ភាពយន្ដ​ភាគ ឡូយ ៩ រដូវកាល​ថ្មី លាត​ត្រដាង​ពី​បញ្ហា និង​ការ​ដោះស្រាយ​ជម្លោះ​របស់​យុវវ័យ


Content image - Phnom Penh Post

សំឡេង​រាប់​ថយ​ក្រោយ​បាន​បន្លឺ​ឡើង «៥ ៤ ៣ ២ ១ Action!» ម៉ូតូ​ចាប់​ផ្ដើម​រោទ៍​ដ៏​ទ្រហឹង​រួច​បោះ​ពួយ​យ៉ាង​លឿន​ខណៈ​ពេល​ដែល​នារី​ពីរ​នាក់​រត់​ដេញ​តាម​ពី​ក្រោយ​បុរស​ម្នាក់​ដោយ​ស្រែក​ឡើង ថា «ចោរៗ!»។ បុរស​ជា​ចោរ​លួច​កាបូប​នោះ​បាន​រត់​ចូល​ផ្ទះ​បាក់​បែក​មួយ​ខ្នង​នៅ​ពេល​នារី​ទាំង​ពីរ​ដេញ​ពី​ក្រោយ​ស្រប​ពេល​តួ​អង្គ​ប្រុស​បាន​ជិះ​ម៉ូតូ​មក​ដល់ និង​ជួយ​ដេញ​ចាប់​ចោរ​នោះ។ នេះ​ជា​ការ​ថត​ភាពយន្ដ​ភាគ​របស់ ឡូយ ៩ ក្នុង​ឈុត​ឆាក​មួយ​សម្រាប់​រដូវកាល​ថ្មី (Loy9 TV Series Three)។

លោក ជ័យ សម្បត្ដិ ជា​អ្នក​ដឹក​នាំ​ភាពយន្ដ​ដែល​កំពុង​តែ​ថត​នេះ​បាន​បង្ហើប​ប្រាប់​ថា ផ្ទៃ​រឿង​ទាំង​មូល​ផ្ដោត​លើ​ការ​កម្សាន្ដ​បង្កប់​ន័យ​អប់រំ​ដែល​ពាក់ព័ន្ធ​នឹង​បញ្ហា​របស់​យុវជន​កំពុង​ប្រឈម​នា​ពេល​បច្ចុប្បន្ន​នេះ។

លោក​បាន​បន្ដ​ថា យុវតី ៣នាក់ នៅ​ក្នុង​រឿង​នេះ​បាន​ជួប​ជុំ​គ្នា​វិញ​ក្រោយ​ពី​ជីតា​ទទួល​មរណភាព​ដោយ​នាំ​គ្នា​យក​ធាតុ​របស់​គាត់​ទៅ​ស្រុក​កំណើត។ ប៉ុន្ដែ​នៅ​ពេល​ពួកគេ​បាន​រក​ឃើញ​តម្រុយ​ខ្លះ​អំពី​កំណប់​ស្រាប់​តែ​ជួប​នឹង​ហេតុការណ៍​ចោរ​លួច​កាបូប​នៅ​តាម​ផ្លូវ​និង​ធ្វើ​ឲ្យ​អ្នក​ទាំង​នឹក​ឃើញ​ពី​គំនុំ​អតីតកាល។

អ្នក​ដឹក​នាំ​រឿង​វ័យ ២៧ឆ្នាំ រូប​នេះ​បាន​ឲ្យ​ដឹង​ថា សារៈ​ដ៏​សំខាន់​ក្នុង​រឿង​នេះ​បាន​បង្ហាញ​ពី​បញ្ហា​របស់​យុវវ័យ និង​ការ​ដោះស្រាយ​ជម្លោះ​ជា​បុគ្គល និង​ការ​ចេះ​ជួយ​ដោះស្រាយ​ឲ្យ​អ្នក​ដទៃ​តាម​សន្ដិវិធី​ដោយ​យក​បញ្ហា​ទាំង​នោះ​មក​ជជែក​វែក​ញែក។

