ភាពយន្ត «Retour a Seoul» ដែលនិពន្ធសាច់រឿង និងថតដោយផលិតករខ្មែរ-បារាំង លោកជូដាវីស្ដីពីនារីបារាំងមានដើមកំណើតកូរ៉េខាងត្បូង។ ហ្វេសប៊ុក
.jpg)
ក្រុងសេអ៊ូល៖ ភាពយន្តដែលនិពន្ធសាច់រឿង និងថតដោយផលិតករខ្មែរ-បារាំង លោកជូដាវី ស្ដីពីនារីបារាំងមានដើមកំណើតកូរ៉េខាងត្បូងវិលត្រឡប់ទៅទីក្រុងសេអ៊ូល ដើម្បីជជីករកសាវតារពិតរបស់ខ្លួនក្រោមចំណងជើងថា «Retour a Seoul» ត្រូវបានក្រុមហ៊ុនយក្សនៃទស្សនីយភាពកម្សាន្ត Sony Pictures Classics ទិញសិទ្ធិសម្រាប់ការចាក់បញ្ចាំងនៅអាមេរិកខាងជើង អាមេរិកឡាទីន មជ្ឈិមបូព៌ា អូស្ត្រាលី និងនូវែលសេឡង់។
នេះបើយោងតាមទំព័រហ្វេសប៊ុកមហោស្រពភាពយន្តអន្តរជាតិកម្ពុជា (Cambodia International Film Festival) បានឱ្យដឹងកាលពីម្សិលមិញ។ ការសម្ពោធចេញបញ្ចាំងជាសកលនឹងត្រូវប្រកាសនៅចុងឆ្នាំនេះ។
ផលិតកររូបនេះត្រូវបានដកស្រង់សម្ដីដោយបាននិយាយថា៖ «ខ្ញុំពិតជារំភើបបំផុតដែលបានធ្វើការជាមួយ Sony Pictures Classics ជាជង្រុកធំនៃភាពយន្តល្អអស្ចារ្យជាច្រើន។ ខ្ញុំពិតជារង់ចាំចែករំលែកទស្សនីយភាពរឿង Return to Seoulជាមួយទស្សនិកជនជុំវិញពិភពលោក»។
ក្នុងសេចក្ដីប្រកាសរបស់ Sony Pictures Classics សំណេរបានរៀបរាប់ថា៖ « Retour a Seoul សន្ទនាទៅកាន់ទស្សនិកជនវ័យក្មេងតាមរយៈការវិលត្រឡប់ទៅរោងភាពយន្តក៏ដូចជាបទពិសោធក្លាសស៊ិកក្នុងការទស្សនាកុន។ វាជារឿងរ៉ាវដ៏អស្ចារ្យអំពីស្ត្រីម្នាក់ដែលស្វះស្វែងរកអតីតកាលរបស់ខ្លួន។ វាពិតជាការសន្យានិងជោគជ័យគួរជាទីពេញចិត្តគ្រប់កម្រិត។ រឿងនេះរឹតតែលើកកម្ពស់ ជូដាវីជាផលិតករភាពយន្តកម្រិតខ្ពស់ដ៏សកម្មមួយកម្រិតថែមទៀត»។
ផលិតករខ្មែរបារាំងលោកជូដាវីវ័យ ៣៨ ឆ្នាំដែលធ្លាប់ចូលរួមមហោស្រពភាពយន្តល្បីៗនៅអឺរ៉ុប។ AFP
វណ្ណកម្មភាពយន្តថ្មីបំផុតរបស់លោកជាសាច់រឿងបែបប្រឌិត ដែលនិពន្ធដោយរូបលោកផ្ទាល់ ដែលចាប់ផ្ដើមពីទីក្រុងសេអ៊ូល។ តួអង្គ Freddie ជានារីបារាំងអាយុ ២៥ ឆ្នាំបានធ្វើដំណើរលើកដំបូងទៅកាន់ប្រទេសកូរ៉េខាងត្បូង ជាទីដែលនាងបានកើត និងត្រូវបានសុំយកទៅចិញ្ចឹម ដោយឪពុកម្ដាយជនជាតិបារាំង។ ពេលដែលនាងប៉ុនប៉ងស្វែងរកឪពុកម្ដាយបង្កើតដំណើរនេះបាននាំនាងទៅជួបហេតុការណ៍ដែលពុំនឹកស្មានដល់។
ភាពយន្តនេះត្រូវបានថតនៅទីក្រុងសេអ៊ូល ដោយមានការចូលរួមសម្ដែងពីតារាកូរ៉េខាងត្បូងជាច្រើនរូបតួសម្ដែងបែលហ្ស៊ិក និងបារាំង។
ផលិតករវ័យ ៣៨ ឆ្នាំរូបនេះធ្លាប់បានចូលរួមមហោស្រពភាពយន្តក្រុងប៊ែរឡាំង កាលពីឆ្នាំ ២០១២ តាមរយៈភាពយន្តឯកសាររឿង Golden Slumbers និងចូលរួមកម្មវិធី Critics'' Week នៃមហោស្រពភាពយន្តក្រុងកានកាលពីឆ្នាំ ២០១៦ តាមរយៈស្នាដៃរឿង «កោះពេជ្រ» មុននឹងលោកបានបញ្ចប់ការថតភាពយន្តរឿង «Retour a Seoul» កាលពីខែធ្នូឆ្នាំ ២០២១។
ភាពយន្តរឿង «Retour a Seoul» នឹងចាក់បញ្ចាំងនៅមហោស្រពភាពយន្តក្រុងកានថ្ងៃអាទិត្យទី ២២ ខែឧសភាឆ្នាំ ២០២២ ខណៈមហោស្រពនេះនឹងប្រព្រឹត្តទៅនៅថ្ងៃទី ១៧ ដល់ ២៨ ខែឧសភាដោយមានភាពយន្តសម្រាំងចំនួន ១៨ រឿង ពីផលិតករមកពីជុំវិញពិភពលោកចូលរួមដណ្ដើមពានរង្វាន់កំពូល Palme d''Or ទោះជាកម្មវិធីនេះពុំទាន់ច្បាស់ពីឈ្មោះបុគ្គលអ្នកវិនិច្ឆ័យរកជយលាភីម្ចាស់ភាពយន្ត។
រឿង «Retour a Seoul» របស់ផលិតករជូដាវីនឹងចូលរួមជាភាពយន្ត Un Certain Regard នៃមហោស្រពភាពយន្តទីក្រុងកានឆ្នាំ ២០២២ នេះ៕
