សិប្បករ វូ ដុង និងចម្លាក់ខ្លាមាសដុះស្លាបតំណាងឱ្យជ័យជម្នះ។ រូបថត AFP
.jpg)
ក្រុងហាណូយ: បើទោះជាសេដ្ឋកិច្ចវៀតណាមរងផលប៉ះពាល់ពីវិបត្តិកូវីដសកលក្ដី ក៏ពលរដ្ឋជាច្រើនហ៊ានចំណាយប្រាក់រាប់រយដុល្លារជាវចម្លាក់ខ្លាស្រោបមាស ជាអំណោយបុណ្យចូលឆ្នាំចន្ទគតិ ដែលនឹងមកដល់នៅដើមខែកុម្ភៈខាងមុខនេះ។
ឆ្នាំខាលដែលនឹងមកដល់នៅថ្ងៃទី ១ ខែកុម្ភៈ ធ្វើឱ្យមនុស្សម្នាជាច្រើនប្រមែប្រមូលលុយទិញចម្លាក់ខ្លាមាស នៅហាងលក់វត្ថុអនុស្សាវរីយ៍ក្រុងហាណូយ ក្នុងតម្លៃចាប់ពី ៣០០ រហូតដល់ ៣ ០០០ដុល្លារ។
ស្ថាបត្យករលោក ភាម ក្វាងដុក ដែលទើបតែទិញចម្លាក់ខ្លាមាសដុះស្លាបដើម្បីដាក់តាំងនៅផ្ទះលើករាសី បាននិយាយថា៖ «ខ្លាមាសនេះធ្វើឱ្យខ្ញុំមានអារម្មណ៍ថ្លៃថ្នូររុងរឿង»។
លោកបន្តទៀតថា៖ «ខ្លាមាសដុះស្លាបបង្ហាញក្ដីសង្ឃឹមនៃការងារខ្ញុំអាចហោះខ្ពស់ត្រដែត និងជោគជ័យក្នុងការមកដល់នៃឆ្នាំថ្មីនេះ»។
ឆ្នាំខ្លា ត្រូវបានពលរដ្ឋវៀតណាមជាច្រើនជឿថា ពោរពេញដោយថាមពល និងភាពរុងរឿង ហើយសិប្បករចម្លាក់ខ្លារឹតតែមមាញឹក និងផ្ចិតផ្ចង់ការងារនៅរោងជាងរបស់ពួកគេ។
សិប្បករ លោក វូ ដុង បាននិយាយពីចម្លាក់ខ្លាដុះស្លាបឥន្ទ្រីរបស់លោកថា៖ «ការរចនាចម្លាក់របស់ខ្ញុំមិនមែនបង្ហាញពីភាពកាចសាហាវរបស់សត្វនោះទេ ប៉ុន្តែវាតំណាងឱ្យកម្លាំងថាមពល អំណាច និងភាពរុងរឿងនៃការក្ដោបក្ដាប់ជ័យជម្នះ»។
កិច្ចការចម្លាក់ខ្លានីមួយៗទាមទារពេលវេលាច្រើនថ្ងៃក្នុងការលាបពណ៌ ស្រោបមាស ខាត់ ដែលប្រែក្លាយចម្លាក់ដីឥដ្ឋ និងលោហៈស្ពាន់ ទៅជាចម្លាក់ស្រោបមាសដ៏មានតម្លៃ។
លោក ឡាយ ហុយណាម សិប្បករនៅក្រុងហាណូយ បាននិយាយថា៖ «យើងត្រូវតែច្បាស់ថា ស្រទាប់មាសស្រោបគ្រប់កន្លុកកន្លៀតនៃចម្លាក់ខ្លា នឹងអាចគង់នៅស្ថិតស្ថេរបានយូរអង្វែង»៕ AFP/HR
