ខេត្តណាខនផាធុំ៖ អ្នកដាំផ្កាអ័រគីដេថៃដែលត្រូវនឿយហត់នឹងការថែទាំបុប្លាម្ដងរួច ទៅហើយបែរជាត្រូវខូចចិត្តម្ដងទៀត ខណៈសង្គ្រាមនៅអ៊ុយក្រែន ការផ្លាស់ប្តូរអាកាសធាតុ និងជំងឺរាតត្បាតបានប៉ះពាល់ ដល់ជីវភាពរស់នៅរបស់ពួកគេ។
ធ្លាប់ត្រូវបានចាត់ទុកថាជាល្បែងថែសួនកម្សាន្តដ៏ពេញនិយមក្នុងចំណោមអ្នកមានទ្រព្យស្ដុកនៅប្រទេសថៃ ការដាំផ្កាអ័រគីដេបានអភិវឌ្ឍទៅជាឧស្សាហកម្មតម្លៃរាប់លានដុល្លារ ហើយរាជាណាចក្រថៃគឺជាអ្នកផលិតនិងនាំចេញផ្កាអ័រគីដេពណ៌ស្វាយដ៏ធំបំផុតរបស់ពិភពលោក។
ប៉ុន្តែជំងឺរាតត្បាតបានធ្វើឱ្យកសិដ្ឋាន១ក្នុងចំណោមកសិដ្ឋានចំនួន៥បានបិទកាលពីពេលថ្មីៗនេ។ នេះបើយោងតាមសមាគមអ្នកនាំចេញអ័រគីដេថៃ។
សម្លឹងមើលដោយក្តីអស់សង្ឃឹមទៅកាន់វាលបុប្ផាពណ៌ស្វាយនៅឯកសិដ្ឋានផ្កាអ័រគីដេខាងលិចទីក្រុងបាងកកលោក ស៊ុមឆៃ ឡឺទ្រង់វីតាយ៉ាឆៃ បាននិយាយថា៖ «គ្មាននរណាម្នាក់មានអារម្មណ៍ទិញផ្កាទេហើយការដឹកជញ្ជូនរឹតតែមានភាពស្មុគស្មាញណាស់»។
លោកបានដាំផ្កាអ័រគីដេ Dendrobium Sonia ដែលជាពូជកូនកាត់ដែលមានផ្កាពណ៌ស និងពណ៌ស្វាយដិត។ ជាផ្កាពេញនិយមនៅក្នុងប្រទេសជប៉ុនចិននិងសហរដ្ឋអាមេរិក ពួកវាត្រូវបានគេប្រើស្ទើរតែគ្រប់កម្មវិធី រាប់តាំងពីពិធីសាសនារហូតដល់ការបញ្ចប់ការសិក្សានៅមហាវិទ្យាល័យ។
នៅឯដីទំហំ២០ហិកតារបស់លោក កម្មករបានរក្សាផ្កាដែលកាត់រួចដោយប្រើដបតូចមួយដែលមានជីវជាតិ និងសារធាតុចិញ្ចឹមដើម្បីរក្សារូបរាងដ៏ស្រស់របស់ផ្កា បានរហូតដល់ ២សប្តាហ៍។
ប៉ុន្តែពេលវេលាប៉ុន្មានឆ្នាំនេះលំបាកខ្លាំង។ លោក ស៊ុមឆៃ បានប្រើប្រាក់សន្សំរបស់លោកអស់រយៈពេល១ឆ្នាំ ដើម្បីបន្តផ្តល់ប្រាក់ខែដល់បុគ្គលិកចំនួន៥០នាក់របស់លោក។
លោកបាននិយាយថា Covid-19 និងការឈ្លានពានរបស់រុស្ស៊ីលើអ៊ុយក្រែនបានធ្វើឱ្យតម្លៃជី និងថ្នាំសម្លាប់សត្វល្អិតកើនឡើង ៣០ ភាគរយ។
