បណ្ណាល័យ «តោះអាន-Let’s Read» ដែលជួយលើកកម្ពស់ការអានរបស់កុមារក្នុងសម័យឌីជីថល។ រូបថត សហការី
.jpg)
ភ្នំពេញៈ ស្របពេលដែលប្រជាជនសឹងតែគ្រប់រូបមានទូរស័ព្ទស្មាតហ្វូនប្រើប្រាស់ និងបានវិវឌ្ឍទៅកាន់សម័យកាលឌីជីថល វាជារឿងមួយកាន់តែងាយស្រួលសម្រាប់កុមារក្នុងការធំធាត់ឡើងជាមួយបច្ចេកវិទ្យា ក៏ប៉ុន្តែឌីជីថល គឺជាអាវុធមុខ២ដែលអាចជួយឱ្យអ្នកប្រើប្រាស់រីកចម្រើនបាន តែក៏អាចធ្វើឱ្យអ្នកប្រើប្រាស់ខាតបង់បានដូចគ្នាដែរ។
ជាពិសេស អ្នកប្រើប្រាស់ដែលមិនបានយល់អំពីហានិភ័យនៃឌីជីថល តួយ៉ាងដូចជា កុមារតូចៗ គឺជាក្រុមដែលងាយប្រឈមក្នុងការក្លាយខ្លួនជាជនរងគ្រោះដោយឪពុកម្ដាយមិនបានដឹងជាមុន។
ស្របទៅតាមរបត់នៃសង្គមបច្ចុប្បន្ន អង្គការមូលនិធិអាស៊ីបានសហការជាមួយក្រុមហ៊ុន Starbucks កម្ពុជា ក្នុងការបង្កើតបណ្ណាល័យអនឡាញមួយឈ្មោះថា «តោះអាន-Let’s Read» ដើម្បីលើកកម្ពស់ការអានរបស់កុមារក្នុងសម័យឌីជីថលនេះ។ការសហការនេះក៏ដើម្បីបង្វែរការចាប់អារម្មណ៍របស់កុមារពីការលេងកម្សាន្ដលើប្រព័ន្ធអ៊ីនធឺណិត មកជាការអានរឿងដែលមានរូបភាពទាក់ទាញជាច្រើនក្បាល។
យុវតី២រូបដែលបានចូលរួមសរសេររឿងអប់រំសម្រាប់កុមារតូច និងដែលបានសម្ពោធស្នាដៃថ្មីថ្មោងនេះជាផ្លូវការកាលពីថ្ងៃទី ១៨ ខែវិច្ឆិកា កន្លងទៅ បានបង្ហាញនូវអារម្មណ៍រំភើបក្នុងការក្លាយខ្លួនជាចំណែកមួយជួយទៅដល់កុមារតូចៗ។
បច្ចុប្បន្នកញ្ញាជាអ្នកបង្កើតវេទិកាឱ្យក្រុមហ៊ុនឌីជីថលមួយ ហើយឆ្លៀតពីការងារស្នូលនេះ កញ្ញាបានចូលរួមសរសេរឱ្យបណ្ណាល័យឌីជីថល «តោះអាន» តាំងពីឆ្នាំ ២០១៩ ប៉ុន្តែសម្រាប់ឆ្នាំ ២០២២ នេះ ស្នាដៃថ្មីមួយទៀតរបស់កញ្ញាទទួលបានការរៀបចំបើកសម្ពោធជាផ្លូវការ។
«ប៉ូប៉ូ អ្នកច្នៃម៉ូដសក់ដ៏ល្បី» គឺជាស្នាដៃនិពន្ធរបស់យុវតី អម្រិន ពិសី ដែលសព្វថ្ងៃកញ្ញាមានអាយុ ២៤ ឆ្នាំ ជានិស្សិតដែលបញ្ចប់ការសិក្សាពីវិទ្យាស្ថានភាសាបរទេស។រឿងនេះបាននិយាយអំពីកូនចៀមញី ១ ក្បាល ដែលមានពិការភាពផ្នែកគថ្លង់ មិនអាចសន្ទនាជាមួយមិត្តដទៃទៀតបាន។
ប៉ុន្តែ ប៉ូប៉ូ មានជំនាញពីកំណើតមួយ គឺពូកែច្នៃម៉ូដសក់ដែលជំនាញនេះហើយបានធ្វើឱ្យមិត្តភក្ដិដទៃទៀតចាប់អារម្មណ៍និងសុំឱ្យចៀមនេះជួយច្នៃម៉ូដសក់ឱ្យគ្រប់គ្នា។ ក្រោយបានស្គាល់ពីចំណុចខ្លាំង របស់ខ្លួន ប៉ូប៉ូ បានបង្កើតសុបិនទៅថ្ងៃអនាគតមួយគឺក្លាយជាអ្នកច្នៃម៉ូដសក់។
បើតាមកញ្ញាពិសី ដែលជាម្ចាស់ស្នាដៃ រឿងនេះ គឺចង់ផ្ដល់កម្លាំងចិត្តដល់កុមារដែលមានពិការភាព ជាពិសេសក្មេងស្រី ឱ្យបន្តខិតខំរៀនសូត្រ និងហ៊ានបង្ហាញអ្វីដែលជាចំណុចខ្លាំងរបស់ខ្លួន។
