តំណាងអង្គការសុខភាពពិភពលោក (WHO) ប្រចាំកម្ពុជា លោកស្រី លី អៃឡែន សម្តែងការព្រួយបារម្ភនៃវីរុសកូវីដ ១៩ បំប្លែងថ្មីទម្រង់ដែលតា (Delta variant) និងអំពាវនាវដល់ពលរដ្ឋកម្ពុជាចូលរួមសកម្មភាពទាំងអស់គ្នា ដោយត្រូវអនុវត្តវិធានការនានារបស់រាជរដ្ឋាភិបាល ដើម្បីកុំឱ្យស្តាយក្រោយនៅថ្ងៃស្អែក។
សេចក្តីប្រកាសព័ត៌មានរបស់អង្គការសុខភាពពិភពលោកប្រចាំកម្ពុជា ចុះថ្ងៃទី ៣០ ខែកក្កដានេះបានឱ្យដឹងថា ចំនួនករណីឆ្លងវីរុសកូវីដ ១៩ និងករណីស្លាប់ ដោយសារជំងឺកូវីដ ១៩ ប្រចាំថ្ងៃ នៅតែមានកម្រិតខ្ពស់នៅក្នុងប្រទេសកម្ពុជាដែលស្ថិតនៅក្នុងដំណាក់កាលចម្លងទី ២ ដោយមេរោគនេះបានរីករាលដាលយ៉ាងខ្លាំង នៅក្នុងសហគមន៍។
WHO បន្តថា វីរុសកូវីដ ១៩ បំប្លែងថ្មីទម្រង់ដែលតា (Delta variant) ត្រូវបានរកឃើញក្នុងចំណោមពលករចំណាកស្រុកដែលវិលត្រលប់មកកម្ពុជាវិញតាមច្រកព្រំដែនគោក ហើយឥឡូវនេះបានឆ្លងចូលទៅក្នុងសហគមន៍ហើយ។ «វីរុសកូវីដ ១៩ បំប្លែងថ្មីទម្រង់ដែលតាឆ្លងរាលដាលលឿនជាងវីរុសកូវីដ ១៩ ទម្រង់ផ្សេងទៀត ហើយវាជាវីរុសកូវីដ ១៩ បំប្លែងថ្មីដែលគេស្គាល់ថាងាយឆ្លងបំផុតនាពេលបច្ចុប្បន្ននេះ»។
លោកស្រីវេជ្ជបណ្ឌិត លី អៃឡែន (Li Ailan ) តំណាងអង្គការសុខភាពពិភពលោកប្រចាំកម្ពុជាបានមានប្រសាសន៍ថា យើងកំពុងតែប្រណាំងប្រជែងជាមួយនឹងវីរុសបំប្លែងថ្មីទម្រង់ផ្សេងៗជាច្រើន ហើយយើងត្រូវតែធ្វើសកម្មភាពនៅថ្ងៃនេះឱ្យបានឆាប់រហ័ស ដើម្បីកុំឱ្យមានការស្តាយក្រោយនៅថ្ងៃស្អែក។
លោកស្រីថា៖ « ប្រទេសកម្ពុជាកំពុងស្ថិតក្នុងពេលវេលាដ៏សំខាន់មួយ។ រាជរដ្ឋាភិបាលបានធ្វើសេចក្ដីសម្រេចចិត្តម៉ឺងម៉ាត់មួយចំនួនរួមទាំងការបិទខ្ទប់ ភូមិសាស្ត្រខេត្តចំនួន ៨ ដែលភាគច្រើននៅជាប់ព្រំដែន និងបានដាក់ចេញយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ នៅទូទាំងប្រទេស ដែលជាជំហានសំខាន់មួយក្នុងការប្រយុទ្ធប្រឆាំងនឹងការរាតត្បាតនៃជំងឺនេះ ជាពិសេសជាការឆ្លើយតបទៅនឹងវីរុសកូវីដ ១៩ បំប្លែងថ្មីទម្រង់ដែលតា (Delta variant) តែម្ដង»។
