ភ្នំពេញ: ដំណើរកម្សាន្តជុំវិញអាស៊ីអាគ្នេយ៍ជាមួយនឹងម៉ូតូជាង ១ ទសវត្សរ៍មុន បានធ្វើឱ្យលោក ថូនី ហ្គៀរ៉ាត (Tony Geeraerts) និងបងប្អូនរបស់លោក ជីមមី បានចាប់អារម្មណ៍នឹងប្រជាជន ក៏ដូចជាវប្បធម៌កម្ពុជា រហូតឈានដល់ការបង្កើតអង្គការរួមចំណែកជួយប្រទេសដែលស្ថិតក្នុងចិត្តរបស់លោកមួយនេះ។
លោក ថូនី ហ្គៀរ៉ាត បានប្រាប់ ភ្នំពេញ ប៉ុស្តិ៍ថា៖ «ធ្វើដំណើរជុំវិញទីជនបទរបស់កម្ពុជា ខ្ញុំបានឃើញពីការរស់នៅលំបាកវេទនារបស់គ្រួសារជាច្រើន។ ហើយដោយសារស្ថានភាពនេះ ពួកគេបានបង្ខំចិត្តធ្វើចំណាកស្រុក ហើយកូនៗត្រូវបានទុកចោលជាញឹកញាប់»។
លោកបន្តថា៖ «ក្មេងៗខ្លះគឺត្រូវទុកចោលទាំងស្រុង។ យើងមិនអាចបំភ្លេចបទពិសោធលើកនោះបានទេ ដូច្នេះបន្ទាប់ពីត្រឡប់មកវិញជាច្រើនដង យើងក៏សម្រេចចិត្តបង្កើតអង្គការ Little Hearts នៅឆ្នាំ ២០០៩ ដើម្បីជួយក្មេងនៅតាមផ្លូវ»។
Little Hearts (LHO) ជាអង្គការបានបើកដំបូងនៅខែឧសភា ឆ្នាំ ២០០៩ នៅអគារសាលារៀនដែលគេទុកចោលមួយនៅឯជាយក្រុង ដោយមានសហស្ថាបនិកលោក ថូនី លោក ឌីមីទ្រី ស៊ីយើ និងលោក ចូ អហ្វីស៊ឺ។
ក្រោយមកក្រុមប្រឹក្សាភិបាលអង្គការបានសម្រេចចិត្តទិញដីមួយកន្លែងនៅក្នុងភូមិក្រៅក្រុង ដើម្បីសាងសង់ទីតាំងថ្មី និងបានបើកដំណើរការនៅឆ្នាំ ២០១៣។ ពេលនោះហើយដែលលោក ថូនី សម្រេចចិត្តផ្លាស់ពីបែលហ្ស៊ិកមកភ្នំពេញ ដើម្បីគ្រប់គ្រងការងារនៅអង្គការផ្ទាល់តែម្ដង។
ស្ថាបនិក និងអ្នកគ្រប់គ្រង LHO បានបន្តថា៖ «យើងផ្ដោតលើការជួយសង្គ្រោះកុមារត្រូវគេបោះបង់ និងកុមារកំព្រា។ ខ្ញុំជឿជាក់ថា កុមារគ្រប់រូបសមនឹងទទួលបានបរិយាកាសសុវត្ថិភាព ការអប់រំ និងឱកាសសម្រាប់អនាគតភ្លឺស្វាង»។
ក្រោមបេសកកម្មផ្ដល់ការអប់រំទៅដល់កុមារត្រូវបានបោះបង់ចោល និងជួយទៅដល់គ្រួសារក្រីក្រ ថ្មីៗនេះអង្គការបានធ្វើ យុទ្ធនាការសប្បុរសធម៌ទូទៅ (Random Acts of Kindness) របស់ខ្លួនជាលើកទី២ កាលពីថ្ងៃទី ២៥ ខែកញ្ញា នៅភូមិវិហារសូគ៌ត្បូង ខេត្តកណ្ដាល បន្ទាប់ពីទទួលបានជោគជ័យ មានការគាំទ្រ និងអាចជួយប្រជាជនបានច្រើនជាងកាលពីលើកដំបូង។
បន្ថែមពីលើការផ្តល់ការអប់រំដែលមានគុណភាព ផ្ទះប្រកបដោយក្តីស្រឡាញ់ និងថ្នាក់ភាសាអង់គ្លេសអនឡាញដោយឥតគិតថ្លៃដល់កុមារទាំងអស់ក្នុងភូមិនៅអរិយក្សត្រ អង្គការក៏បានផ្ដល់នូវការមើលថែ និងវត្ថុចាំបាច់ ដូចជាការស្លៀកពាក់ផងដែរ។
អង្គការធ្លាប់ទទួលបានមូលនិធិភាគច្រើនពីបែលហ្ស៊ិក ប៉ុន្តែដោយសារការរីករាលដាលនៃជំងឺកូវីដ ១៩ ជំនួយបានធ្លាក់ចុះ ដែលនាំឱ្យមានការអង្គាសប្រាក់ក្នុងស្រុក និងអន្តរជាតិ ក្នុងចំណែកតិចតួចតាមលទ្ធភាព។
