ភោជ​នីយ​ដ្ឋាន​ចង្ក្រាន​ខ្មែរ នាំ​​បរទេស​​ដើរ​ផ្សារ​ចម្អិន​ម្ហូប​​ផ្សព្វ​ផ្សាយ​វប្បធម៌​អាហារ​ជាតិ​

Content image - Phnom Penh Post
ការបង្រៀនជនបរទេសពីរបៀបធ្វើម្ហូបខ្មែរនៅភោជនីយដ្ឋានចង្ក្រានខ្មែរ កាលពីកន្លងមក។ រូបថត Changkran Khmer

សៀមរាបៈ​ ជា​មួយ​បទ​ពិសោធ​ចម្អិន​ម្ហូប​អន្តរជាតិ​ជាង ​២០​ ឆ្នាំនៅ​តាម​សណ្ឋាគារ​ និង​រីសត​លំដាប់​ផ្កាយ​ទាំង​នៅ​កម្ពុជានិង​បរទេស​មេ​ចុង​ភៅ ស៊ឹង សុ​ភមង្គល បាន​ត្រឡប់​មក​បើក​​ភោជ​នីយ​ដ្ឋាន​ចង្ក្រាន​ខ្មែរ​ដើម្បី​បម្រើ​អា​ហារ​អត្ត​សញ្ញាណ​កម្ពុជា ​និង​រួម​ចំណែក​ផ្សព្វ​ផ្សាយ​វប្បធម៌​ម្ហូប​ខ្មែរ​តាម​រយៈ​ការ​បង្រៀន​ភ្ញៀវ​បរ​ទេស​នៅ​ខេត្ត​សៀម​រាប​។

លោក ​មង្គល​ មាន​គំនិត​បើក​បង្រៀន​ចម្អិន​ម្ហូប​ក្នុង​បំណង​លើក​ស្ទួយ​ម្ហូបខ្មែរ​ក៏ដូច​ជា​ផ្ដល់​បទ​ពិសោធ​កម្សាន្ត​ដល់​ភ្ញៀវ​ទេសចរ​ បន្ទាប់​ពីពួក​គេ​បាន​ទស្សនា​ប្រា​សាទ​បុរាណ​ដ៏ល្បី​ល្បាញ​របស់​ខ្មែរ​។

មេចុង​ភៅ​វ័យ​ ៤០ ​ឆ្នាំ​រូប​នេះបាន​ប្រាប់​ ភ្នំពេញ​ ប៉ុស្ដិ៍​ថា៖ «ភាគ​ច្រើន​បំផុត​គឺ​ភ្ញៀវ​អឺរ៉ុបភ្ញៀវ​បរទេស​ មក​សៀម​រាប​អ៊ីចឹងបន្ទាប់​ពី​ប្រា​សាទ​អង្គរ​វត្តគាត់​ព្យា​យាម​រកសកម្ម​ភាព​កម្សាន្ត​នៅ​ក្នុង​ខេត្ត​របស់​យើង​ដូច​ជាជិះ​ឡាន​ហ្ស៊ីបម៉ូតូ​បើក​ជុំវិញ​អ៊ីចឹង​ទៅ ឬទៅមើល​សៀក​។ នៅ​សល់​ពេល​គាត់​​ក៏​ចាប់​យក​ Cooking Class [ថ្នាក់​បង្រៀន​ធ្វើ​ម្ហូប] អ៊ីចឹង​ទៅ»​។

កើត​ក្នុង​គ្រួសារ​មាន​ជីវភាព​ក្រខ្សត់​លោក​មង្គល​ចាប់​អារម្មណ៍​នឹង​ការ​ធ្វើ​ម្ហូប​ដោយ​សារ​មាន​ជីដូន​ជា​ចុងភៅ​​រោង​កម្ម​វិធី​តាម​ភូមិ​។

លោក ​ស៊ឹង សុ​ភមង្គល និយាយ​ថា៖ «ខ្ញុំ​រៀន​សូត្រ​បាន​ច្រើន​ពី​គាត់និង​ចាប់​ផ្ដើម​ធ្វើ​ម្ហូប​ឱ្យ​ក្រុម​គ្រួសារ​ខ្ញុំ​បរិភោគ​តាំង​ពីអាយុ​ ១៥ ​ឆ្នាំ»​។

