មជ្ឈមណ្ឌលបណ្ដុះបណ្ដាលសិប្បកម្មសច្ចៈ នៅក្នុងក្រុងសៀមរាប ត្រូវបានបើកសម្ពោធ កាលពីថ្ងៃទី ១១ មីនា។ រូបថត Satcha page
.jpg)
សៀមរាប: មជ្ឈមណ្ឌលបណ្ដុះបណ្ដាលសិប្បកម្មសច្ចៈ មានទីតាំងនៅក្នុងក្រុងសៀមរាប បានបើកសម្ពោធជាផ្លូវការហើយ ក្រោមអធិបតីភាពលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈកាលពីថ្ងៃទី ១១ ខែមីនា គឺជាមជ្ឈមណ្ឌលដំបូងគេនៅកម្ពុជាដែលបណ្តុះសិប្បករក្នុងស្រុកឱ្យមានជំនាញផ្នែកសិប្បកម្ម។
នៅក្នុងពិធីបើកសម្ពោធនេះ លោកស្រី សកុណា បានលើកឡើងពីសារៈសំខាន់ នៃការថែរក្សាចំណេះដឹងប្រពៃណីជាការផ្តោតខ្លាំងនៃរាជរដ្ឋាភិបាលអាណត្តិក្រោយ ផ្តួចផ្តើមដោយលោកនាយករដ្ឋមន្ត្រីហ៊ុន សែន ដែលទើបតែបានប្រកាសកម្មវិធីបណ្តុះបណ្តាលវិជ្ជាជីវៈថ្នាក់ជាតិដ៏ធំមួយ ក្នុងការបណ្តុះបណ្តាលមនុស្សពី ៣ ម៉ឺនទៅ ៦ ម៉ឺននាក់ក្នុងវិស័យសិប្បកម្ម។
លោកស្រីបានថ្លែងថា លោកស្រីបានថ្លែងអំណរគុណចំពោះសហស្ថាបនិកសច្ចៈដែលបានជួយថែរក្សាចំណេះដឹងប្រពៃណី និងអត្តសញ្ញាណជាតិ ក៏ដូចជាបានសហការគ្នាជាមួយក្រសួងវប្បធម៌នាពេលកន្លងមក និងទៅថ្ងៃអនាគតដោយភ្ជាប់មកជាមួយកម្មវិធីបណ្តុះបណ្តាលថ្មីនេះ។
ថ្មីៗនេះមជ្ឈមណ្ឌលផ្តល់ការបណ្តុះបណ្តាលដល់អ្នកដែលស្រឡាញ់ការសិក្សា និងលើកកម្ពស់កម្រិតជីវភាពរបស់ពួកគេតាមរយៈការផលិតនូវផលិតផលសិប្បកម្ម។ នេះបើយោងតាមលោក Romano Pierre-Andre នាយកប្រតិបត្តិ និងជាសហស្ថាបនិកនៃមជ្ឈមណ្ឌលបណ្ដុះបណ្ដាលសិប្បកម្មសច្ចៈ។
លោក Pierre-Andre បានប្រាប់ភ្នំពេញប៉ុស្តិ៍ថា៖«រហូតមកដល់ពេលនេះ មជ្ឈមណ្ឌលបានជ្រើសរើសអ្នកសិក្សាជាង៤០នាក់ក្នុងចំណោម ៣០០នាក់ដែលបានដាក់ពាក្យសុំក្នុងកម្មវិធីផ្ដួចផ្ដើមការបណ្ដុះបណ្ដាលរបស់យើង»។
លោក Pierre-Andre បាននិយាយថា សិប្បករពី២០ ទៅ៤០នាក់ទៀត នឹងចូលរួមក្នុងរយៈពេល៣ខែខាងមុខនេះ នៅនឹងកន្លែង ឬនៅលើសិក្ខាសាលាដែលមជ្ឈមណ្ឌលគ្រោងនឹងសាងសង់នៅតំបន់ជនបទ។
ជាមួយនឹងការរស់នៅក្នុងប្រទេសកម្ពុជាអស់រយៈពេលជាង៣ទសវត្សរ៍ លោក Pierre-Andre បាននិយាយថា លទ្ធផលរបស់សិប្បករមិនមានភាពវិជ្ជមានខ្លាំងសម្រាប់ការងារសិប្បកម្មរបស់ពួកគេឡើយ បន្ទាប់ពីធ្វើការក្នុងវិស័យនេះអស់រយៈពេលជាច្រើនឆ្នាំ។
