ភ្នំពេញៈ ព្រឹត្តិការណ៍សម្តែងសិល្បៈវប្បធម៌ខ្នាតធំដ៏អស្ចារ្យមួយ មានឈ្មោះថា «កម្មវិធីខ្មុកខោល» ដែលមានក្រុមយុវជនស្ម័គ្រចិត្តចូលរួមសម្តែងមួយថ្ងៃពេញតែម្តង គឺនៅថ្ងៃ ទី១៩ ខែមិថុនា ឆ្នាំ ២០២២ នៅក្នុងបរិវេណសាល Phnom Penh Factory និង Urban Village Phnom Penh មានទីតាំងនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
សម្រាប់ព្រឹត្តិការណ៍វប្បធម៌ដ៏ពិសេស ខ្មុកខោលនេះ គឺកម្មវិធីសិល្បៈបុរាណមួយ ក្នុងចំណោមកម្មវីធីជាច្រើន ដែលសាលាសិល្បៈហ៊្វូណនតែងតែរៀបចំ ដោយគ្រាន់តែលើកយកប្រធានបទខុសៗគ្នាប៉ុណ្ណោះ ហើយក៏មានការបង្ហាញខ្មុកល្ខោនខោលចំនួន ១១១ និងសម្ភារសិល្បៈនានា។
បើតាមលោក ស៊ុប ស័ក្ខរា (Sup Sakara) ជាប្រធានក្រុមការងាររៀបចំព្រឹត្តិការណ៍សម្តែងសិល្បៈខ្មុកខោលនេះ ឱ្យដឹងពីគោលបំណងនៃកម្មវិធីថា៖ «ជារៀងរាល់ឆ្នាំ សាលាសិល្បៈហ៊្វូណន តែងតែរៀបចំព្រឹត្តិការណ៍សិល្បៈបុរាណ ដែលមានឈ្មោះថា «ទិវាបេតិកភណ្ឌ» ក្រោមប្រធានបទផ្សេងៗគ្នាក្នុងគោលបំណងអបអរសាទរខួបនៃការដាក់បញ្ចូលសម្បតិ្តបេតិកភណ្ឌខ្មែរ ដូចជា ល្ខោនខោល ល្ខោនស្បែកធំ របាំក្បាច់បុរាណ ចាប៉ីដងវែង ជាដើម ជាសម្បតិ្តបេតិកភណ្ឌអរូបីនៃមនុស្សជាតិ ដោយអង្គការ UNESCO។ កម្មវិធីនេះ រៀបចំឡើងក្នុងគោលបំណង ដើម្បីបង្ហាញឱ្យយុវជន និងមហាគ្រួសារខ្មែរ ស្វែងយល់កាន់តែច្បាស់អំពីទម្រង់សិល្បៈបុរាណនិមួយៗ បំផុសបង្កើតចិត្តស្រឡាញ់សម្បត្តិវប្បធម៌ អរិយធម៌ដ៏មានតម្លៃរបស់ជាតិខ្មែរ អភិវឌ្ឍន៍ឱ្យស្ថិតស្ថេរ គង់វង្ស និងចូលរួមអភិរក្ស ថែរក្សាការពារទាំងអស់គ្នា។ យើងក៏មានការតាំងបង្ហាញនូវ ខ្មុកល្ខោនខោល ចំនួន ១១១ ខ្មុក និងសម្ភារសិល្បៈផ្សេងៗ ទៀត ដើម្បីស្វែងរកមូលនិធិគាំទ្រ ក្នុងរៀបចំកម្មវិធីព្រឹត្តិការណ៍សម្តែងល្ខោនខោល ដ៏អស្ចារ្យនៅចុងឆ្នាំ ២០២២ នេះ។