លោក​បាន​គិត​គូរ​ផ្លូវ​ជីវិត​រួចរាល់​ហើយ​ថា នឹង​ចាប់​យក​ជំនាញ​​ចុង​ភៅ​ដោយ​ផ្ដើម​ពីការ​រៀន​ភាសា​អង់​គ្លេស​ជា​មួយ​ព្រះសង្ឃ​នៅ​វត្ត។ លោក​មង្គល​ក៏​ត្រូវ​បាន​ព្រះ​សង្ឃ​១​អង្គ​ទំនុក​បម្រុង​ឱ្យ​លោក​រៀន​ធ្វើ​ម្ហូប​។

លោក​រំឭក​ប្រាប់​ថា៖ «ក្នុង​ឆ្នាំ​ ២០០៣ ​ខ្ញុំ​មាន​សំណាង​បាន​ទៅនៅ​សាលា​ប៉ូល​ឌុយ​ប្រ៊ុល​ដែល​ទើប​នឹង​បើក​ថ្មី​ថ្មោង​នៅ​សៀម​រាប។​ នេះ​ហើយ​ជា​ដំណើរ​​ចាប់​ផ្ដើម​នៃ​អាជីព​មេចុង​ភៅ​របស់​ខ្ញុំ»​។

ក្រោយ​ពី​បញ្ចប់​ការ​សិក្សា​លោក​បាន​ចាប់​ផ្ដើម​ការងារ​នៅ​សណ្ឋា​គារ​លំដាប់​ផ្កាយ​ជា​ច្រើន​នៅ​ខេត្ត​សៀម​រាប​ និង​រាជធានី​ភ្នំពេញ។ នៅ​ឆ្នាំ ២០០៨ ​លោក​ទទួល​បាន​ឱកាស​ទៅ​បម្រើការ​ជា​មេចុង​ភៅ​ឯក​ជន​​នៅ​លើ​នាវា​កម្សាន្ត​ប្រណីត​នៅឯ​ប្រទេស​ក្រិក​។

លោក​ សុ​ភមង្គល បាន​រំឭក​ប្រាប់​ថា៖ ​«វា​ជា​តំណែង​ការងារ​ដ៏ពិបាក​មួយ​ដោយ​ខ្ញុំ​ស្ថិត​ក្នុង​ផ្ទះ​បាយ​តែម្នាក់​ឯង ​និង​ត្រូវ​នៅ​លើ​នាវា​សម្រាប់​ភ្ញៀវ​ជា​ក្រុម​តូច​ៗដែល​សម្រាក​លម្ហែពី​ ១ ​ទៅ ​២ ​សប្ដាហ៍​»។

រយៈ​ពេល​ត្រឹម​តែ​ ១០​ ខែ​ នៃ​ការងារ​លើ​នាវា​លោ​ក​ក៏​បាន​វិល​ត្រឡប់​មក​មាតុ​ភូមិ​វិញ និង​បម្រើ​ការ​ជា​ចុងភៅ​​នៅ​សណ្ឋា​គារ​លំដាប់​ផ្កាយ​ក្នុង​រាជ​ធានី​ភ្នំពេញ ជា​ទី​ដែល​លោក​ភាគ​ច្រើន​ចម្អិន​ម្ហូប​ខ្មែរ ថៃ ​និង​វៀត​ណាម​។

នៅ​ឆ្នាំ​ ២០១២​ លោក​បាន​ចាក​ចេញ​ទៅ​បម្រើ​ការ​នៅ​រីសត​ប្រណីត​ Amannyara នៅ​ប្រជុំ​កោះ Turks ​និង Caicos មុន​នឹង​ត្រឡប់​មក​កម្ពុជា​វិញ​ បង្កើត​ភោជ​នីយ​ដ្ឋាន​ផ្ទាល់​ខ្លួន​។

បង្កើត​ឡើង​នៅ​ឆ្នាំ​ ២០១៨​ ភោជនីយ​ដ្ឋាន​ចង្ក្រាន​ខ្មែរ​ ជា​សំណង់​ផ្ទះ​ឈើ​បុរាណ​ខ្មែរស្ថិត​នៅ​ទីតាំង​ស្ងប់​ស្ងាត់ជា​មួយ​បរិយា​កាស​ស្រស់​ស្រាយ​​បែប​ឯក​ជន​។

