ភ្នំពេញៈ ក្រសួងសុខាភិបាល បានកំណត់ដាក់រាជធានីភ្នំពេញជាតំបន់ដំបូងក្នុងការប្រើនីតិវិធីប្រតិបត្តិស្តង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ កម្រិតស្រាលនៅផ្ទះចាប់ពីថ្ងៃទី ២០ ខែមិថុនា ប៉ុន្តែសម្រាប់នៅតាមបណ្តាខេត្តផ្សេងៗនឹងត្រូវកំណត់នៅពេលក្រោយ។
ការសម្រេចនេះធ្វើឡើងតាមរយៈប្រកាសលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ កាលពីយប់ថ្ងៃទី ២០ ស្តីពី «ការដាក់ឱ្យប្រើនីតិវិធីប្រតិបត្តិស្តង់ដាសម្រាប់គ្រប់គ្រងថែទាំ និងព្យាបាលអ្នកជំងឺកូវីដ ១៩ នៅតាមផ្ទះ»។
លោកលើកឡើងថា៖ «ការដាក់ឱ្យដំណើរការការព្យាបាលអ្នកជំងឺកូវីដ ១៩ កម្រិតស្រាល និងគ្មានរោគសញ្ញានៅតាមផ្ទះ សម្រាប់ភូមិសាស្ត្រខេត្តផ្សេងទៀតត្រូវកំណត់ដោយប្រកាសរបស់ក្រសួងសុខាភិបាល នៅពេលក្រោយ ផ្អែកតាមកម្រិតនៃការឆ្លងរាលដាលនៃជំងឺកូវីដ ១៩ ក្នុងភូមិសាស្ត្រនីមួយៗ»។
លោករដ្ឋមន្ដ្រីបញ្ជាក់ថា ការសម្រេចរៀបចំដាក់អ្នកជំងឺកូវីដ ១៩ កម្រិតស្រាលព្យាបាលនៅតាមផ្ទះ ដោយយោងទៅតាមការណែនាំរបស់អង្គការសុខភាពពិភពលោកផង និងដើម្បីជាការកាត់បន្ថយបន្ទុកទៅលើប្រព័ន្ធសុខាភិបាលផង ដើម្បីទុកកន្លែងទំនេរទទួលអ្នកជំងឺដែលមានអាការធ្ងន់ធ្ងរ។ ជាងនេះកម្ពុជា មានអ្នកជំងឺកូវីដ ១៩ រហូតដល់ ៨០ ភាគរយ គឺជាអ្នកជំងឺស្ថិតក្នុងកម្រិតស្រាល ដែលករណីនេះ ពួកគាត់អាចធ្វើការព្យាបាលនៅតាមផ្ទះបាន ដែលមានក្រុមគ្រូពេទ្យចុះតានដានសុខភាពជាប្រចាំ និងជាក់លាក់ ឯ ៥% នៃអ្នកជំងឺមានកម្រិតធ្ងន់ និង ១៥% ត្រូវការសង្គ្រោះបន្ទាន់។
លោក ម៉ម ប៊ុនហេង បន្តថា៖ «ក្រសួងសុខាភិបាលសង្ឃឹមយ៉ាងមុតមាំ ចំពោះកិច្ចសហការដ៏ល្អ នៅគ្រប់មូលដ្ឋានសុខាភិបាលក្នុងការអនុវត្តនីតិវិធីស្តង់ដា សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ។ ក្រសួងនឹងធ្វើការបណ្តុះបណ្តាលគ្រូបង្គោលនៃមន្ទីរសុខាភិបាលរាជធានី ខេត្តទាំងអស់ ដើម្បីបណ្តុះបណ្តាលបន្តដល់មន្ត្រី បុគ្គលិក និងក្រុមគ្រូពេទ្យនៅតាមមូលដ្ឋានរៀងៗខ្លួន»។
ជាមួយគ្នានេះ ក្រសួងសុខាភិបាលបានកំណង់ឱ្យអ្នកជំងឺកូវីដ ១៩ ដែលព្យាបាលនៅផ្ទះត្រូវផ្តោតទៅលើការធ្វើអនាម័យ ការទុកដាក់សំណល់ពីការប្រើប្រាស់ និងកិច្ចសន្យាយល់ព្រមធ្វើការថែទាំ និងព្យាបាលជំងឺកូវីដ ១៩នៅផ្ទះ ការទទួលខុសត្រូវរបស់អាជ្ញាធរមូលដ្ឋាន ជាពិសេសការបែងចែកឱសថព្យាបាលរោគសញ្ញាដល់អ្នកជំងឺកូវីដ ១៩ តាមការចាំបាច់ការទទួលខុសត្រូវរបស់មន្ទីរសុខាភិបាល និងលក្ខខណ្ឌនៃការបញ្ចប់ការព្យាបាលជំងឺកូវីដ ១៩ សម្រាកព្យាបាលនៅផ្ទះ។