លោក​បន្ដ​រៀបរាប់​អំពី​ឈុត​ខាង​លើ​នេះ​ថា៖ «វា​បាន​បង្ហាញ​ពី​ដំណើរ​ជីវិត​ដ៏​ចម្រូង​ចម្រាស​របស់​យុវតី​ជា​បង​ប្អូន​ជីដូន​មួយ​ដែល​ច្រណែន​ឈ្នានីស​គ្នា​ដណ្ដើម​សង្សារ និង​គំនុំ​គុំកួន​តាំង​ពី​កុមារភាព។ ដោយ​សារ​តែ​ភាព​មិន​ចាញ់​មិន​ឈ្នះ​គ្នា​ពួកគេ​បាន​សើរើ​គំនុំ​ទាំង​អម្បាម៉ាន​ក្រោយ​ពេល​ដំណើរ​រួម​គ្នា​ដោយ​យក​នាំ​ធាតុ​ជីតា​ដែល​បាន​ស្លាប់​ទៅ​បាច​ក្នុង​ទឹក​ស្ទឹង លើ​ភ្នំ និង​សមុទ្រ​តាម​បណ្ដាំ»។

លោក​បាន​បន្ថែម​ថា ជម្លោះ​ភាគ​ច្រើន​របស់​យុវជន​កើត​ចេញ​ពី​ជម្លោះ​បុគ្គល និង​ជា​ក្រុម​ដែល​មិន​មែន​ជា​សង្គ្រាម ឬ​ក៏​ទំនាស់​ធំ​ដុំ​នៅ​ឆ្ងាយ​ពី​យុវជន​នោះ​ទេ។

កញ្ញា មាន សូនីតា ជា​តួអង្គ «យ៉ាណា» នៅ​ក្នុង​សាច់​រឿង​នេះ បាន​រៀប​រាប់​ប្រាប់​ថា យ៉ាណា ជា​អ្នក​ដណ្ដើម​សង្សារ​ពី​មិត្ដភក្ដិ​ដ៏​ជិត​ស្និទ្ធ​របស់​ខ្លួន​ឈ្មោះ វណ្ណឌី សម្ដែង​ដោយ​កញ្ញា ប៊ីរីយ៉ា។ កញ្ញា​ថា វណ្ណឌី ក៏​ជា​មនុស្ស​ចង់​ចាញ់​ចង់​ឈ្នះ​ជាមួយ​ខ្លួន​ដែរ។

140129_04a
នេះជាឈុតឆាកកញ្ញា សូនីតា និងប៊ីរីយ៉ា រត់ដេញតាមចោរលួចកាបូបដែលមានផ្ទុកផែនទីទៅរកកំណប់ ហុង រស្មី

កញ្ញា​បាន​បន្ថែម​ថា នៅ​ក្នុង​សាច់​រឿង​នោះ យ៉ាណា បាន​ប្រែ​ក្លាយ​ជីវិត​ពី​យុវតី​ដែល​ជិត​មើល​ឃើញ​ពន្លឺ​ទៅ​ហើយ ប៉ុន្ដែ​ដោយ​សារ​ធ្លាក់​ខ្លួន​មាន​ផ្ទៃពោះ​មិន​សម​បំណង និង​រំលូត​កូន​ចោល​ដែល​លេច​ឮ​ព័ត៌មាន​នេះ​ដល់​ឪពុក​ម្ដាយ គម្រោង​ត្រៀម​បន្ដ​ការ​សិក្សា​នៅ​បរទេស​តាម​រយៈ​អាហារូបករណ៍​ត្រូវ​បាន​រលាយ​បាត់​ទៅ​វិញ។

កញ្ញា​បាន​លើក​ឡើង​ថា៖ «ខ្ញុំ និង វណ្ណឌី ជា​សិស្ស​ពូកែ​ដូច​គ្នា។ ប៉ុន្ដែ​ដោយ​សារ​ខ្ញុំ​ទៅ​ដណ្ដើម​សង្សារ​របស់ វណ្ណឌី និង​មាន​ផ្ទៃពោះ វណ្ណនី បាន​ប្រាប់​រឿង​នេះ​ដល់​ឪពុក​ម្ដាយ​របស់​ខ្ញុំ ខ្ញុំ​មិន​បាន​ទៅ​សិក្សា​នៅ​បរទេស​ទេ ហើយ​អនាគត​របស់​ខ្ញុំ​ត្រូវ​ចប់»។

តួអង្គ យ៉ាណា រូប​នេះ បាន​បន្ដ​ថា ភាពយន្ដ​នេះ​បាន​ឆ្លុះ​បញ្ចាំង​ពី​តថភាព​ជាក់ស្ដែង​ក្នុង​សង្គម​ដែល​យុវជន ខ្មែរ​កំពុង​ជួប​ប្រទះ​នា​ពេល​បច្ចុប្បន្ន​នេះ​។ កញ្ញា​ជឿ​ជាក់​ថា យុវជន​សម័យ​ឥឡូវ​មាន​ការ​យល់​ដឹង​ច្រើន​ពី​បញ្ហា​ផ្សេងៗ និង​ចេះ​ដោះស្រាយ ព្រម​ទាំង​ចេះ​ការពារ​ពី​ការ​ជ្រុល​ជ្រួស​ខ្លួន​ជាដើម។