លោកបញ្ជាក់ថា៖ «កម្មវិធីខ្មុកខោលនេះ គឺត្រូវបានបែកចែកជាពីរពេលគឺពេលព្រឹកចាប់ពីម៉ោង ៨ ព្រឹក ដល់ម៉ោង ១២ ថ្ងៃត្រង់ ជាកម្មវិធីសិក្ខាសាលាអំពីទម្រង់ល្ខោនខោល និងរបាំបុរាណ ដែលមានការអញ្ជើញបង្ហាញដោយ ឯកឧត្តមព្រឹទ្ធាចារ្យ ព្រឿង ឈាង រួមទាំងការហាត់រៀន និងគ្រងឈុតល្ខោនខោល របាំបុរាណ ពីសំណាក់តារាកិត្តិយសផ្សេងៗ។ ចំណែកពេលរសៀល ចាប់ពីម៉ោង ២ រសៀល ដល់ម៉ោង ៧ យប់ មានការប្រគំតន្រ្តីទសវត្សរ៍ទី ៦០ ដោយសាលាសិល្បៈតន្ត្រី ការតាំងពិព័រណបង្ហាញមុខខ្មុកល្ខោនខោលចំនួន ១១១ ខ្មុក និងសម្ភារផ្សេងៗ ការបង្ហាញក្បាច់គុនល្បុក្កតោ ដោយសាលាគុនជ័យតេជៈ របស់កញ្ញា អ៊ិត កន្និកា ហៅកញ្ញា ពេជ្រ ចរណៃ ការសម្តែងចាប៉ីដងវែង និងល្ខោនខោល ឈុតក្រុងរាពណ៍ជប់ពល។ ឯវត្តមាននៃក្រុមសិល្បករ-សិល្បការិនី ទាំងបុរាណ និងសម័យ ចូលរូមនោះមានចំនួនប្រមាណ ១០០ នាក់ ក្នុងព្រឹត្តិការណ៍នេះ»។
គួររំឮកដែរថា ប្រសិនបើមិនមានការផ្ទុះឡើងវិញនូវជំងឺឆ្លងកូវីដ ១៩ នាថ្ងៃទី ២០ ខែ កុម្ភៈ ឆ្នាំ ២០២១ កន្លងមកនោះ នឹងមានការរៀបចំព្រឹត្តិការណ៍ សម្តែងសិល្បៈល្ខោនខោលខ្នាតធំដ៏អស្ចារ្យជាលើកដំបូង ក្នុងប្រវត្តិសាស្ត្រ ដែលមានក្រុមយុវជនស្ម័គ្រចិត្ត ចូលរួមសម្តែងប្រមាណ ២០០ នាក់ ក្រោមពាក្យស្លោក «មូលនិធិ ១០០០ រៀល ឆ្ពោះទៅកាន់ព្រឹត្តិការណ៍សម្តែងល្ខោនខោលដ៏អស្ចារ្យឆ្នាំ ២០២០» ដោយកម្មវិធីគ្រោងប្រារព្ធធ្វើនៅចុងខែមីនា ឆ្នាំ ២០២១ កន្លងមក។ ប៉ុន្តែព្រឹត្តិការណ៍នោះត្រូវបានពន្យារពេលអស់ ១ ឆ្នាំ ដោយត្រូវលើកពេលទៅធ្វើនៅចុងឆ្នាំ ២០២១ វិញ និងបានលើកពន្យារពេលបន្តមកទៀត។
នេះបើតាមការអះអាងបញ្ជាក់ពីសំណាក់ លោក ស៊ុប ស័ក្ខរា ដែលជាប្រធានគណៈកម្មការរៀបចំព្រឹត្តិការណ៍សម្តែងសិល្បៈល្ខោនខោលខ្នាតធំ មិនធ្លាប់មានពីមុនមកនោះ។ លោក ស៊ុប ស័ក្ខរា ធ្លាប់ប្រាប់ភ្នំពេញប៉ុស្តិ៍ថា គម្រោងរបស់យើងត្រូវរៀបចំនៅចុងខែមិនា ឆ្នាំ ២០២១។ តែដោយសារមានព្រឹត្តិការណ៍ផ្ទុះជំងឺកូវីដ ១៩ នាថ្ងៃទី ២០ កុម្ភៈ នោះ ទើបក្រុមការងារយើងបានពិភាក្សាគ្នា ហើយលើកថ្ងៃទៅធ្វើនៅចុងឆ្នាំ ២០២១ វិញ តែយើងក៏ នៅមិនទាន់បានកំណត់ថ្ងៃជាក់លាក់នោះដែរគឺអាចបន្តលើកពេល។