នៅពេលឃើញភូមិជិតៗជួបការលំបាកដោយសារវិបត្តិកូវីដ ១៩ ដែលប៉ះពាល់ដល់ទីផ្សារការងារដូចជារោងចក្រកាត់ដេរ អង្គការបានបង្កើតយុទ្ធនាការសប្បុរសធម៌ទូទៅ ដើម្បីបណ្តុះស្មារតីការផ្តល់ និងលើកទឹកចិត្តអ្នកដទៃ។
លោក ថូនី បាននិយាយថា៖ «លើកទី១ យើងមានលទ្ធភាពប្រគល់កញ្ចប់អាហារ ភួយ និងសម្ភារចាំបាច់ផ្សេងទៀតដល់អ្នកធាក់ស៊ីក្លូ និងអ្នករត់រ៉ឺម៉ក នៅកណ្តាលរាជធានីភ្នំពេញ។ លើកទី២ យើងបានសម្របសម្រួល និងផ្តល់កញ្ចប់ស្បៀងអាហារដល់គ្រួសារដែលជួបការលំបាក និងក្រីក្រជាង ១៣០ គ្រួសារ»។
លោកបន្តថា៖ «មូលនិធិទទួលបានពីអ្នកបរិច្ចាគយុទ្ធនាការលើកទី១ ត្រូវប្រើសម្រាប់ចែកចាយ និងរៀបចំជាកញ្ចប់បូករួមទាំងអង្ករ ២០ គីឡូ, មី ១ កេស, ទឹកត្រី និងទឹកស៊ីអ៊ីវ»។
រំឭកឡើងវិញអំពីដំណើរការរបស់យុទ្ធនាការលើកទី២ លោក ថូនី ថាអង្គការបានធ្វើការសហការយ៉ាងជិតស្និទ្ធជាមួយអាជ្ញាធរភូមិ ដើម្បីជ្រើសរើសគ្រួសារងាយរងគ្រោះ និងខ្វះខាតបំផុតនៅភូមិវិហារសួគ៌ត្បូង។
លោក ថូនី ថា នៅមានអ្នកខ្វះខាតជាច្រើនទៀត ប៉ុន្តែវាជាជំហានដំបូងក្នុងទិសដៅត្រឹមត្រូវដោយសារមានការគាំទ្រយ៉ាងច្រើនពីម្ចាស់ឧបត្ថម្ភ និងដៃគូសំខាន់ៗ។ ការធ្វើឱ្យជីវិតអ្នកដទៃប្រសើរឡើងតែងតែជាគោលដៅរបស់អង្គការ ប៉ុន្តែវាក៏ជួយបង្កើតស្មារតីវិជ្ជមានដល់សហគមន៍ផងដែរ។
ស្ថាបនិកអង្គការឱ្យដឹងដែរថា នឹងបន្តយុទ្ធនាការសប្បុរសធម៌ទូទៅលើកទី៣ ទៀត ដែលអាហារនឹងនៅតែបន្តចែកតែ ក៏នឹងមានបញ្ចូលសម្ភារប្រើប្រាស់ក្នុងផ្ទះ ឬសម្លៀកបំពាក់ផងដែរ។
លោក ថូនី ប្រាប់ពីអារម្មណ៍រីករាយ និងរំពឹងថា៖ «យើងពិតជាមានអំណរដែលមានការចូលរួមពីបងប្អូន។ យើងសង្ឃឹមថា អំណោយតិចតួចរបស់យើង ទោះមិនជួយបានច្រើន តែជាកម្លាំងឱ្យគាត់ដឹងថា ពួកគាត់មិនត្រូវបានបំភ្លេច ហើយនឹងអាចក្រោកឈរបន្ទាប់ពីស្ថានភាពកូវីដប្រសើរឡើង»។
លោកបានឱ្យដឹងថា គម្រោងបន្តរបស់អង្គការគឺបង្កើត «ធនាគារម្ហូប» ដែលកំពុងស្ថិតក្នុងដំណាក់កាលចាប់ផ្ដើម។ អង្គការគ្រោងនឹងរៀបចំអាហារមូលដ្ឋាន ដែលមានជីវជាតិសម្រាប់មនុស្ស ដែលទាមទាររបបទទួលទានលើសពីបំពេញក្រពះនឹងអាហារទូទៅ។ មួយទៀតគឺអង្គការធ្វើការផ្ដោតលើបរិស្ថាន និងសត្វផុតពូជដែលមានសារៈសំខាន់ណាស់សម្រាប់ក្មេងៗជំនាន់ក្រោយ។
សម្រាប់ការឧបត្ថម្ភ និងការចូលរួមជាដៃគូ លោក ថូនី ហ្កៀរ៉ាត អាចទំនាក់ទំនងតាមរយៈ tony@lho.ngo ឬចូលទៅកាន់វេបសាយអង្គការ www.lho.ngo៕