ភ្នំពេញៈ ការប្រកួតកញ្ញាឯកចក្កវាឡកម្ពុជា ប្រចាំឆ្នាំ ២០២១ នឹងរកឃើញស្រីស្អាតជាម្ចាស់ជយលាភីនៅថ្ងៃទី ២៨ ខែ តុលា ឆ្នាំ ២០២១ នេះ ដោយមានការផ្សាយផ្ទាល់នៅប៉ុស្តិ៍ទូរទស្សន៍បាយ័ន និងតាមគេហទំព័រ Miss Universe Cambodia ខណៈកម្មវិធីប្រកួតទើបតែបានឆ្លងកាត់នូវវគ្គប្រកួតបឋម កាលពីចុងសប្តាហ៍កន្លងមក។
ការប្រកួតបឋម (Preliminary Competition) នៃកម្មវិធីប្រកួតកញ្ញាឯកចក្កវាឡកម្ពុជាឆ្នាំ ២០២១ (Miss Universe Cambodia 2021) ដែលបានបញ្ចប់កាលពីថ្ងៃទី ២៣ ខែ តុលា ឆ្នាំ ២០២១ ដោយមានការបង្ហាញឈុតហែលទឹក ការបង្ហាញរ៉ូបរាត្រីសមោសរ ការបង្ហាញពីឈុតតំណាងជាតិ ការប្រគល់ពានរង្វាន់ ពិសេសដល់បេក្ខនារីឆ្នើម និងសមាសភាពក្រុមគណ:កម្មការផ្តល់ពិន្ទុវគ្គប្រកួតបឋមនេះផងដែរ។
អ្វីដែលមហាជននិយមតាមដាននៅក្នុងពិភពប្រកួតប្រជែងសម្ផស្សរបស់បេក្ខនារីដ៏ស្រស់សោភា ចូលរួមប្រកួតក្នុងឆ្នាំនីមួយៗនោះ គឺចាប់ពីវគ្គប្រកួតបឋមនេះទៅ ហើយការប្រកួតឆ្នាំនេះ បេក្ខនារីជាប់ជម្រុះចុងក្រោយចំនួន ១៩ រូប (Top19) សុទ្ធតែមានការច្នៃ និងរចនាម៉ូដ សម្លៀកបំពាក់ឈុតតំណាងប្រពៃណីជាតិរបស់អ្នកច្នៃម៉ូដឆ្នើមៗ ឱ្យបេក្ខនារីដែលគ្រងឈុតទាំង ១៩ រូប ទៀតផង។
ប្រភពពីគេហទំព័រផ្លូវការ Miss Universe Cambodia បរិយាយឱ្យដឹងថា កញ្ញា ខុន លីណា ពាក់ស្លាកលេខ ១៩ គ្រងឈុត «ត្នោតកេរដូនតាខ្មែរ» កញ្ញា អោម ប្រាថ្នា ពាក់ស្លាកលេខ ១៨ គ្រងឈុត «រាជិនីនាគធារាវត្តី» កញ្ញា មឿង បណ្ឌិតបរមី ពាក់ស្លាកលេខ ១៧ គ្រងឈុត «បុប្ផជាតិនារី» កញ្ញា រិ ស្រីមុំ ពាក់ស្លាកលេខ ១៦ គ្រងឈុត «ទេវីចម្បាំងអាណាចក្រមហិន្ទ្របព៌ត» កញ្ញា ងិន ម៉ារ៉ាឌី ពាក់ស្លាកលេខ ១៥ គ្រងឈុត «រាជជ័យាសិរីសួគ៌ឋាន» កញ្ញា ហ៊ុន ហ្គេកឡាង ពាក់ស្លាកលេខ ១៤ គ្រងឈុត «ព្រះធីតាក្សត្រីវង្សភក្ត្រក្រពុំឈូក» កញ្ញា សុង សុភ័ក្រ ពាក់ស្លាកលេខ ១៣ គ្រងឈុត «វប្បការិកាចត្វានិមិត្ត» កញ្ញា វៃ ដានី ពាក់ស្លាកលេខ ១២ គ្រងឈុត «រទេះ ឬរាជរថព័ទ្ធធាតុទាំង ៤» កញ្ញា រិទ្ធ នីសា ពាក់ស្លាកលេខ ១១ គ្រងឈុត «រាត្រីធីតាក្រឡានខ្មែរ» កញ្ញា គិត អេលែន ពាក់ស្លាកលេខ ១០ គ្រងឈុត «នាងសុវណ្ណមច្ឆា» កញ្ញា ខុន អេននី ពាក់ស្លាកលេខ ៩ គ្រងឈុត «ពិជ័យបុរៈឯករាជៈ គ្រុឌមហិង្សៈនាគវ័ន» កញ្ញា សុង សោភា ពាក់ស្លាកលេខ ៨ គ្រងឈុត «គោព្រៃកម្ពុជា» កញ្ញា ពក ស្រីល័ក្ខ ពាក់ស្លាកលេខ ៧ គ្រងឈុត «ព្រះស្រីទេវអច្ឆរិយបរមវិស្ណុលោក» កញ្ញា សុខ ចិន្តា ពាក់ស្លាកលេខ ៦ គ្រងឈុត «នាងមេស្មឹង» កញ្ញា ឆន ស្រីណេត ពាក់ស្លាកលេខ ៥ គ្រងឈុត «ពន្លឺសង្ឃឹមក្រោមនឹមអសុរិន្ទ» កញ្ញា ព្រំ ស្រីនាត ពាក់ស្លាកលេខ ៤ គ្រងឈុត «នាងសុបនខា» កញ្ញា ឡូយ ច័ន្ទរស្មី ពាក់ស្លាកលេខ ៣ គ្រងឈុត «វីរនារីចម្បាំង» កញ្ញា សារី ស្រីពេជ្រ ពាក់ស្លាកលេខ ២ គ្រងឈុត «នាងអគ្គី» និងកញ្ញា ស៊ីម ម៉ាហ្គារ៉ែតពេជ្រចរណៃ ពាក់ស្លាកលេខ ១ គ្រងឈុត «បរមរាជទេវីចតុមង្គល»។
គួរបញ្ជាក់ដែរ កញ្ញា រ៉េត សារីតា ជាម្ចាស់មកុដកញ្ញាឯកចក្កវាឡកម្ពុជា ឆ្នាំ ២០២០ តំណាងឱ្យកម្ពុជា ចូលរួមការប្រកួតអន្តរជាតិ ធ្វើនៅសណ្ឋាគារ និងកាស៊ីណូ ហូលីវូដ Seminole Hard Rock រដ្ឋហ្វ្លរីដា បានបញ្ចប់កាលពីខែឧសភា ឆ្នាំ ២០២១៕