ក្រោមស្មារតីស្រឡាញ់សិល្បៈវប្បធម៌ជាតិ និងបង្ហាញពីឆន្ទៈរបស់ខ្លួននោះ ឃើញមានក្រុមយុវជន និងសិល្បករ ដែលមានជាតារាចម្រៀង និងតារាសម្តែងប្រុសៗ បានស្ម័គ្រចិត្តទៅហ្វឹកហាត់ទម្រង់សិល្បៈបុរាណល្ខោនខោល ដើម្បីត្រៀមចូលរួមការសម្តែង ក្នុងព្រឹត្តិការណ៍សម្តែងខ្នាតធំយ៉ាងសស្រោកសស្រាំផងដែរ កាលពីចុងឆ្នាំ ២០២០ កន្លងមក ហើយពួកគេក៏នៅតែបន្តឆន្ទៈឥតប្រែប្រួលដដែល បើទោះបីជាត្រូវពន្យារពេលយ៉ាងណាក្តី។
គួរឱ្យកត់សម្គាល់ផងដែរថា កាលពីថ្ងៃទី ៧ ខែ មិថុនា ឆ្នាំ ២០២០ កន្លងមកនោះ គេឃើញមានក្រុមសិល្បករ ជាតារាចម្រៀង និងតារាសម្តែង រួមមាន លោក ឌី វ៉ាន់ដា លោក ចន ស័ក្ត លោក ហៃ ប៉ោហុង លោក នូ ឧសភា លោក រស់ រាជ្ជសាល លោក ចន្ថា ដារ៉ា លោក អ៊ុន សុទ្ធា លោក ធៀន លោក សន ពិសិដ្ឋ លោក នេន ទុំ លោក ដារ៉ាត់ លោក សិរី វង្ស លោក រាជ្យបុត្រ នាគមាស លោក ពឹង ពុទ្ធិស័ក្ក លោក យុទ្ធ និស្ស័យ លោក កូដូម៉ូ លោក សយ រតនៈ លោក ពង្ស ពុទ្ធិស័ក និងលោក ថៃ សាន បានចូលរួមហាត់សមល្ខោនខោល ជាមួយនឹងលោកគ្រូ អ្នកគ្រូ និងលោកគ្រូបច្ចេកទេស គឺមានព្រឹទ្ធាចារ្យ ព្រឿង ឈៀង នៅមជ្ឈមណ្ឌលហ្វឹកហ្វឺននៃកងយោធពលខេមរភូមិន្ទ (ស្តាតចាស់) ដើម្បីថតស្ប៉តផ្សាយពីព្រឹត្តិការណ៍ដ៏អស្ចារ្យមួយនេះឡើង។
ខ្មុកខោល ដែលជាកម្មវិធីយ៉ាងពិសេស បានរៀបចំឡើង ក្នុងគោលបំណង ដើម្បីលើកស្ទួយវប្បធម៌ដ៏ត្រចះត្រចង់របស់ខ្មែរ ព្រមទាំងការបង្ហាញអំពីទម្រង់ល្ខោនខោលនានា រៀបចំដោយសាលាសិល្បៈហ៊្វូណន (Funan Art School) សហការរៀបចំ ដោយក្រៀលកម្ពុជា (Creal Cambodia) សាលាសិល្បៈតន្រ្តី (Music Arts School) និងសាលាគុនល្បុក្កតោជ័យតេជៈ ហើយសហការ និងផ្តល់ទីតាំងដោយ Factory Phnom Penh និង Urban Village Phnom Penh៕