ផ្ទះ​ឈើ​បុរាណ​ដែល​មាន​ពិតាន​ខ្ពស់បន្ទប់​ធំទូលាយ​និង​កន្លែង​ទទួល​ទាន​ធំស្រឡះ​នៅ​ជាន់​លើ​នេះក៏ជា​ថ្នាក់​បង្រៀន​ធ្វើ​ម្ហូប​សម្រាប់​ភ្ញៀវ​ជា​ក្រុម​តូច​ធំ​។

លោក​ សុភមង្គល បាន​និយាយ​ថា៖ «ការ​បង្រៀន​ភ្ញៀវ​ធ្វើ​ម្ហូប​យើង​ប្រើ​ម៉ឺនុយ​ឱ្យគាត់​ជ្រើស​រើស។ យើង​រៀបចំ​​តម្លៃ​រួច​ហើយ​សម្រាប់​ភ្ញៀវ​ម្នាក់​»។

កម្មវិធី​បង្រៀន​ធ្វើម្ហូប​​ដែល​មាន​រយៈ​ពេល​ប្រមាណ​ ៣ ម៉ោង​នេះ ​ក៏​មាន​សកម្ម​ភាព​នៃ​ភ្ញៀវ​ដើរ​ផ្សារ ​និង​ការ​អត្ថា​ធិប្បាយ​ពី​ប្រវត្តិ និង​ប្រភព​គ្រឿង​ផ្សំ​ផង​ដែរ​។

លោក​លើក​ឡើង​ថា៖ «​យើង​រ៉ាយ​រ៉ាប់​ទាក់ទង​នឹង​របស់​រប​រណា​មក​ពីណា​របស់ហ្នឹ​ង​ដាំ​នៅ​ណា។ ប្រជា​ជន​យើង​ចូលចិត្ត​​ធ្វើអី្វ​អ៊ីចឹង​ទៅ។ យើង​និយាយ​ពីរឿង​រ៉ាវ​​បន្លែថា​បន្លែ​ហ្នឹង​អាច​ញ៉ាំ​បាន​អី​ខ្លះ? ធ្វើ​អី​ខ្លះ? ហើយ​អត្ថ​ប្រ​យោជន៍​របស់​វា​មាន​អីខ្លះ? យើង​ណែ​នាំ​គាត់​អ៊ីចឹង​ទៅ»។

ភ្ញៀវ​ត្រូវ​បាន​ពន្យល់​ប្រាប់​ពីបន្លែ​គ្រឿង​ទេស​ និង​ប្រវត្តិ​ប្រើ​ប្រាស់​វា​ក្នុង​ម្ហូបខ្មែរ។ ត្រឡប់​មក​ដល់​ភោជនីយ​ដ្ឋាន​វិញពួកគេ​​មាន​តុ​ និង​សម្ភារ​ចម្អិន​រៀងៗ​ខ្លួនក្រោម​ជំនួយ​របស់​​មេចុង​ភៅ​ជំនាញ​ក្នុង​ការ​ចម្អិន​អា​ហារ​សម្រន់អាហារ​ចម្បង និង​បង្អែម​។

មេចុង​ភៅ​រូបនេះ​បន្ត​ថា៖​ «នៅ​ក្នុង​ Cooking Class ហ្នឹង​វា​មាន​ ៣ មុខ​សម្រាប់​ឱ្យ​គាត់​រៀនមាន​ជា​សា​លាដ ឬ​ក៏​ Appe​tizer ហើយ​បន្ទាប់​មក​យើង​ធ្វើ Main Course ហើយ​មាន Dessert [បង្អែម] មួយ​ទៀត»​។

ចុង​បញ្ចប់​នៃ​កម្ម​វិធី គឺ​ជា​ការ​ភ្លក្ស​ស្នាដៃ​ខ្លួន​ឯង​យ៉ាង​រីករាយ និងមោទន​ភាព​ជាពិសេស​ចំពោះ​ភ្ញៀវ​ខ្លះ​ ដែល​ពុំ​ធ្លាប់​ចូល​ផ្ទះ​បាយឬ​សូម្បី​តែ​កាន់​កាំបិត​ចិត​បន្លែ​។