លោកថា ពួកគេទាំងនោះកំពុងធ្វើការជាមួយក្រុមហ៊ុនសិប្បករធំៗ ដែលបរាជ័យក្នុងបេសកកម្មសង្គមដោយផ្តល់ប្រាក់ខែតិច និងឱកាសតិចតួចដល់សិប្បករ ដើម្បីរីកចម្រើនលើជណ្ដើរសង្គម ឬគាំទ្រដោយអង្គការក្រៅរដ្ឋាភិបាលជាមួយនឹងគំរូមិននិរន្តរភាពដោយពឹងអាស្រ័យលើជំនួយ។
លោកនិយាយថា៖«នោះហើយជាមូលហេតុដែលយើងសម្រេចចិត្តបើកដំណើរការសច្ចៈ ជាកន្លែងដែលយើងផ្តល់ឱ្យពួកគេនូវសិក្ខាសាលា ឧបករណ៍ វត្ថុធាតុដើម និងកម្មវិធីបណ្តុះបណ្តាលពី២ទៅ៣ឆ្នាំ ដើម្បីជួយពួកគេឱ្យកាន់តែមានភាពឯករាជ្យ និងបង្កើតក្រុមហ៊ុនសិប្បកម្មផ្ទាល់ខ្លួនរបស់ពួកគេ»។
មជ្ឈមណ្ឌលនេះមានជាងចម្លាក់ថ្ម ជាងចម្លាក់ឈើ ជាងគំនូរម្រ័ក្សណ៍ខ្មុក ជាងចម្លាក់ ជាងតម្បាញសូត្រ/កប្បាស និងតម្បាញផ្តៅ ជាងចម្លាក់ស្បែក និងអ្នកផលិតគ្រឿងអលង្ការសម្រាប់ជំនាញបច្ចេកទេស។
លោក Pierre-Andre បាននិយាយថា សម្រាប់ជំនាញទន់ មជ្ឈមណ្ឌលចាប់ផ្តើមដោយភាសា(អក្ខរកម្មខ្មែរនិងភាសាអង់គ្លេស) ទំនាក់ទំនងប្រព័ន្ធផ្សព្វផ្សាយសង្គម និងទីផ្សារ បន្ទាប់មកប្រវត្តិសិល្បៈ និងការរចនា ហិរញ្ញវត្ថុ និងបរិយាកាសច្បាប់ និងគ្រប់ជំនាញដែលត្រូវការដើម្បីក្លាយជាសហគ្រិនឯករាជ្យ។
នៅក្រោមដំបូលនៃសំណង់ឫស្សី បង្ហាញពីចំណេះដឹងបែបបុរាណខ្មែរក្នុងការច្នៃម៉ូដសហសម័យ សិប្បករកំពុងធ្វើកន្ដ្រកផ្តៅល្ពាក់ដោយដៃ ជាផលិតផលដែលចំណាយពេល២-៣ថ្ងៃដើម្បីបញ្ចប់ការងារនីមួយៗ។
សិប្បករអាចរក្សាជំនាញសិប្បកម្មប្រពៃណីរបស់ពួកគេ និងជួយគ្រួសាររបស់ពួកគេផងដែរ នេះបើយោងតាមនាយកប្រតិបត្តិ និងជាសហស្ថាបនិកនៃមជ្ឈមណ្ឌលញុះញង់សិប្បកម្មដំបូងគេបង្អស់របស់កម្ពុជា។
លោក Pierre-Andre បាននិយាយថា៖ «សម្រាប់ការរចនាសំណង់សិក្ខាសាលា យើងបានធ្វើការជាមួយក្រុមហ៊ុន Green Bamboo Cambodia ជាសហគ្រាសសង្គមដែលបង្កើតឡើងដោយលោកស្រី Caroline Chau ជាស្ត្រីខ្មែរកើតនៅប្រទេសបារាំងដែលបានត្រឡប់មកកម្ពុជាវិញ ដើម្បីលើកស្ទួយឫស្សីជាសម្ភារដែលមាននិរន្តរភាពបំផុតសម្រាប់ការសាងសង់ និងដើម្បីស្តារឡើងវិញនូវខ្សែចង្វាក់តម្លៃឫស្សីនៅកម្ពុជា»។
លោកថា អ្នកសាងសង់ជាជនជាតិខ្មែរ ហើយឫស្សីមកពីខេត្តកំពង់ចាម។ ការរចនានេះត្រូវបានយកលំនាំតាមសាលាខ្មែរបុរាណ ប៉ុន្តែត្រូវបានធ្វើឱ្យទាន់សម័យដើម្បីបង្ហាញពីសក្តានុពលនៃឫស្សី។
សំណង់សិក្ខាសាលាកណ្តាល ដែលមានរូបរាងប្លែកត្រូវបានបំផុសគំនិតដោយផ្ទះវែងបែបប្រពៃណីពីខេត្តមណ្ឌលគិរី។ នេះបើយោងតាមលោក Pierre-Andre ដែលបាននិយាយថា គាត់ស្រឡាញ់សិល្បៈ និងសិប្បកម្មកម្ពុជា។