ទោះបីជាយ៉ាងណា ចំពោះការសម្រាកព្យាបាលនៅតាមផ្ទះនេះ ក៏ត្រូវផ្អែកលើស្ថានភាពមួយចំនួនរបស់អ្នកជំងឺផងដែរ ដូចជាអ្នកជំងឺគ្មានរោគសញ្ញា ឬមានរោគសញ្ញាកម្រិតស្រាល អាយុមិនលើសពី ៦០ ឆ្នាំ មិនមែនជាអ្នកជក់បារីរ៉ាំរ៉ៃ មិនមែនជាអ្នកធាត់ និងមិនមែនជាអ្នកមានជំងឺរ៉ាំរ៉ៃប្រចាំកាយ។ ជាងនេះផ្ទះអ្នកជំងឺត្រូវតែមានស្ថានភាពល្អប្រសើរ ដូចជាមានបន្ទប់ដាច់ដោយឡែក ជាដើម។
យោងតាមនីតិប្រតិបត្តិស្តង់ដា ករណីអ្នកជំងឺកម្រិតស្រាលគឺសំដៅលើមានផ្តាសាយ ហៀរសំបោរ ឈឺបំពង់ក ឈឺសាច់ដុំ និងសន្លាក់ កម្តៅតិចជាង ៣៨ អង្សាសេ កំហាប់អុកស៊ីហ្ស៊ែន ចាប់ពី ៩៥% ឡើង ចង្វាក់ដង្ហើមធម្មតា (១៨-២០ ដងក្នុង ១ នាទីសម្រាប់មនុស្សពេញវ័យ) និងមិនមែនជាជនងាយប្រឈម។
កាលពីថ្ងៃទី ៦ ខែមេសា លោកនាយករដ្ឋមន្ត្រី ហ៊ុន សែន បានស្នើឲ្យក្រសួងសុខាភិបាលសិក្សាលើករណីព្យាបាលអ្នកជំងឺកូវីដកម្រិតស្រាលនៅតាមផ្ទះ ដោយលោកបញ្ជាក់ថា បើទោះបីជាកម្ពុជារៀបចំមន្ទីរពេទ្យប៉ុន្មានទៀត ក៏មិនគ្រប់ដែរ ដូច្នេះវិធីដោះស្រាយគឺមានតែទុកអ្នកមានវិជ្ជមានកូវីដ ១៩ កម្រិតស្រាលព្យាបាលនៅតាមផ្ទះប៉ុណ្ណោះ ដោយមានការវិនិច្ឆ័យឲ្យបានច្បាស់លាស់។
លោកលើកឡើងថា៖ «ការព្យាបាលនៅតាមផ្ទះនេះ ក៏មិនមែនជាការរុញចេញពីទំនួលខុសត្រូវរបស់រាជរដ្ឋាភិបាលនោះដែរ ពោលគឺរដ្ឋនឹងរៀបចំការឧបត្ថម្ភ ចំពោះពួកគាត់ ដោយត្រូវផ្ដល់ថវិកា ២ ម៉ឺនរៀលក្នុងមួយថ្ងៃ ជូនអ្នកដែលត្រូវព្យាបាលនៅតាមផ្ទះ»។
លោក ហ៊ុន សែន បន្ថែមថា ជាការពិតគឺគ្រួសាររបស់ពួកគាត់មានលទ្ធភាពផ្គត់ផ្គង់អាហារសម្រាប់អ្នកជំងឺក្នុងគ្រួសាររបស់ពួកគាត់ ប៉ុន្ដែរាជរដ្ឋាភិបាលក៏ត្រូវមានកាតព្វកិច្ចជួយសម្រួលផ្នែកជីវភាពរបស់ពួកគាត់មួយផ្នែកដែរ។
ក្នុងនីតិប្រតិបត្តិនេះក៏បានកំណត់ដែរថា ការអនុញ្ញាតឱ្យបញ្ចប់ការព្យាបាលអ្នកជំងឺកូវីដនៅតាមផ្ទះ ត្រូវបានអនុវត្តផ្អែកលើលក្ខខណ្ឌមួយចំនួនដូចជា ក្នុងករណីបានយកសំណាកធ្វើតេស្តរកវីរុសកូវីដ ១៩ នៅថ្ងៃទី ១៣ (បន្ទាប់ពីការបញ្ជាក់លទ្ធផលតេស្តវិជ្ជមានដំបូង) ប្រសិនបើលទ្ធផលអវិជ្ជមាន គឺគាត់អាចបញ្ចប់ការព្យាបាលនៅផ្ទះបាន ដោយត្រូវបន្តធ្វើចត្តាឡីស័កនៅផ្ទះ ១៤ ថ្ងៃទៀត និងបញ្ចប់ការធ្វើចត្តាឡីស័ក ដោយស្វ័យប្រវត្តិដោយពុំតម្រូវឱ្យធ្វើតេស្តរកវីរុសកូវីដ ១៩ ឡើងវិញនៅថ្ងៃទី ១៣ ទៀតទេ។ ប្រសិនបើលទ្ធផលវិជ្ជមានត្រូវបន្តសម្រាកព្យាបាលនៅផ្ទះរហូតដល់ថ្ងៃទី ២៨ និងអាចបញ្ចប់ការព្យាបាលបានដោយស្វ័យប្រវត្តិ ដរាបណាគ្មានរោគសញ្ញា ៣ ថ្ងៃចុងក្រោយ។
មួយវិញទៀត ក្នុងករណីមិនបានយកសំណាកធ្វើតេស្តនៅថ្ងៃទី ១៣ (បន្ទាប់ពីការបញ្ជាក់លទ្ធផលតេស្តវិជ្ជមានដំបូង) ត្រូវបន្តសម្រាកព្យាបាលនៅផ្ទះរហូតដល់ថ្ងៃទី ២៨ និងអាចបញ្ចប់ការព្យាបាលដោយស្វ័យប្រវត្តិ ដរាបណាគ្មានរោគសញ្ញា ៣ ថ្ងៃចុងក្រោយ៕
វីដេអូ៖