លោក​ សុ​ភមង្គល ​និយាយ​ថា៖ «ពួក​គាត់​ធ្វើ​​ហើយពួក​គាត់​ញ៉ាំ​នៅ​ហ្នឹង។ គាត់​រីក​រាយ​ជាមួយ​ម្ហូប​គាត់។

ភ្ញៀវ​ខ្លះ​គាត់​មិន​ដែល​ធ្លាប់​បាន​កាន់​កាំបិត​អីផង។នៅ​ពេល​ដែល​ទទួល​ពាក់​អៀម​ និង​មួក​ចុងភៅ​ឈរធ្វើ​​ម្ហូប​ដោយ​មាន​យើង​ប្រាប់យើង​ណែនាំ​​ទៅគាត់​ដូច​មាន​អារម្មណ៍​ស្រស់​ស្រាយ​គាត់​សប្បាយ​ចិត្ត»។

ជា​ការ​តប​ស្នង​ ភ្ញៀវ​បរទេស​មួយចំនួន​​​សរសេរ​ណែនាំ​ពី​ភោជនីយ​ដ្ឋាន​ចង្ក្រាន​ខ្មែរ​លើ​ Trip Advisor និង​ណែនាំ​ភ្ញៀវ​ជា​បន្ត​បន្ទាប់​មក​រៀន​ធ្វើ​ម្ហូប​នៅទីនេះ​ បើទោះជា​ទីតាំង​មាន​ផ្លូវ​ចូល​តូច​ចង្អៀត​មិន​សូវ​អំណោយ​ផល​ដល់​ការ​ធ្វើ​ដំណើរ​ដោយ​រថយន្ត​ក៏ដោយ។

មេចុង​ភៅ​រូបនេះ​បន្ត​ថា៖ «និយាយ​ឱ្យត្រង់​ទៅ​កន្លែង​របស់ខ្ញុំ​ផ្លូវ​ក្នុង​តូចផ្លូវ​ចូល​ចង្អៀត។ ​អ៊ីចឹង​ទៅ​ភ្ញៀវ​ក្នុង​ស្រុក​មាន​ឡាន​គាត់​ពិបាក​មក​។ ដល់​ភ្ញៀវ​ភ្នាក់ងារ​ទេសច​រណ៍គាត់​ប្រើឡាន​ទេស​ចរណ៍​ ឡាន​ក្រុង​​ អ៊ី​ចឹង​ទៅគាត់​ក៏​ពិបាក​មក​ដែរដើរ​ចូល​មក​ក្នុងរាង​ឆ្ងាយ​បន្ដិច​ដែរ​ផ្លូវ​រាង​តូច»​។

ការ​ផ្សព្វ​ផ្សាយ​តគ្នា​ពីមាត់​មួយ​ទៅ​មាត់​មួយ​និងបណ្ដាញ​សង្គមបាន​ធ្វើ​ឱ្យលោក​បាន​ជោគជ័យ​ដោយ​មាន​ភ្ញៀវ​ស្នាក់​នៅ​សណ្ឋា​គារ​លំដាប់​ផ្កាយ​ល្បីៗ​មក​ទទួល​ទាន​នៅ​កន្លែង​របស់​លោក​។

លោក​ សុ​ភមង្គល បញ្ជាក់​ថា៖ «យើង​ស្ថិត​នៅជិត​សណ្ឋា​គារ​ធំៗដែល​ភ្ញៀវ​មក​ស្នាក់​នៅទី​នោះ​សុទ្ធ​តែ​ភ្ញៀវ​ល្អៗហើយ​ពេល​គាត់​មក​សម្រាក​អ៊ីចឹង​គាត់​ឃើញ​ហាង​យើង​ ពួក​គាត់​ចាប់​អារម្មណ៍​ច្រើន​មាន​ដើរ​ចូល​មក​សាក​ភាគ​ច្រើន​»។

កាល​ពីមុន​វិបត្តិកូវីដ​សកល​ថ្នាក់​បង្រៀន​ធ្វើម្ហូប​នៅ​ភោជនីយ​ដ្ឋាន​ចង្ក្រាន​ខ្មែរ​ក៏​បាន​ទទួល​ភ្ញៀវ​ក្នុង​ស្រុក​មក​ជា​លក្ខណៈ​អង្គ​ការ ឬ​ក្រុម​ហ៊ុន​ ដើម្បី​រៀន​ធ្វើកិច្ច​ការ​ជា​ក្រុម​តាម​រយៈ​សកម្ម​ភាព​ធ្វើម្ហូប​កម្សាន្ត។

