ក្រុងប៉ារ៉ូអាផេប៉ាស៖ ផ្សែងហុយ និងក្លិនឈ្ងុយសាយភាយតាមខ្យល់រាប់សិបម៉ែត្រ ច្បាស់ជាធ្វើឱ្យអ្នកចូលចិត្តញ៉ាំសាច់ស្រក់ទឹកមាត់។ នេះជាអ្វីដែលទីក្រុងមួយនៅប្រទេសប្រេស៊ីលបានធ្វើឡើងដើម្បីអបអរខួបទឹកដីរបស់ខ្លួន។
រដ្ឋបាលក្រុងប៉ារ៉ូអាផេប៉ាស ដែលស្ថិតនៅភាគខាងជើងរដ្ឋប៉ារ៉ា របស់ប្រេស៊ីល បានរៀបចំកម្មវិធី «បាប៊ីឃ្យូដ៏ធំបំផុតក្នុងលោក» ដើម្បីប្រារព្ធខួប៣៤ឆ្នាំរបស់ខ្លួន។
សាច់អាំង ២០ តោន ជាប្រភេទសាច់ចម្រុះលាយគ្នា ត្រូវបានប្រើប្រាស់ក្នុងកម្មវិធីបាប៊ីឃ្យូ ដែលនៅទីក្រុងទ្វីបអាមេរិកខាងត្បូងហៅថា churrascao។
រដ្ឋបាលក្រុងបានអញ្ជើញប្រជាជនឱ្យចូលរួម ដោយម្នាក់ៗបានមកប្រមូលផ្ដុំគ្នាជុំវិញកន្លែងអាំងសាច់។
កាលពីឆ្នាំ ២០១៧ ទីក្រុងមីណាស ដ៏តូចមួយនៅប្រទេសអ៊ុយរូហ្គាយ បានបង្កើតកំណត់ត្រាហ្គីនណេសពិភពលោក ដោយធ្វើកម្មវិធីសាច់អាំងបាប៊ីឃ្យូដ៏ធំបំផុតក្នុងលោក។
ចុងភៅជាង ២០០ នាក់ បានប្រើប្រាស់អុស ៦០ តោន ដើម្បីចម្អិនសាច់ ១៦,៥ តោន ដោយប្រើរយៈពេល ១៤ ម៉ោង៕ AFP/HR