លោក Pierre-Andre បានបន្ដថា លោកសង្ឃឹមថា មជ្ឈមណ្ឌលនេះជាការចូលរួមចំណែកអភិរក្សប្រពៃណីខ្មែរ ដែលជឿថាការបណ្ដុះបណ្ដាលនេះនឹងជួយរក្សាចំណេះដឹងប្រពៃណី ក៏ដូចជាការបង្កើតការរចនាសិល្បៈសហសម័យបន្ថែមទៀតដោយផ្អែកលើវប្បធម៌ខ្មែរដើម្បីទាក់ទាញយុវជនជំនាន់ក្រោយ។
លោកបន្ថែមថា៖«ជំនាញទាំងអស់នេះគឺជាសិប្បកម្មប្រពៃណីខ្មែរតាំងពីរាប់ពាន់ឆ្នាំមកម្ល៉េះ។ ឧទាហរណ៍ យើងទាំងអស់គ្នាបានដឹងអំពីចម្លាក់ដូនតានៅលើប្រាសាទ ប៉ុន្តែយើងក៏បានរកឃើញគ្រឿងអលង្ការនៅប្រទេសកម្ពុជាដែលមានអាយុកាលជាង ១ពាន់ឆ្នាំផងដែរ ដែលលោក Zhou Daguan បានពិពណ៌នាអំពីក្រណាត់ដ៏ស្រស់ស្អាតដែលត្បាញដោយប្រជាជនខ្មែរ ហើយគ្រឿងសេរ៉ាមិចមួយចំនួនត្រូវបានបង្កើតឡើងក្នុងប្រទេសកម្ពុជា មានអាយុកាលតាំងពីសតវត្សរ៍ទី១ ឬទី២មុនគ.ស»។
នៅក្នុងមជ្ឈមណ្ឌលនេះមានគ្រូសិប្បកម្មដែលមានបទពិសោធន៍ជាង២០ឆ្នាំ បង្រៀនជំនាញបច្ចេកទេស និងមានគ្រូបណ្តុះបណ្តាលទាំងខាងក្នុង និងខាងក្រៅ។
លោក Pierre-Andre បាននិយាយថា មជ្ឈមណ្ឌលនេះមិនមែនជាអង្គការក្រៅរដ្ឋាភិបាលទេ ប៉ុន្តែជាក្រុមហ៊ុនឯកជនសង្គមដែលមិនទាន់មាននៅក្នុងប្រទេសកម្ពុជានៅឡើយ។ ដើម្បីធានានិរន្តរភាព មជ្ឈមណ្ឌលប្តេជ្ញាវិនិយោគ ២ភាគ៣ នៃប្រាក់ចំណេញទៅឱ្យសង្គម ការបណ្តុះបណ្តាលបន្ថែម និងសិក្ខាសាលាជាច្រើនក្នុងខេត្តផ្សេងៗទៀត។
លោកបានឱ្យដឹងថា៖ «ខ្ញុំក៏សូមបន្ថែមថា សច្ចៈ គឺជាក្រុមហ៊ុនបណ្តាក់ទុនរបស់ខ្មែរ ដោយមានបុគ្គលិក១០០ភាគរយ និងសិប្បករជាជនជាតិខ្មែរ ហើយ២ភាគ៣ នៃការវិនិយោគដែលផ្តល់ដោយធុរកិច្ចកម្ពុជា មានឆន្ទៈគាំទ្រគំនិតផ្តួចផ្តើមនេះ។ ខ្ញុំក៏មានគម្រោងដកខ្លួនថយនាពេលអនាគត ហើយធ្វើការតែលើការអភិវឌ្ឍជាយុទ្ធសាស្ត្ររបស់សច្ចៈ ដូចដែលយើងបានកំណត់អត្តសញ្ញាណយុវនារីកម្ពុជាម្នាក់ ជានាយិកាគ្រប់គ្រងនាពេលអនាគត ហើយគាត់នឹងចូលរួមជាមួយយើងនៅចុងឆ្នាំនេះ ដើម្បីដឹកនាំមជ្ឈមណ្ឌលបន្ដ»។
នៅក្នុងអគាររចនាបែបខ្មែរ មជ្ឈមណ្ឌលបណ្ដុះបណ្ដាលសិប្បកម្មសច្ចៈ បើក៧ថ្ងៃក្នុង១សប្តាហ៍ ចាប់ពីម៉ោង៨ព្រឹកដល់ ៧យប់ ដោយមានការចូលទស្សនាដោយឥតគិតថ្លៃហើយប្រាក់ចំណូល គឺផ្អែកលើការលក់ផលិតផលធ្វើដោយដៃ។
សម្រាប់ព័ត៌មានលម្អិត សូមទៅកាន់ទំព័រហ្វេសប៊ុកwww.facebook.com/satchahandicraftcambodia និងវេបសាយ https://satcha-handicraft.com/៕