មេចុង​ភៅ​ដែល​ចូល​ចិត្ត​ម្ហូបខ្មែរ​រូប​នេះនិយាយ​ថា៖ «គាត់​មក​ធ្វើ​ Team Building។​ គាត់​មាន​ក្រុម​ច្រើន​គ្នា​ចង់​មក​ធ្វើ​ម្ហូប​ជា​មួយ​យើង។ ដូចជា​មាន​គ្នា​ ២០ ​នាក់​អី​​អ៊ីចឹង​ទៅ យើង​បែង​ចែក​​ដើម្បី​រៀន​ធ្វើការ​ជា​មួយ​គ្នា​ជា​ក្រុម​»។

យ៉ាង​ណា​មិញ​ក្នុង​អំឡុង​វិបត្តិ​កូវីដ​ភោជនីយ​ដ្ឋាន​បាន​ផ្អាក​ដំណើរ​ការ​ ដោយ​ទើបតែ​បើកទ្វារ​ឡើង​វិញ​បាន​ជាង ១ ​ខែ​​។

មេចុង​ភៅនិង​ម្ចាស់​ហាង​រូបនេះ​ថា៖ «ក្រោយ​ពី​បើក​ដំណើរ​ការ​ទទួល​ភ្ញៀវនៅ​ក្នុង​ខែ​ ៨ ​សម្រាប់​តែ coo​king​ class យើង​ទទួល​បានភ្ញៀវ​ចូល ​១០ ​ក្រុម​ដែរ​ ១ ក្រុម​មាន ​២ ​នាក់ ៤​ នាក់ ៦ ​នាក់​ ពេល​ខ្លះ​ដល់​ ៨ ​នាក់​ក៏​មាន​ដែរ។និយាយ​ទៅបើ​ប្រៀប​ធៀប​មុន​កូវីដ​គឺយើង​នៅ​ខ្សោយ​នៅ​ឡើយ»​។

នៅ​សៀម​រាប​មាន​ភោជនីយ​ដ្ឋាន​ច្រើន​ផ្ដល់​ការ​បង្រៀន​ធ្វើម្ហូប​ស្រដៀង​គ្នា​នេះ​ដែរ​ដល់​ភ្ញៀវ​បរទេសតែ​​ភាព​ខុស​ប្លែក​គ្នាគឺ​ការ​ជ្រើស​រើស​មេចុង​ភៅ​ ការ​ប្រើ​ប្រាស់​ភាសា ​និង​ចំណេះ​ដឹង​ក្នុង​ការ​ពន្យល់​ភ្ញៀវ​ពី​រឿង​រ៉ាវ​នៅ​ពី​ក្រោយ​ម្ហូប​ដែល​ពួក​គេ​ចម្អិន​។

លោក​ សុ​ភមង្គល លើក​ឡើង​ថា៖ «នៅ​កន្លែង​ផ្សេងខ្លះ​គាត់​ប្រើអ្នក​បង្ហាត់​មាន​បទ​ពិសោធ​តិច​ហើយ​ការ​និយាយ​ភាសា​ក្នុង​ការ​ពន្យល់​ជួន​កាល​ក៏អត់​ក្បោះ​ក្បាយប៉ុន្តែ​យើង​ធ្វើអ្វី​ យើង​ស្រាវ​ជ្រាវ​បាន​ច្រើន»។

នៅ​ភោជនីយ​ដ្ឋាន​ចង្ក្រាន​ខ្មែរភ្ញៀវ​បរទេស​ចាប់​អារម្មណ៍​ម្ហូបឆា​សាច់​គោ​អង្ក្រង​ដែល​ចុងភៅ​រីករាយ​នឹង​បង្ហាត់​បង្ហាញ​ពី​ប្រភព​គ្រឿង​ផ្សំ​ជាក់​ស្ដែង​។

