ភ្នំពេញៈ ក្រសួងសាធារណការ និងដឹកជញ្ជូនបាននិងកំពុងពិភាក្សាជាមួយក្រុមហ៊ុនសាងសង់ផ្លូវល្បឿនលឿនភ្នំពេញ-កំពង់សោម ដើម្បីបើកឱ្យប្រើប្រាស់សាកល្បងក្នុងរយៈពេលខ្លីប្រមាណជា ១ សប្ដាហ៍ ឬ ១ ខែដោយឥតគិតថ្លៃ មុនពេលដែលក្រុមហ៊ុនកំណត់តម្លៃជាផ្លូវការសម្រាប់អ្នកប្រើប្រាស់។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងឱ្យដឹង ក្នុងពេលចុះពិនិត្យមើលវឌ្ឍនភាពនៃការសាងសង់ផ្លូវល្បឿនលឿនភ្នំពេញ-ក្រុងព្រះសីហនុនៅថ្ងៃទី ២១ ខែមិថុនា ឆ្នាំ ២០២១ ថា៖ «ខ្ញុំស្នើឱ្យក្រុមហ៊ុនជួយពន្លឿនការសាងសង់ឱ្យចប់នៅខែ ៩ ឆ្នាំ ២០២២ ខ្ញុំក៏ពិភាក្សាជាមួយក្រុមហ៊ុនថា គួរអនុញ្ញាតឱ្យ ១ អាទិត្យ ឬ ១ ខែ ឱ្យប្រជាពលរដ្ឋប្រើប្រាស់ដោយឥតគិតថ្លៃសិន ឱ្យគាត់ស្គាល់ផ្លូវល្បឿនលឿនកម្ពុជាយើង»។
លោកបញ្ជាក់ថា គម្រោងសាងសង់ផ្លូវល្បឿនលឿន ភ្នំពេញ-ព្រះសីហនុ ត្រូវប្រើពេលសាងសង់ ៤៨ ខែ ដែលត្រូវបញ្ចប់នៅឆ្នាំ ២០២៣។ លោកនឹងស្នើឱ្យក្រុមហ៊ុនពិចារណាកំណត់តម្លៃឱ្យបានទាបបំផុតសម្រាប់អ្នកប្រើប្រាស់ផ្លូវនេះ ដើម្បីឱ្យស្របទៅនឹងការរីកចម្រើនសេដ្ឋកិច្ចនៅកម្ពុជា បើប្រៀបនឹងតម្លៃនៅក្នុងពិភពលោក សេវាបង់ថ្លៃផ្លូវល្បឿនលឿនបែបនេះ អាចចំណាយប្រហែល ២០ ដុល្លារអាមេរិកក្នុងចម្ងាយប្រមាណ ២០០ គីឡូម៉ែត្រ។
គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដែលមានប្រវែងសរុបជាង ១៩០ គីឡូម៉ែត្រ សម្រេចបាន ៥៥ ភាគរយ បន្ទាប់បើកការដ្ឋានកាលពីថ្ងៃទី ២២ មីនា ឆ្នាំ ២០១៩។ គម្រោងសាងសង់ផ្លូវល្បឿនលឿននេះចំណាយថវិកាសាងសង់សរុប ២ ពាន់លានដុល្លារអាមេរិក ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន៕
វីដេអូ៖