បន្ថែមលើបញ្ហារបស់គាត់គឺការលក់ធ្លាក់ចុះយ៉ាងខ្លាំង។ មុនជំងឺរាតត្បាតប្រទេសចិនបានទិញដើមអ័រគីដេចំនួន ២៧០ លានដើម ក្នុង ១ ឆ្នាំពីប្រទេសថៃ ជាតួលេខដែលបានធ្លាក់ចុះដល់ ១៧០ លានកាលពីឆ្នាំមុន។
នៅពេលដែលមានចំនួន ៨០ ភាគរយនៃប្រាក់ចំណូលនាំចេញរបស់ លោក ស៊ុមឆៃ ប្រទេសចិន បានរងការវាយប្រហារដោយបិទខ្ទប់ការពារមេរោគឆ្លងនៅក្នុងទីក្រុងមួយចំនួន រួមទាំងទីក្រុងធំសៀងហៃ។
ការដឹកជញ្ជូនផ្កាអ័រគីដេទៅកាន់ទីផ្សារសំខាន់តាមដងផ្លូវធ្លាប់ចំណាយពេលដល់ទៅ៣ថ្ងៃ ប៉ុន្តែការធ្វើដំណើរដូចគ្នាឥឡូវនេះអាចចំណាយពេលពី ៨ ទៅ ១០ ថ្ងៃ។
នៅក្នុងអាជីវកម្មផ្កាពេលវេលាគឺជាលុយហើយផ្កាអ័រគីដេ ដែលស្រពោនត្រូវបានគេបោះចោលជាញឹកញាប់ មុនពេលដែលពួកវាអាចត្រូវលក់ចែកចាយទៅដល់ផ្ទះរបស់អតិថិជននៅទីក្រុងសៀងហៃ។
ពេលវេលាជិតអស់ហើយ
ខណៈពេលដែលលោកស៊ុមឆៃចែកចាយផលិតផលរបស់លោកដោយផ្ទាល់ទៅក្រៅប្រទេស អ្នកដាំផ្កាអ័រគីដេភាគច្រើននៅក្នុងប្រទេសថៃប្រើប្រាស់ក្រុមហ៊ុននាំចេញដ៏ធំដែលមានមូលដ្ឋាននៅទីក្រុងបាងកក។
លោក វុទ្ធីឆៃ ភីផាតមនោម៉ៃ អនុប្រធានសមាគមអ្នកនាំចេញផ្កាអ័រគីដេថៃនិងជាសហម្ចាស់ក្រុមហ៊ុន Sun International Flower ដែលជាក្រុមហ៊ុននាំចេញដ៏ធំបាននិយាយថាថ្លៃដឹកជញ្ជូនតាមផ្លូវអាកាសបានកើនឡើង៣ដងឬ ៤ ដងក្នុងប៉ុន្មានខែថ្មីៗនេះអាស្រ័យលើទិសដៅ។
មុនពេលជំងឺរាតត្បាតនេះក្រុមហ៊ុនរបស់លោកបានចែកចាយផ្កាអ័រគីដេចំនួន ៣,៦ លាន ក្នុង ១ ខែទៅកាន់ប្រទេសចិន ជប៉ុន វៀតណាម និងសហរដ្ឋអាមេរិក។
ឥឡូវនេះមានផ្កាតែ ១,២ លានទង ប៉ុណ្ណោះដែលចាកចេញពីឃ្លាំងហើយលោកត្រូវឈប់ជួលបុគ្គលិកពាក់កណ្តាល។
លោក វុទ្ធីឆៃ បាននិយាយថា៖ «យើងបានស្នើសុំអាជ្ញាធរសម្រាប់ការជួយផ្នែកហិរញ្ញវត្ថុប៉ុន្តែយើងមិនបានទទួលអ្វីទេ។ពេលវេលាជិតអស់ហើយ»។
ការបង្កើនតម្លៃលក់របស់គាត់ ២០ ភាគរយបានបណ្តាលឱ្យទីផ្សារនៅអឺរ៉ុបផាត់លោកចោលហើយផ្ដោតលើទីផ្សារផ្កាក្នុងស្រុកបន្ថែមទៀត។
លោកបាននិយាយថា ក្តីសង្ឃឹមតែ ១ គត់គឺការលក់ទៅកាន់ប្រទេសជប៉ុនដែលនៅតែមានស្ថិរភាព ហើយការលក់ទៅសហរដ្ឋអាមេរិកបានកើនឡើងនៅពេលចាប់ផ្តើមរដូវកាលអាពាហ៍ពិពាហ៍។
