ម៉ូដែលអេហ្ស៊ីប ហ្សៃណា អេហា និងម៉ារៀម អាប់ដាល់ឡាស នៅក្នុងស្ទូឌីយូ UNN Model Management។ AFP
.jpg)
ក្រុងគែរ៖ ចម្លោះវិនាទីប្ដូរបំពាក់យ៉ាងទាន់ហ័ន ខណៈក្រុមអ្នកថតរូបត្រៀមសារ៉េចុកាណុងរង់ចាំ តារាម៉ូដែលចម្រុះជាតិសាសន៍ជាច្រើនរូប ត្រូវបានទីភ្នាក់ងារម៉ូដែលរបស់ អ៊ីម៉ាន អែលឌីប នាំបោះជំហានទៅមុខបណ្ដើរៗក្នុងវិស័យឧស្សាហកម្មហ្វាសសិនអេហ្ស៊ីប។
អ្នកនាង អែលឌីប បានហក់ចូលអាជីពអន្ដរជាតិក្នុងវិស័យហ្វាសសិនអឺរ៉ុបនៅទីក្រុងមីលែន ជាទីដែលក្រុមអ្នកថតរូបបានប្រាប់នាងថា នាងគឺជាម៉ូដែលអេហ្ស៊ីបដំបូងហើយ ដែលពួកគេបានជួប។
៧ឆ្នាំក្រោយមក នាងត្រឡប់ទៅកាន់អេហ្ស៊ីបវិញក្នុងឆ្នាំ ២០១៨ និងបានបង្កើតទីភ្នាក់ងារ UNN Model Management ជាឈ្មោះមានន័យថា «កំណើតថ្មី» តាមភាសាជនជាតិដើមភាគតិចនូប៊ីស្បែកខ្មៅ។
អ្នកនាង អែលឌីប បានឱ្យដឹថា នៅក្នុងប្រទេសដ៏ល្បីល្បាញបំផុតនៃពិភពអារ៉ាប់ ការបង្ហាញម៉ូដរមែងត្រូវបានគ្រប់គ្រដោយ «នារីមកពីអឺរ៉ុបខាងកើត ដែលមានពណ៌សម្បុរស្បែក ស ពីធម្មជាតិ»។
តារាម៉ូដែលចម្រុះជាតិសាសន៍ ក្នុងចម្លោះវិនាទីប្ដូរបំពាក់យ៉ាងទាន់ហ័នដើម្បីថតម៉ូដ។ AFP
នារីវ័យ ២៨ឆ្នាំរូបនេះ បាននិយាយថា ស្ដង់ដារចាស់គំរឹលបែបនេះបានធ្វើឱ្យមានការលំបាកដល់ពលរដ្ឋអេហ្ស៊ីប និងម៉ូដែលអារ៉ាប់ក្នុងការឈានជើងចូលពិភពដើរម៉ូដ។
កញ្ញាបាននិយាយថា៖ «ពណ៌សក់ ពណ៌ភ្នែក គឺអ្វីៗគ្រប់យ៉ាងគឺជាផ្នែកមួយនៃផ្នត់គំនិតចាស់ស្ដីពីសម្ផស្ស ហើយនេះគឺជាអ្វីដែលយើងត្រូវចៀសឆ្ងាយ តាមដែលអាចធ្វើទៅបាន»។
បច្ចុប្បន្នទីភ្នាក់ងារម៉ូដែល UNN បានចុះកុងត្រាជាមួយយីហោល្បីៗលើពិភពលោកប្រមាណ ៣៥ រួមទាំង Louis Vuitton, Adidas និង Levi''s ដែលធ្វើវាក្លាយជាទីភ្នាក់ងារឈានមុខនៅអេហ្ស៊ីប។
អ្នកនាង ម៉ារៀ ក្រេស ប្រោន ជាអ្នកស្រាវជ្រាវមកពីសាកលវិទ្យាល័យកាន់សាស់ ដែលនិពន្ធសៀវភៅស្ដីពីហ្វាសសិនរបស់ស្ដ្រីក្នុងប្រទេសស៊ូដង់ បាននិយាយថា អេហ្ស៊ីបមានលក្ខណៈស្រដៀងនឹងទៅនឹងលោកខាងលិច ដែលមនុស្សនៅតែវាយតម្លៃលើសពណ៌សម្បុរស្បែក។
ម៉ូដែលអេហ្ស៊ីប ហ្សៃណា អេហា និងម៉ារៀម អាប់ដាល់ឡាស នៅក្នុងស្ទូឌីយូ UNN Model Management។ AFP
ក្រៅពីការប្រយុទ្ធប្រឆាំងនឹងការរើសអើងក្នុងឧស្សាហកម្មកាប់ចាក់នេះ វាយតម្លៃមនុស្សលើបញ្ហាផ្លូវភេទ និងការយល់ព្រមពីឪពុកម្ដាយឱ្យកូនធ្វើម៉ូដែល ក៏ជាឧបសគ្គធំមួយក្នុងប្រទេសដ៏អភិរក្សអ៊ិស្លាមមួយនេះផងដែរ។
យោងតាម អ្នកនាង អែលឌីប បានឱ្យដឹងថា ឪពុកម្ដាយដ៏ច្រើនលើសលប់បារម្ភថា រូបភាពកូនស្រីរបស់ខ្លួននឹងត្រូវបានប្រើលើផ្លូវខុសតាមអនឡាញ។ នៅមានក្ដី កង្វល់ជាច្រើនទៀតអំពីការស្លៀកពាក់លេចលើលេចក្រោម ក៏ដូចជាធ្វើការគ្មានម៉ោងកំណត់ច្បាស់លាស់សម្រាប់នារីៗវ័យក្មេងទាំងនោះ។
កញ្ញាបានបន្ថែមថា៖ «មិនថាអាជីពការងារអីនោះទេ ឪពុកម្ដាយតែងតែព្យាយាមសម្រេចិត្ដជំនួសកូនស្រី»។
ដំណឹងល្អពីភាពប្រសើរឡើងក្នុងវិស័យនេះ គឺថា យោងតាមវេបសាយជំនាញខាងហ្វាសសិន The Fashion Spot «តារាម៉ូដែលចម្រុះពណ៌សម្បុរ» មានចំនួនជាង ៤៣ ភាគរយ ក្នុងការបង្ហាញម៉ូដរដូវស្លឹកឈើជ្រុះជាសកលលោកក្នុងឆ្នាំ ២០២១ ដែលធ្វើឱ្យវាជាឆ្នាំដែលមានភាពចម្រុះជាតិសាសន៍បំផុតក្នុងប្រវត្ដិសាស្ដ្រ៕ AFP/HR
ម៉ូដែលអេហ្ស៊ីប ម៉ារៀម អាប់ដាល់ឡាស នៅក្នុងស្ទូឌីយូ UNN Model Management។ AFP