លោក​និយាយ​ថា៖ «អាហ្នឹង​ពេញ​និយម។ភ្ញៀវ​ខ្លះ​គាត់​មិន​ដែល​ស្គាល់​អង្ក្រង​យ៉ាង​ម៉េច​ផង។ ភ្ញៀវ​ខ្លះ​គាត់​ខ្លាច​ភ្ញៀវ​ខ្លះ​គាត់​ចូលចិត្ត​សាក​ល្បង​។ ណាមួយ​នៅ​កន្លែង​ខ្ញុំ​នេះ​សុទ្ធ​តែ​ដើម​ឈើ​មាន​សម្បុក​អង្ក្រង​​ ក្បែរៗ​ហ្នឹង​ទៅ​ក៏​យើង​ពន្យល់​ប្រាប់​គាត់​ជា​មួយ​ភាព​ជាក់​ស្ដែងគាត់​ក៏​យល់​ច្បាស់»​។

ម្ហូបខ្មែរ​ត្រូវ​បាន​មេចុង​ភៅ​ផ្កាយ​មីឆែ​លីន​ដេវីដ​ថម​សិន (Michelin-starred chef David Thompson) ពិពណ៌​នាថា​ ជា​ម្ហូប​អាស៊ី​ដែល​ពុំសូវ​ទទួលបាន​ការ​ផ្ដល់​តម្លៃ​ខ្ពស់ដែល​ជាក់​ស្ដែង​វា​មាន​ប្រវត្តិ​យូរ​លង់​មកហើយ​តាំង​ពី​អាណា​ចក្រ​ខ្មែរ។ ក្រៅ​មាតុ​ភូមិ​ម្ហូប​ខ្មែរ​ពុំសូវ​ត្រូវ​បាន​បរទេស​​ស្គាល់​​ច្រើន​នោះ​ទេ​ហើយ​ចំនួន​ភោជ​នីយ​ដ្ឋាន​ខ្មែរ​នៅ​បរទេស​ក៏​ពុំសូវ​មាន​ច្រើន​ដែរ។

ក្រៅពី​ទទួល​ឥទ្ធិពល​ខ្លះ​ពី​ចិន និង​ឥណ្ឌាម្ហូប​ខ្មែរ​សព្វ​ថ្ងៃ​ក៏​ទទួល​ឥទ្ធិពល​ខ្លះពី​បារាំង​ ដែល​បាន​ធ្វើ​អាណា​និគម​ ៩០ ​ឆ្នាំ​លើ​កម្ពុជា​។

មេចុ​ងភៅ​ សុ​ភមង្គល​ ដែល​ជា​អ្នក​ចូល​ចិត្ត​ទទួល​ទាន​ម្ហូប​ខ្មែរ​បាន​លើក​ឡើង​ថាភាគ​ច្រើន​ម្ហូប​ខ្មែរ​និយម​ប្រើ​ម្ទេស​ និង​ខ្ទឹមស។​វាជាម្ហូប​សាមញ្ញ​តែ​វា​មានអ្វី​ពិសេស​ពី​ភាព​សា​មញ្ញ​នេះ។ ម្ហូប​ខ្មែរ​ គឺជា​ម្ហូប​ប្រពៃ​ណី​ដែល​​មាន​ប្រវត្តិ​អាយុ​កាល​ដ៏​ចំណាស់​មួយ​ហើយ​ពេល​ខ្លះ​វា​អាច​នឹង​ពិបាក​ក្នុង​ការ​បង្កើត​រូបមន្ត​ពី​បុរាណ​ឡើង​វិញ​។

លោក​បាន​បន្ត​ថា៖ «ទោះ​ជា​យើង​មាន​បទ​ពិសោធ​ម្ហូប​អន្តរ​ជាតិ​ច្រើន​តែ​ដោយ​សារ​តែ​យើង​ចូល​ចិត្ត​ញ៉ាំ​ម្ហូប​ខ្មែរដល់​ពេល​មក​បើក​ចង្ក្រាន​នេះក៏​យើង​ស្រាវ​ជ្រាវ​ខ្លះ​ដែរទាក់​ទង​នឹង​ម្ហូប​ណា​ ម្ហូ​បខ្មែរ​ដែល​គេ​ពេញ​និយម​ ហើយ​ម្ហូប​ណា​ដែល​យើង​អាច​ណែ​នាំ​ទៅ​កាន់​ភ្ញៀវ​បរទេស​»​។