កញ្ញា អម្រិន ពិសី៖ «សម្រាប់រឿងនេះដែរ ខ្ញុំចង់ប្រាប់ទៅក្មេងៗដែលមានពិការភាពគថ្លង់ថា ការដែលមានពិការភាពនេះមិនមែនជាឧបសគ្គក្នុងការប្រាស្រ័យទាក់ទងជាមួយនឹងអ្នកដទៃទេ ហើយចង់ប្រាប់កុមារីដែលមានពិការភាពគថ្លង់ កុំបាក់ទឹកចិត្ត រឹងមាំ ហើយស្វែងរកទេពកោសល្យរបស់ខ្លួនឯង ដើម្បីជួយជាប្រយោជន៍ដល់អនាគតរបស់ខ្លួន»។
ម៉ិល សុភាវត្តី គឺជាឈ្មោះរបស់អ្នកនិពន្ធវ័យក្មេងម្នាក់ទៀតដែលកញ្ញាទើបមានអាយុ ២៣ ឆ្នាំ ជានិស្សិតបញ្ចប់ការសិក្សាផ្នែកស្ថិតិវិទ្យាពីសាកលវិទ្យាល័យភូមិន្នភ្នំពេញ។ សព្វថ្ងៃផងដែរ កញ្ញាកំពុងបម្រើការងារនៅធនាគារជីបម៉ុង។
មិនខុសគ្នាប៉ុន្មានពីកញ្ញា ពិសី យុវតីរូបនេះក៏មានស្នាដៃ ដែលត្រូវបានដាក់សម្ពោធរួមគ្នាមួយផងដែរ។ ស្នាដៃរឿងអប់រំខ្លីរបស់កញ្ញាគឺ «នូនូ កូនខ្លាឃ្មុំញី» ដែលរឿងនេះនិយាយពីកូនខ្លាឃ្មុំញី ១ ក្បាល ចូលចិត្តកីឡាជិះកង់តាមភ្នំ។ ថ្ងៃមួយកូនខ្លាឃ្មុំញីនេះបានចូលរួមប្រកួតជិះកង់ឡើងភ្នំ ដែលបេក្ខនារីគឺមានតែរូបនាងម្នាក់គត់។នូនូ ទទួលបានការមាក់ងាយពីខ្លាឃ្មុំឈ្មោលផ្សេងទៀត ដែលធ្វើឱ្យនាងបាក់ទឹកចិត្ត និងចង់បោះបង់ចោលការប្រកួត។
ប៉ុន្តែដោយទទួលបានកម្លាំងចិត្តពីកូនខ្លាឃុំញី ១ ទៀត ដែលជាអ្នកទស្សនា ទើបនាងសម្រេចចិត្តបន្តការប្រកួត និងខិតខំហ្វឹកហាត់រហូតទទួលបានជ័យជម្នះ និងការកោតសរសើរពីខ្លាឃ្មុំឈ្មោលឯទៀត។
កញ្ញា ម៉ិល សុភាវត្តី បានរៀបរាប់ពីអត្ថន័យអប់រំថា៖ «រឿងនេះ គឺលើកទឹកចិត្តដល់កុមារីដែលមានក្ដីស្រមៃចង់ធ្វើការងារមួយដែលមិនសូវមានក្មេងស្រីផ្សេងធ្វើ...ម្យ៉ាងទៀតចង់លើកទឹកចិត្តពួកគេកុំឱ្យបោះបង់ដោយគ្រាន់តែពាក្យចំអក លេងសើច»។
ទាំង២ស្នាដៃនេះ គឺស្ថិតក្រោមមូលបទ «ផ្ដល់អំណាចដល់ស្ត្រី និងកុមារដែលមានពិការភាព» និងត្រូវបានដាក់ឱ្យអានតាមឌីជីថលលើគេហទំព័រផ្លូវការរបស់ «តោះអាន-Let’s Read»។ រាល់ស្នាដៃនិពន្ធទាំងអស់ ក៏ត្រូវបានឆ្លងកាត់ផងដែរនូវការពិនិត្យខ្លឹមសារឱ្យស្របតាមការអប់រំកុមារតូច ព្រមទាំងមានការរចនាជាគំនូរយ៉ាងទាក់ទាញទៀតផង។
អ្នកស្រី Meloney Lindberg ដែលជាតំណាងមូលនិធិអាស៊ីប្រចាំកម្ពុជាបានឱ្យដឹងថា បណ្ណាល័យឌីជីថលមួយនេះគឺដាក់ឱ្យប្រើប្រាស់ដោយឥតគិតថ្លៃសម្រាប់អ្នកអានដំបូងដែលមានអាយុពី ៥ ទៅ ១០ ឆ្នាំ។បណ្ណាល័យមួយនេះមានសៀវភៅចំនួន ៩ ពាន់ក្បាលក្នុង ៥១ ភាសាផ្សេងគ្នា ក្នុងនោះ សៀវភៅជាង ៥០០ ក្បាលជាភាសាខ្មែរ។
តំណាងអង្គការមូលនិធិអាស៊ីរូបនេះបន្ថែមថា៖ «ជាការសហការជាមួយក្រុមហ៊ុន starbucks យើងរួម គ្នាធ្វើក្រោមហេតុផលសំខាន់មួយ គឺការលើកកម្ពស់វប្បធម៌នៃការអានឱ្យកាន់តែច្រើននៅប្រទេសកម្ពុជា ដោយចាប់ផ្ដើមពីក្រុមកុមារតូចៗទៅ។»
ក្នុងនោះអ្នកស្រីក៏បង្ហាញការសាទរចំពោះយុវតីទាំង ២ រូប ដែលបានសម្ពោធស្នាដៃខ្លួនជាផ្លូវការ និងបន្តជំរុញឱ្យយុវជនយុវតីគ្រប់រូបចូលរួមក្នុងសកម្មភាពសង្គមផ្សេងៗដើម្បីជាប្រយោជន៍ដល់ការអភិវឌ្ឍជាតិទាំងមូល៕