លោកស្រីបានគូសបញ្ជាក់ថា មិនមានវិធានការតែមួយណាអាចទប់ស្កាត់ការចម្លងបានទេ គឺទាមទារឱ្យមានការរួមបញ្ចូលគ្នា ប្រកបដោយប្រសិទ្ធភាពនៃវិធានការសុខភាពសាធារណៈ និងសង្គមដែលផ្អែកលើហានិភ័យ។
«ទីតាំង និងសកម្មភាពដែលត្រូវចៀសវាងទាំង បី ប្រភេទ (3Cs) គួរតែត្រូវបានផ្អាក លុះត្រាតែហានិភ័យត្រូវបានកាត់បន្ថយបានច្រើនជាមុនសិន ហើយវិធានការផ្អែកលើប្រជាជនដូចជាការបញ្ឈប់ការធ្វើដំណើរដែលមិនចាំបាច់ និងការរឹតបន្តឹងការប្រមូលផ្ដុំ (ជាពិសេសក្នុងកន្លែងបិទជិត) ត្រូវតែអនុវត្តឱ្យបានពេញលេញ ហើយអនុញ្ញាតឱ្យអាជីវកម្មដែលមានសុវត្ថិភាពប្រសើរបន្តបើកដំណើរការ»។
ជាថ្មីម្តងទៀតលោកស្រី លី អៃឡែន អំពាវនាវឱ្យពលរដ្ឋអនុវត្តវិធានការដែលត្រូវបានណែនាំ និងចាំបាច់នានា ដើម្បីការពារខ្លួន ការពារក្រុមគ្រួសារ និងការពារអ្នកដទៃទៀតពីការឆ្លងរោគ។ «សកម្មភាពរួមរបស់យើងនឹងកំណត់ជោគជ័យ ឬក៏បរាជ័យរបស់យើងក្នុងការប្រយុទ្ធប្រឆាំងនឹងជំងឺកូវីដ ១៩។ យើងត្រូវតែរួមគ្នា និងធ្វើសកម្មភាពរួមគ្នា ដើម្បីជួយសង្គ្រោះអាយុជីវិត ការពារប្រព័ន្ធសុខាភិបាល និងកាត់បន្ថយផលប៉ះពាល់ដល់សង្គម»។
អង្គការសុខភាពពិភពលោកបានផ្តល់អនុសាសន៍យ៉ាងមុតមាំថា មនុស្សគ្រប់រូបដោយមិនគិតពីស្ថានភាពថាបានចាក់វ៉ាក់សាំងការពារជំងឺកូវីដ ១៩ ហើយ ឬក៏នៅនោះទេ ត្រូវបន្តអនុវត្តវិធានការបង្ការដូចជាត្រូវពាក់ម៉ាស់ រក្សាគម្លាតពីគ្នា លាងដៃជាមួយនឹងសាប៊ូ ឬជែលឱ្យបានញឹកញាប់ ដោយត្រូវចៀសវាងការប្រមូលផ្តុំ ហើយត្រូវនៅផ្ទះ ប្រសិនបើមិនស្រួលខ្លួនត្រូវស្វែងរកជំនួយពីគ្រូពេទ្យនៅមណ្ឌលសុខភាពដែលនៅជិតបំផុតជាបន្ទាន់។
តាមរយៈសេចក្តីប្រកាសព័ត៌មាននេះ អង្គការសុខភាពពិភពលោក កោតសរសើរចំពោះកិច្ចខិតខំប្រឹងប្រែងដោយមិនខ្លាចនឿយហត់របស់រាជរដ្ឋាភិបាលកម្ពុជា និងប្រជាជនកម្ពុជា ខណៈខ្លួននឹងបន្តគាំទ្រការឆ្លើយតបជាបន្ត ដោយសហការយ៉ាងជិតស្និទ្ធជាមួយនឹងដៃគូ ដើម្បីទប់ស្កាត់ការចម្លងមេរោគកូវីដ ១៩ និងកាត់បន្ថយផលប៉ះពាល់ដល់សង្គមនៅក្នុងប្រទេសកម្ពុជា៕