ភ្នំពេញ: ស្ថិតនៅក្នុងសាលនៃសារមន្ទីរជាតិ រាជធានីភ្នំពេញ ស្នាដៃចម្លាក់ រូបថត រូបគំនូរ គ្រឿងអលង្ការ វីដេអូខ្លីៗ ដែលឆ្លុះបញ្ចាំងពីបទពិសោធនៃការធ្វើដំណើរឆ្លងទ្វីប ជីវភាពរស់នៅប្រចាំថ្ងៃ សាមគ្គីភាព ឥទ្ធិពលគំនិតនៃសិល្បករមកពីទ្វីបទាំង ២ និងចំណងមិត្តភាពលើវិស័យវប្បធម៌នៃបណ្ដាប្រទេសក្នុងទ្វីបអាស៊ី និងអឺរ៉ុប ត្រូវបានដាក់តាំងបង្ហាញជូនសាធារណជនចូលទស្សនារហូតដំណាច់ឆ្នាំ ២០២១។
ក្នុងចំណោមម្ចាស់ស្នាដៃជាច្រើនរូបមកពីបណ្ដាប្រទេសនៅអាស៊ី និងអឺរ៉ុប អ្នកនាង ឡូលី ផាក មកពីកូរ៉េខាងត្បូង និងអ្នកនាង អូលីវៀ ហូហ្គ មកពីអង់គ្លេស សុទ្ធសឹងតែជាសិល្បការិនី ដែលកំពុងបំពេញក្ដីសុបិនរបស់ខ្លួនលើវិថីសិល្បៈនៅកម្ពុជាអស់ជាច្រើនឆ្នាំ។
ក្នុងពិព័រណ៍សិល្ប:មហោស្រពវប្បធម៌អាស៊ី និងអឺរ៉ុប ២០២១ អ្នកនាង ឡូលី និង អូលីវៀ បានប្រើជំនាញសិល្បៈទម្រង់ខុសគ្នា ដើម្បីរំលេចជាស្នាដៃរួមមួយ សម្រាប់ការតាំងបង្ហាញ Sahaka playground នៅសារមន្ទីរជាតិ។
អង្គុយក្បែរដៃគូសហការមកពីអង់គ្លេស សិល្បការិនីមកពីកូរ៉េខាងត្បូងអ្នកនាង ឡូលី បានបង្ហាញចំណាប់អារម្មណ៍ក្នុងវីដេអូបណ្ដាញសង្គមយូធូបថា៖ «ខ្ញុំជាអ្នកជំនាញគូរ និងបានរស់នៅកម្ពុជាយូរក្រែលដែរ។ នេះជាលើកទី១ ហើយដែលខ្ញុំធ្វើកិច្ចការជាមួយអ្នកសិល្បៈដទៃទៀត។ វាជារឿងថ្មីសម្រាប់ខ្ញុំ តែក៏ជាបទពិសោធមួយដ៏អស្ចារ្យសម្រាប់ខ្ញុំ»។
រីឯ អូលីវៀ ជាសិល្បការិនីអង់គ្លេសផ្នែកដេរប៉ាក់ ដែលបានរស់នៅប្រទេសកម្ពុជាជាង ៦ ឆ្នាំ ក៏បានលើកឡើងផងដែរថា៖ «ខ្ញុំទទួលឥទ្ធិពលច្រើនពីវប្បធម៌សិល្បៈ ហ្វេស្សិន និងអាហារនៅអាស៊ី។ ខ្ញុំពិតជារីករាយណាស់ដែលបានសហការជាមួយសិល្បករទាំងនៅអាស៊ី និងអឺរ៉ុប»។
ពិព័រណ៍សិល្ប:មហោស្រពវប្បធម៌អាស៊ី និងអឺរ៉ុប ២០២១ នៅសារមន្ទីរជាតិកម្ពុជា ពីថ្ងៃទី ២២ ខែវិច្ឆិកា ដល់ ថ្ងៃទី ៣១ ខែ ធ្នូ ឆ្នាំ ២០២២ ត្រូវបានរៀបចំឡើងដោយក្រសួងវប្បធម៌ និងវិចិត្រសិល្បៈ សហការជាមួយសហភាពអឺរ៉ុប និងមូលនិធិអាស៊ី-អឺរ៉ុប ដើម្បីចូលរួមអបអរសាទរកិច្ចប្រជុំកំពូលអាស៊ី-អឺរ៉ុបលើកទី១៣ រៀបចំដោយព្រះរាជាណាចក្រ-កម្ពុជា ធ្វើជាម្ចាស់ផ្ទះ និងប្រព្រឹត្តទៅនៅថ្ងៃទី ២៥-២៦ ខែវិច្ឆិកានេះ។
ពិព័រណ៍នេះបង្ហាញពីភាពសម្បូរបែប និងគំនិតច្នៃប្រឌិតដ៏អស្ចារ្យពីបណ្ដាប្រទេសនានានៃទ្វីបទាំង ២ ក្រោមប្រធានបទធំៗចំនួន ៦ គឺ៖ Happy Head, Sahaka playground, Encountering culture, The longest voyage, Thing that count, II Nodo: A sketch of hope។