ទោះជាយ៉ាងណាក៏ដោយក្នុងរយៈពេលវែងការប្រែប្រួលអាកាសធាតុក៏ជាបញ្ហាសម្រាប់អ្នកដាំដុះផងដែរ។
លោក វុទ្ធីឆៃ បាននិយាយថា៖ «យើងកំពុងជួបប្រទះកាន់តែខ្លាំងឡើងនូវឥទ្ធិពលនៃការប្រែប្រួលអាកាសធាតុ ដោយចង្អុលទៅភាពត្រជាក់ដ៏គួរឱ្យភ្ញាក់ផ្អើលមួយកាលពីដើមខែមេសាដែលសីតុណ្ហភាពបានធ្លាក់ចុះយ៉ាងខ្លាំងពី ៣៦ អង្សាសេដល់ ២១ អង្សារសេក្នុងរយៈពេលត្រឹមតែ ២៤ ម៉ោងប៉ុណ្ណោះ ដែលប៉ះពាល់ដល់ផលិតកម្មផ្កាអ័រគីដេ»។
លោកត្អូញថា៖ «យើងព្រួយបារម្ភថាស្ថានភាពទាំងនេះនឹងកើតឡើងកាន់តែញឹកញាប់»។
សំណាងអាក្រក់
ការដាក់កំហិតជំងឺរាតត្បាតរបស់ប្រទេសថៃក៏បានប៉ះពាល់ដល់ការលក់ក្នុងស្រុកផងដែរ។ កង្វះអ្នកទេសចរមានន័យថាភោជនីយដ្ឋាននិងសណ្ឋាគារបានកាត់បន្ថយការបញ្ជាទិញហើយការហាមឃាត់ការជួបជុំ ក៏ប៉ះពាល់ដល់ពិធីព្រះពុទ្ធសាសនាថៃដែរ។
ទោះបីជាព្រះរាជាណាចក្រមានការបើកដំណើរការជាអន្តរជាតិឡើងវិញក៏ដោយ ក៏តម្រូវការក្នុងស្រុកនៅតែមិនសូវហក់ខ្លាំងឡើងដែរ។
ខណៈពេលដែលទីផ្សារលក់ផ្កាដ៏ធំបំផុតរបស់ទីក្រុងបាងកកហាក់មានភាពមមាញឹក អ្នកលក់ដុំអាចត្រូវបានគេមើលឃើញថាកំពុងភ័យស្លន់ស្លោតាមច្រកផ្លូវចម្រុះពណ៌ដែលផ្ទុកដោយកន្ត្រកធំដែលមានផ្កាអ្នកលក់ប្រាប់រឿងផ្សេង។
អាជីវករលក់ផ្កាថានថាវីនដែលរង់ចាំអតិថិជនដោយអត់ធ្មត់នៅតូបលក់ផ្កាអ័រគីដេបាននិយាយថា ប្រាក់ចំណូលរបស់អ្នកស្រីបានធ្លាក់ចុះ៧០ភាគរយ។
អាជីវកររូបនេះបាននិយាយថា៖ «អ្នករាល់គ្នានៅតែភ័យខ្លាចក្នុងការមកផ្សារដោយសារតែ Covid-19»។
ជាមួយគ្នានេះអាជីវករឈ្មោះវេអ៊ីវអាយុ ៤៥ ឆ្នាំបាននិយាយថា សព្វថ្ងៃអ្នកស្រីមានដើមផ្កាអ័រគីដេដែលមិនទាន់លក់បានប្រហែល ៦០០ ដើម ដែលនៅសេសសល់ជារៀងរាល់ថ្ងៃហើយអ្នកស្រីបានព្យាយាមបកស្រទាប់ និងដាក់លក់ដាច់ដោយឡែកក្នុងតម្លៃធូរៗ។
អាជីវកររូបនេះបាននិយាយថា៖ «ឈប់លក់ផ្កាអ័រគីដេម៉េចកើត? មិនអាចទៅរួចទេខ្ញុំមិនដឹងថាត្រូវធ្វើអ្វីផ្សេងទៀតទេ»៕ AFP