លោក ​សុ​ភមង្គល បញ្ជាក់​ថា៖ «យើង​ចង់​លើក​ស្ទួយ​ម្ហូប​ខ្មែរ​យើង​ដើម្បី​ឱ្យ​បរទេស​ស្គាល់​។ យើង​មាន​ម្ហូបខ្លះ​ជា​ប្រភេទ Authentic គឺ​ម្ហូប​ពី​ដើម​។ រសជា​តិ​​យើង​អត់​ចោល​គ្រឿង​ខ្មែរ​យើង​ទេគ្រាន់តែ​យើង​កែ​ច្នៃ​​តុប​តែង​វា​ឱ្យ​ស្អាត»។

លើស​ពីការ​បម្រើ​ម្ហូប​ខ្មែរមេចុង​ភៅរូប​នេះ​តែង​តែ​ចេញ​ពី​ផ្ទះ​បាយ​មក​រាក់ទាក់​ជួប​​ភ្ញៀវ​ ដើម្បី​ផ្ដល់​បទ​ពិសោធ​កក់​ក្ដៅ​បន្ថែម​លើ​រស​ជាតិ​អាហារ​។

លោក​ថា៖​ «ភាគ​ច្រើន​ខ្ញុំ​ចេញ​មក​ជួប​ពួក​គាត់​មក​និយាយ​សួស្ដី។​ ភាគ​ច្រើន​យើង​ចង់​ផ្ដល់​ឱ្យគាត់​នូវ​អារម្មណ៍​ផា​សុក​ភាព​រីក​រាយ​ជា​មួយ​យើង​ព្រោះ​តាម​ធម្មតា​មិនថា​ភ្ញៀវ​ខ្មែរ​ ឬ​ភ្ញៀវ​អឺរ៉ុបទេ​ត្រូវ​ការ​អ្នក​មក​និយាយ​លេង​មក​សួរ​សុខ​ទុក្ខ​»។

អ្នកនាំ​ពាក្យ​ក្រសួង​ទេស​ចរណ៍​លោក​ តុប​ សុភ័ក្រ ​ឱ្យដឹង​ថា ​ក្នុង​ចំណោម​អាជី​វកម្ម​ទេស​ចរណ៍​ដែល​រង​ផល​ប៉ះ​ពាល់​ពី​វិបត្តិ​ជំងឺ​កូវីដ​ ១៩ ទាំង​អស់​នៅ​ខេត្ត​សៀមរាប​អាជីវ​កម្ម​ទេស​ចរណ៍​ប្រហែល​​ ៤៦​ ភាគរ​យ បាន​បើក​ដំណើរ​ការ​ឡើង​វិញ​ស្រប​នឹង​ការ​វិល​ត្រឡប់​មក​នៃ​ភ្ញៀវ​ទេស​ចរ​បរ​ទេស​។

នៅ​ភោជ​នីយ​ដ្ឋាន​ចង្ក្រាន​ខ្មែរ​ថ្នាក់​បង្រៀន​ធ្វើ​ម្ហូប​មាន​ភ្ញៀវ​ភាគ​ច្រើន​មាន​មក​ពីកា​ណាដា​អាមេរិក​ អង់​គ្លេស បារាំង​ អូ​ស្ត្រាលី សិង្ហ​បុរី ម៉ាឡេ​ស៊ី និង​ប្រទេស​ជិត​ខាង​ដូច​ជា​ ថៃជា​ដើម​។

លោក​ សុ​ភមង្គល ​រំពឹង​ថា ស្ថាន​ភាព​កូវីដ​សកល​នឹង​ធូរ​ស្រាលហើយ​អាជី​វកម្ម​របស់​លោក​នឹង​វិវឌ្ឍ​ទៅមុខ​ដោយ​​រលូន​ដោយ​លោក​អាច ​«ចូល​រួមផ្សព្វ​ផ្សាយ​វប្បធម៌​ម្ហូប​អាហារ​ខ្មែរ​ទោះ​មិន​បាន​ទូលំ​ទូលាយ​ក៏បាន​ ១​ ផ្នែក​ដែរ​​ទៅ​កាន់​ពិភព​លោក»​៕

ព័ត៌មានថ្មីៗ