ភាពចម្រុះនៃវប្បធម៌អាស៊ីនិងអឺរ៉ុប ត្រូវបានប្រារព្ធឡើងនៅក្នុងមហោស្រពនេះ ជាមួយនឹងការសម្តែងសិល្បៈទស្សនីយភាពសិល្បៈចម្រុះច្រើនទម្រង់ ការប្រគំតន្ត្រីខ្នាតធំ របាំបុរាណ របាំប្រពៃណី របាំសហសម័យ មហោស្រពភាពយន្ត ការតាំងពិព័រណ៍រូបថត និងស្នាដៃសិល្បៈ ការចាក់បញ្ចាំងខ្សែភាពយន្ត និងកិច្ចពិភាក្សា ក្នុងគោលបំណងជំរុញទំនាក់ទំនងរវាងពលរដ្ឋឆ្លងទ្វីប ការចែករំលែកបទពិសោធ និងការយល់ដឹងអំពីភាពផ្សេងៗគ្នានៃវប្បធម៌ ដែលនាំមកនូវសុខដុមភាព ការអភិវឌ្ឍ និងកិច្ចសន្ទនា កាន់តែប្រសើរឡើងរវាងទ្វីបទាំង ២។
ក្រៅពីការតាំងបង្ហាញនៅសារមន្ទីរជាតិផ្ទាល់ រយៈពេល ៥ ថ្ងៃ ពី ២២ ដល់ ២៦ វិច្ឆិកា នៃមហោស្រពព្រឹត្តិការណ៍សិល្បៈតំណាងឱ្យដៃគូអាស៊ីអឺរ៉ុបជាង ២០ នេះ ក៏មានកម្មវិធីអនឡាញរួមមាន ការសម្តែងរបាំ និងល្ខោន ការប្រគំតន្ត្រី សិល្បៈសូនរូប ការតាំងពិព័រណ៍ និងវេទិកាពិភាក្សាជាមួយសិល្បករ នឹងត្រូវបានបង្ហាញជាផ្លូវការលើគេហទំព័រ ASEMculturalfestival.com។
អ្នកនាង ខាមីនី រ៉ាម៉ាឆាន់ដ្រា មកពីសិង្ហបុរី ជាសិល្បករជំនាញតំណាលរឿង បានចូលរួមបង្ហាញស្នាដៃរបស់នាងដែលមានឈ្មោះថា «រឿងព្រេងនិទាននៃឆ្នេរសមុទ្រ២» (The Tale of Two Shores)។
ទស្សនិកជនជិតឆ្ងាយក៏អាចទស្សនាការបង្ហាញស្នាដៃនាងលើវេបសាយ ក្នុងកាលវិភាគចន្លោះថ្ងៃទី ២២ ដល់ ២៦ វិច្ឆិកា ត្រូវបានគាំទ្រដោយក្រសួងវប្បធម៌ សហគមន៍ និងយុវជនសិង្ហបុរី និងក្រុមប្រឹក្សាសិល្បៈជាតិសិង្ហបុរី។
សម្ដែងចំណាប់អារម្មណ៍ពីឱកាសចូលរួមបង្ហាញស្នាដៃក្នុងពិព័រណ៍សិល្ប:មហោស្រពវប្បធម៌អាស៊ី និងអឺរ៉ុប ២០២១ អ្នកជំនាញផលិតរឿងនិទានរូបនេះបាននិយាយថា៖ «រឿងតំណាល រឿងនិទានក្នុងវប្បធម៌ជនជាតិអាស៊ី និងអឺរ៉ុប មានភាពស្រដៀងគ្នាណាស់»។
វេទិកានេះផ្ដល់ឱកាសស្វែងយល់ពីភាពមិនសូវខុសគ្នារវាងជាតិសាសន៍ និងជំរុញមនុសុ្សជាតិបង្កើតទំនាក់ទំនង និងពង្រឹងភាពស្និទ្ធស្នាលរវាងគ្នាបង្កើតសហគមន៍ឥតព្រំដែន។
អ្នកនាង ខាមីនី បន្តទៀតថា៖ «រឿងនិទានទាំងអស់នេះរំឭកយើងពីទំនាក់ទំនងដ៏យូរលង់រវាងអាស៊ី និងអឺរ៉ុប ដែលផ្សារភ្ជាប់មនុស្ស មិនថាពួកគេមកពីទីណានោះទេ»។
ពិព័រណ៍សិល្ប:មហោស្រពវប្បធម៌អាស៊ី និងអឺរ៉ុប ២០២១ នៅសារមន្ទីរជាតិ ស្វាគមន៍អ្នកចូលទស្សនាឥតគិតថ្លៃ រហូតដល់ថ្ងៃទី ៣១ ខែធ្នូ៕