ភ្នំពេញ៖ អភិបាលរាជធានីភ្នំពេញលោក ឃួង ស្រេង ព្រមានផាកពិន័យដោយមិនលើកលែងចំពោះបុគ្គលណាដែលល្មើសបម្រាមគោចរក្នុងភូមិសាស្រ្តរាជធានីភ្នំពេញចាប់ពីម៉ោង ៩យប់ដល់ម៉ោង ៣ទៀបភ្លឺ ដោយលោកបានគូសបញ្ជាក់ថា ពុំមានការអប់រំណែនាំទៀតឡើយ ព្រោះបម្រាមគោចរធ្លាប់ដាក់ឱ្យអនុវត្តច្រើនលើករួចមកហើយ។
ក្នុងអំឡុងពេលចុះពិនិត្យនៅតាមគោលដៅត្រួតពិនិត្យមួយចំនួនក្នុងភូមិសាស្ត្ររាជធានីភ្នំពេញ កាលពីយប់ថ្ងៃទី ៣០ ខែ កក្កដានេះ លោក ឃួង ស្រេង បានជំរុញដល់អាជ្ញាធរមានសមត្ថកិច្ច និងអាជ្ញាធរខណ្ឌអនុវត្តការងារផាកពិន័យបានម៉ឺងម៉ាត់ និងមានប្រសិទ្ធភាពបំផុត ដើម្បីជាប្រយោជន៍រួម។
លោកថា៖« «លើកនេះយើងផាកពិន័យមិនលើកលែងទេ ដោយសារការណែនាំកន្លងមកយើងបានអនុវត្ត ការបិទខ្ទប់ទីក្រុងភ្នំពេញក៏យើងធ្វើការអនុគ្រោះខ្លះដល់ប្រជាពលរដ្ឋយើងដែលគាត់មិនទាន់បានជ្រួតជ្រាបពីបម្រាមគោចរ ឬបម្រាមបិទខ្ទប់ ប៉ុន្តែពេលនេះ សភាពការណ៍មិនឱ្យយើងអនុគ្រោះបានទេ ដើម្បីអាយុជីវិតរបស់ប្រជាជនជាកក្តាសំខាន់ដែលសម្តេចអគ្គមហាសេនាបតីតេជោ ហ៊ុន សែន យកចិត្តទុកដាក់លើបញ្ហានេះ»។
លោក ឃួង ស្រេង សង្កត់ធ្ងន់ថា ៖«រដ្ឋបាលរាជធានីភ្នំពេញ សូមប្រកាសថា មិនអនុគ្រោះ មិនណែនាំដល់បងប្អូនបន្តទៅទៀតទេ គឺអនុវត្តច្បាប់យ៉ាងពេញលេញជុំវិញបញ្ហាការផាកពិន័យ ឈានទៅរកការអនុវត្តច្បាប់កូវីដ១៩ តែម្តង បើសិនបងប្អូននៅតែរឹងរូសល្មើសបញ្ហានេះ ចំពោះឡានផាកពិន័យ ១ លានរៀល រីឯម៉ូតូផាក ២០ម៉ឺន ដោយមិនលើកលែង និងមិនយោគយល់ ក្នុងករណីបំពានធ្ងន់ធ្ងរ ប្រឈមប្តឹងទៅតុលាការ»។
ជាមួយគ្នានេះដែរ លោក ឃួង ស្រេង ស្នើការយោគយល់ពីបងប្អូនប្រជាពលរដ្ឋក្នុងដំណាក់កាលដ៏លំបាកនេះ និងជំរុញដល់ពលរដ្ឋត្រូវចូលអនុវត្តបម្រាមគោចរទាំងអស់គ្នា ដើម្បីធានាប្រសិទ្ធភាពនៃការកាត់ផ្តាច់ការឆ្លងរាលដាលនៃជំងឺកូវីដ ១៩។
សូមជម្រាបថា រដ្ឋបាលរាជធានីភ្នំពេញ បានដាក់បម្រាមគោចរក្នុងភូមិសាស្រ្តរាជធានីភ្នំពេញដោយផ្អាកការធ្វើដំណើរ បិទភោជនីយដ្ឋាន និងសកម្មភាពអាជីវកម្មនានាចាប់ពីម៉ោង ៩យប់ ដល់ម៉ោង ៣ទៀបភ្លឺ គិតចាប់ពីម៉ោង ២៣:៥៩នាទី នាថ្ងៃទី២៩ ខែកក្កដា ឆ្នាំ២០២១ រហូតដល់ថ្ងៃទី១២ ខែសីហា ឆ្នាំ២០២១ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩៕