាពល្អរបស់យើង អាក្រក់របស់យើងភាពច្របូកច្របល់ និងអ្វីគ្រប់យ៉ាងរបស់យើង»។
កាលពីខែសីហាកន្លងទៅថ្មីៗនេះ តារាចម្រៀងរ៉េប យេ បានចេញអាល់ប៊ុម Donda ដោយយកឈ្មោះតាមម្ដាយបង្កើតរបស់លោក។
ការសម្រេចអាល់ប៊ុមនេះក៏មានវត្តមានអតីតភរិយាគ្រងឈុតកូនក្រមុំពណ៌សមកចូលរួមផងដែរ។
មុនពេលព័ត៌មាននេះបែកបាក់ គូស្នេហ៍ទ្រព្យពាន់លានដុល្លារនេះត្រូវបានគេរាយការណ៍ថា ស៊ូទ្រាំជាច្រើនខែនឹងលំបាកក្នុងជីវិតអាពាហ៍ពិពាហ៍។ កាលពីឆ្នាំមុន យេ បានចូលរួមឈរឈ្មោះបោះឆ្នោតជាប្រធានាធិបតីសហរដ្ឋអាមេរិកផងដែរ តែទីបំផុតមហិច្ចតានេះត្រូវបានបរាជ័យ៕ AFP
តារាចម្រៀងរ៉េប និងអ្នកច្នៃម៉ូដ កាញ៉េ អូម៉ារី វ៉េស ដែលបានប្ដូរឈ្មោះផ្លូវការថា Ye តែមួយម៉ាត់។ AFP
