សមាជិកនៃកងវរសេនាតូចសន្តិសុខទេសចរណ៍ដែលទើបបង្កើតថ្មី នៅទីក្រុងខាងឃូនប្រទេសម៉ិកស៊ិកកាលពីថ្ងៃទី ២ ខែធ្នូឆ្នាំ ២០២១។ AFP
.jpg)
ក្រុងខាងឃូន៖ ស្ថិតនៅលើឆ្នេរទេសចរណ៍ ដែលពោរពេញដោយភ្ញៀវបុរសស្លៀកខោខ្លី និងនារីស្លៀកប៊ីគីនីត្រៀមចុះទឹកសមុទ្រពណ៌ខៀវថ្លា កងកម្លាំងក្នុងឯកសណ្ឋានហំហួនមានពាក់ម៉ាស់ និងកាន់កាំភ្លើង បានដើរល្បាតទាំងកណ្ដាលថ្ងៃ។
ប្រទេសម៉ិកស៊ិកបានសន្យាថានឹងបង្កើត«កងវរសេនាតូចទេសចរណ៍»ពីចំណោមនគរបាលឆ្មាំជាតិចំនួន ១ ៥០០ រូប ដើម្បីការពារឆ្នេរខារីបៀនដ៏ពេញនិយមរបស់ខ្លួននៅទីក្រុងខាងឃូន និងធូលូមពីសកម្មភាពឧក្រិដ្ឋកម្ម។
ក្រុងធូលូមគឺជាកន្លែងកើតហេតុការណ៍បាញ់ប្រហារមួយ ដែលបានសម្លាប់អ្នកទេសចរវ័យក្មេង២នាក់កាលពីខែតុលា។ ជនរងគ្រោះម្នាក់មកពីប្រទេសអាល្លឺម៉ង់ និងម្នាក់ទៀតមកពីប្រទេសឥណ្ឌា ព្រមទាំងអ្នកទេសចរ ៣ នាក់ទៀតរងរបួស។
កាលពីខែវិច្ឆិកាការបាញ់ប្រហារនៅទីក្រុងព័រតូ ម៉ូរ៉េឡូសជិតទីក្រុងខាងឃូន ដែលត្រូវបានចោទប្រកាន់ថាជាហិង្សាវិវាទគ្នារវាងក្រុមក្មេងទំនើង និងបានធ្វើឱ្យជនសង្ស័យជួញដូរគ្រឿងញៀន ២ នាក់ស្លាប់និងបង្កឱ្យមានការភ័យស្លន់ស្លោនៅក្នុងសណ្ឋាគារដែលពោរពេញទៅដោយអ្នកទេសចរ។
ម៉ិកស៊ិកបានបង្កើតកងវរសេនាតូចទេសចរណ៍ នៃឆ្នាំនគរបាលជាតិ១៥០០រូបដើម្បីការពារឆ្នេខារីបៀន។ AFP
លោកប្រធានាធិបតី អេនដ្រេស ម៉ានូអែល ឡូប៉េស អូប្រាដ័រ បាននិយាយនៅក្នុងសន្និសីទសារព័ត៌មានថា៖ «រឿងនេះមិនអាចកើតឡើងម្តងទៀតបានទេ» ដោយបន្ថែមថាកងវរសេនាតូចការពារទេសចរនេះនឹង «ពង្រឹងសន្តិសុខ» ឱ្យបានល្អបំផុត។
រដ្ឋមន្ត្រីការពារជាតិ ល្វីស ក្រេស្សេនស្យូ សេនដូវ៉ល បាននិយាយថា អង្គភាពថ្មីនេះបានចាប់ផ្តើមប្រតិបត្តិការនៅថ្ងៃទី ១ ខែធ្នូ នៅក្នុងតំបន់ដែលគេស្គាល់ថា រីវើរ៉ា ម៉ាយ៉ា ក្នុងរដ្ឋគ្វីថាណា រូ។
អាជ្ញាធរគ្រោងនឹងណែនាំកងវរសេនាតូចស្រដៀងគ្នានេះនៅតំបន់ទេសចរណ៍ផ្សេងៗទៀត។
ឧបទ្វីបរីវើរ៉ា ម៉ាយ៉ា និងយូខាថេន គឺជាតំបន់ទេសចរណ៍ដ៏សំខាន់នៅម៉ិកស៊ិកដែលជាប្រទេសមានភ្ញៀវទេសចរច្រើនបំផុតទី៧នៅលើពិភពលោក។
វិស័យទេសចរណ៍រួមចំណែកប្រមាណ ៨,៥ ភាគរយនៃផលិតផលក្នុងស្រុកសរុបរបស់ប្រទេសម៉ិកស៊ិក។
អំពើហិង្សានាពេលថ្មីៗនេះបានលាតត្រដាងភាពងងឹតនៃទីក្រុងធូលូមនិងរមណីយដ្ឋានម៉ិកស៊ិកផ្សេងទៀ តដែលរងគ្រោះដោយសង្គ្រាមរវាងក្រុមក្មេងទំនើង ជនអន្ធពាលពាក់ព័ន្ធនឹងការជួញដូរគ្រឿងញៀននិងជំរិតទារប្រាក់។
ចាប់តាំងពីឆ្នាំ ២០០៦ នៅពេលដែលរដ្ឋាភិបាលផ្តើមប្រតិបត្តិការយោធាប្រឆាំងគ្រឿងញៀនដ៏ចម្រូងចម្រាសរបស់ខ្លួនប្រទេសម៉ិកស៊ិកបានកត់ត្រាឃាតកម្មច្រើនជាង ៣០ ម៉ឺនករណីនេះបើយោងតាមតួលេខផ្លូវការ៕
កងកម្លាំងនៅលើឆ្នេរទេសចរណ៍ ដែលពោរពេញដោយភ្ញៀវបុរសស្លៀកខោខ្លី និងនារីស្លៀកប៊ីគីនីត្រៀមចុះទឹកសមុទ្រពណ៌ខៀវថ្លា។ AFP