អតីត​និស្សិត​សាកល​វិទ្យាល័យ ភូមិន្ទ​ភ្នំពេញ ផ្នែក ដេប៉ាតឺម៉ង់ ប្រព័ន្ធ​ផ្សព្វ​ផ្សាយ និង​សារគមនាគមន៍ (DMC) លោក ជ័យ សម្បត្ដិ ពន្យល់​ប្រាប់​ពី​ផល​ពិបាក​ក្នុង​ការ​ថត​ភាពយន្ដ​នេះ​ថា៖ «ការ​ថត​នៅ​លើ​ដង​ផ្លូវ​ដែល​មាន​រថយន្ដ​បើកបរ​ឆ្លង​កាត់​បង្ក​ជា​សំឡេង លាន់​ឮ​រំខាន​ដល់​ការ​សន្ទនា និង​ការ​សម្លឹង​មើល​ចុះ​ឡើងៗ​របស់​អ្នក​ដំណើរ​ដែល​ធ្វើ​ឲ្យ​ខុស​ពី​ការ ធ្វើ​ដំណើរ​ធម្មតា​ពីព្រោះ​ភាពយន្ដ​នេះ​ត្រូវ​ផ្ដិត​យក​សំឡេង​ពិតៗ​របស់​តួ​អង្គ​តែ​ម្ដង។ ម្យ៉ាង​វិញ​ទៀត​ខ្ញុំ​បារម្ភ​ពី​បញ្ហា​គ្រោះថ្នាក់​ជាយថាហេតុ​ណា​មួយ​ដែល​បាន​កើត​ឡើង​នៅ​ពេល​តួ​អង្គ​កំពុង​សម្ដែង​លើ​ដង​ផ្លូវ ពីព្រោះ​ការ​ថត​មិន​អាច​បិទ​ផ្លូវ​នោះ​ទេ»។

អ្នក​ដឹក​នាំ​រឿង​វ័យ​ក្មេង​រូប​នេះ បន្ដ​ទៀត​ថា៖ «ក្រុម​ការងារ​របស់​ខ្ញុំ ព្រម​ទាំង​តួ​អង្គ​ត្រូវ​ថត​នៅ​ក្នុង​ល្អាង​រហូត​ដល់​រយៈ​ពេល ២ សប្ដាហ៍។ យើង​ត្រូវ​ធ្វើ​កិច្ចការ​ជាច្រើន​ខណៈ​ពេល​ថត​ក្នុង​ល្អាង​ទាំង​នោះ ដូចជា ការ​ជញ្ជូន​ឧបករណ៍​បំភ្លឺ និង​សម្ភារ​ផ្សេងៗ​ចូល​ចេញ ដោយ​សារ​តែ​ល្អាង​មាន​សភាព​ងងឹត​ស្លុប និង​តូច​ចង្អៀត»។

លោក បាន​បញ្ជាក់​ថា ការ​សម្ដែង​របស់​តួអង្គ​ដែល​ភាគ​ច្រើន​កើត​ចេញ​ពី​ជីវិត​ពិត​របស់​យុវជន កម្ពុជា គឺជា​គំរូ​ដ៏​ល្អ​សម្រាប់​យុវជន​ដទៃ ដោយ​សារ​សាច់​រឿង​នីមួយៗ​របស់ ឡូយ ៩ សុទ្ធ​តែ​ផ្ដល់​ការ​កម្សាន្ដ និង​បង្កប់​ន័យ។

កញ្ញា ធន់ សូនីនា ដែល​ជា​បុគ្គលិក​ទំនាក់​ទំនង​នៅ​អង្គការ BBC Media Action បាន​ប្រាប់​ឲ្យ​ដឹង​ថា ភាពយន្ដ (Loy9 TV Series Three) នឹង​ត្រូវ​ដាក់​បញ្ចាំង​លើ​កញ្ចក់​ទូរទស្សន៍ MyTV នៅ​ថ្ងៃ ទី២៤ ខែ មីនា ឆ្នាំ ២០១៤ ខាង​មុខ​នេះ និង​ចាក់​ផ្សាយ​ឡើង​វិញ​នៅ​ទូរទស្សន៍ CTN និង CNC៕

ព័ត៌មានថ្មីៗ