ភ្នំពេញៈ បើទោះបីរាងចាស់វស្សា នៅលើវិថីសិល្បៈមែនក្តី ក៏សូរសៀងនៃទឹកដមសំនៀងកំពូលតារាចម្រៀងស្រីនៅហង្សមាស នៅតែអាចស្រូបបានប្រជាប្រិយភាពច្រើន ពីប្រិយមិត្តអ្នកស្តាប់ដូចមុន ខណៈអ្នកនាង ពេជ្រ សោភា ក៏ទើបតែទទួលបាននូវលិខិតសរសើរពីកម្មវិធី Pleng ចំពោះសមិទ្ធផលនៃស្នាដៃសិល្បៈតន្ត្រី មានអ្នកគាំទ្រច្រើនជាង ៥ លានដង។
ក្រុមហ៊ុនស្មាតតាមរយៈលោក ផន ពិសិដ្ឋ ជាប្រធានផ្នែកទីផ្សារ និងតន្ត្រីនៃក្រុមហ៊ុន បានចេញលិខិតអបអរសាទរ និងសរសើរជូនដល់តារាចម្រៀងស្រី ពេជ្រ សោភា ផងដែរ ដោយន័យសេចក្តីនោះ លើកឡើងថា៖ «Pleng By Smart សូមអបអរសាទរ ដែលអ្នកទទួលបានការស្តាប់ច្រើនជាង ៥ លានដង នៅក្នុងកម្មវិធី Pleng! ទោះបីជាយើងទាំងអស់គ្នា ស្ថិតក្នុងអំឡុងពេលដ៏លំបាកនេះក៏ដោយ អ្នកនៅតែសម្រេចបាននូវសមិទ្ធផលដ៏ពិសេសជាមួយ Pleng By Smart។ កម្មវិធី Pleng ពិតជាមានកិត្តិយសជាខ្លាំង ក្នុងការប្រគល់ Pleng Icon Black Plaque ដើម្បីបង្ហាញពីការកោតសរសើរស្នាដៃ និងការខំប្រឹងប្រែងរបស់អ្នកក្នុងការបង្កើតបទចម្រៀងជាច្រើន សម្រាប់ឱ្យអ្នកគាំទ្រទាំងអស់បានស្តាប់កម្សាន្ត។ Pleng ពិតជាមានមោទនភាពចំពោះអ្នក ហើយយើងសូមជូនពរឱ្យអ្នកទទួលបានភាពជោគជ័យ ជាបន្តបន្ទាប់ទៀតពេលខាងមុខ»។
ប្រភពដដែលបានបន្តថា៖ «ក្នុងនាមជាសិល្បការិនី ១ រូប អ្នកតែងតែចូលរួមជួយលើកស្ទួយវិស័យតន្ត្រី ក្នុងស្រុករបស់យើងឱ្យ មានការអភិវឌ្ឍឆ្ពោះ ទៅមុខជានិច្ច ដោយសារតែទឹកចិត្តស្រឡាញ់ ការប្តេជ្ញាចិត្ត ក៏ដូចជាការលះបង់របស់អ្នកកន្លងមកបានក្លាយជាផ្នែកមួយ ក្នុងការលើកទឹកចិត្តដល់យុវជនជំនាន់ក្រោយ ដែលមានទេពកោសល្យឱ្យខិតខំពង្រីកសមត្ថភាពខ្លួន ក្នុងវិស័យតន្ត្រីនៅប្រទេសកម្ពុជាផងដែរ»។
ជាក់ស្តែង នាពេលថ្មីៗនេះ ទិដ្ឋភាពប្រាសាទព្រះវិហារ អង្គរវត្តប្រាសាទបាយ័ន ល្ខោនខោល ឧបករណ៍តន្ត្រីបុរាណ ចាប៉ីដងវែង ការបណ្ដែតប្រទីប និងសម្លៀកបំពាក់ប្រពៃណីខ្មែរ ត្រូវបានរំលេច និងឃើញមានគ្រប់ឈុតឆាកទាំងអស់ក្នុងវីដេអូនៃបទចម្រៀងរបស់អ្នកនាង ពេជ្រ សោភា ដែលមានចំណងជើង «ទ្វារបេះដូង» ដែលជាការនិពន្ធនូវទំនុកច្រៀង ទំនុកភ្លេង និងបង្ហើរសំនៀង ដោយអ្នកនាង ពេជ្រ សោភា ផ្ទាល់តែម្ដង។
នាពេលសម្ពោធវីដេអូចម្រៀងថ្មីទើបតែចេញក្ដៅៗ តារាចម្រៀងជើងចាស់ប្រចាំទ្រនំហង្សមាសរូបនេះ បង្ហាញពីចំណាប់អារម្មណ៍ថា៖ «តាមពិតខ្ញុំស្រឡាញ់ MV នេះណាស់ អរគុណខ្លួនឯង នៅថ្ងៃក្រោយ បានចងចាំថាធ្លាប់ធ្វើ MV និយាយអំពីអ្វីដែលខ្មែរមាន»។
បន្ថែមពីនេះ ពេជ្រ សោភា ក៏បន្ថែមសំណេរភ្ជាប់វីដេអូចម្រៀងថ្មីខ្លួនថា៖ «មានស្រឡាញ់ខ្ញុំ នៅពេលនេះមើលថែខ្ញុំ នៅពេលនេះហេតុអ្វីទុកឱ្យខ្ញុំឯកាបែបនេះ អ្នកធ្លាប់ស្រឡាញ់ខ្ញុំទេ? ដឹងទេមានគេចង់យកខ្ញុំចេញពីអ្នកហើយ»៕