ជនដាក់ថ្នាំសម្លាប់កណ្តៀរក្នុងទឹកផឹក ក្នុងបំណងបំពុលសម្លាប់ប្រពន្ធ និងកូនចុងដោយសារតែប្រចណ្ឌ តែមិនបានសម្រេច។ រូបថត នគរបាល
បាត់ដំបងៈ បុរសម្នាក់ត្រូវបានសមត្ថកិច្ចនគរបាលបញ្ជូនទៅតុលាការ កាលពីចុងសប្តាហ៍ បន្ទាប់ពីឃាត់ខ្លួន កាលពីថ្ងៃទី ២៩ ខែកក្កដា ពាក់ព័ន្ធនឹងករណីប៉ុនប៉ងសម្លាប់ប្រពន្ធចុង និងកូនចុងចំនួន ២ នាក់ រួមនឹងចៅតូចម្នាក់ទៀត ដោយប្រើថ្នាំសម្លាប់សត្វកណ្តៀរ ដាក់ចូលទៅក្នុងទឹកផឹក។
នគរបាលស្រុកគាស់ក្រឡ បានឲ្យដឹងថា បុរសឈ្មោះ ឃួយ ហៅ វ័ន អាយុ ៤០ ឆ្នាំ ត្រូវបានសមត្ថកិច្ចមូលដ្ឋានឃាត់ខ្លួន នៅព្រឹកថ្ងៃទី ២៩ កក្កដា នៅក្បែរផ្ទះរបស់ខ្លួន ដែលស្ថិតនៅចំណុចភូមិបឹងព្រះក្រឡាញ់ ឃុំព្រះផុស ស្រុកគាស់ក្រឡ ករណី «ឃាតកម្មដោយប្រើថ្នាំពុល» មិនបានសម្រេច បន្ទាប់ពីប្រពន្ធ ដែលជាជនរងគ្រោះប្ដឹងសុំអន្តរាគមន៍ពីអាជ្ញាធរមូលដ្ឋានកាលពីថ្ងៃទី ២៨ ខែកក្កដា។
អធិការនគរបាលស្រុកគាស់ក្រឡ លោក ប៉ាង ហៀង ប្រាប់ ភ្នំពេញ ប៉ុស្តិ៍ថា បុរសជាប្តី ដែលមិនទាន់ស្របច្បាប់រូបនោះបានយកថ្នាំសម្រាប់សម្លាប់សត្វកណ្តៀរ ទៅដាក់ក្នុងកំសៀវដាំទឹករបស់ប្រពន្ធ ហើយយកទៅដាក់នៅក្នុងប៊ីដុងទឹកសុទ្ធចំណុះ ២០ លីត្រ ចំនួន ២ ប៊ីដុង ក្នុងចេតនាសម្លាប់ប្រពន្ធ កូនចុង និងចៅចំនួន ៣ នាក់ ដោយសារតែភ្លើងប្រចណ្ទ។
.jpg)
លោកប្រាប់ថា៖ «លុះប្រពន្ធក្រោកមកនៅពេលព្រឹកព្រលឹមបំណងផឹកទឹក។ ដល់ពេលចាក់ទឹកពីកំសៀវ ទឹកមានពណ៌ខៀវ គាត់ឆ្ងល់ ហើយគាត់ពិនិត្យមើលទឹកនៅធុងទឹក ២០ លីត្រ ចំនួន ២ ធុងទៀត ទឹកមានពណ៌ខៀវដូចគ្នា។ ដល់ពេលអ៊ីចឹងទៅគាត់ដើររកមើលថ្នាំដែលគាត់ទិញសម្រាប់ដាក់ទុកសម្លាប់កណ្តៀរ ដែលស៊ីដំណាំ ដល់មើលទៅឃើញថ្នាំរញេរញ៉ៃ»។
លោកអធិការបន្តថា៖ «គាត់ក៏គិតក្នុងចិត្តថា ប្តីគាត់លួចដាក់ថ្នាំពុល។ ភ្លាមៗនោះ គាត់រកមើលប្តីមិនឃើញ គាត់ក៏ប្រាប់កូនគាត់កុំឱ្យផឹកទឹកនោះ។ គាត់ក៏ទៅប្តឹងមេភូមិ ហើយមេភូមិ ប្តឹងដល់ប៉ុស្តិ៍រដ្ឋបាលស្រុកគាស់ក្រឡ យើងក៏ចុះស្រាវជ្រាវភ្លាម រកហេតុរកផល»។
លោកបន្តទៀតថា រឿងរ៉ាវឈានដល់ការប៉ុនប៉ងសម្លាប់ទាំងមួយគ្រួសារនេះ ដោយសារភ្លើងប្រចណ្ទ។
លោកថា៖ «ប្រពន្ធគាត់បាននិយាយថា កាលពីល្ងាចថ្ងៃទី ២៨ ខែកក្កដា ប្តីគាត់ឈ្លោះគ្នាជាមួយគាត់ រឿងប្រពន្ធនិយាយទូរស័ព្ទ ប្តីប្រចណ្ឌ។ គាត់មិនចង់ឱ្យប្រពន្ធនិយាយទូរស័ព្ទទេ ដល់ពេលយប់ឡើង លួចដាក់ថ្នាំហើយគេចខ្លួនពីផ្ទះ។ គាត់មិនមែនជាប្តីស្របច្បាប់អីទេ គ្រាន់តែគាត់២នាក់ស្រឡាញ់គ្នា និងរួមរស់នៅជាមួយគ្នាអស់រយៈពេលជាង ១ឆ្នាំហើយ ចំណែកកូន២នាក់នោះជាកូនប្តីមុនទេ»។
លោកអធិការស្រុកបានឱ្យដឹងទៀតថា ក្រោយដឹងរឿងហេតុ សមត្ថកិច្ចក៏បានស្រាវជ្រាវ ឃើញបុរសជាប្តីនៅក្បែរផ្ទះរបស់ខ្លួនដែលកំពុងរស់នៅ ហើយក៏ឃាត់ខ្លួនតែម្តង។
លោកនិយាយថា៖«ពេលមន្ត្រីជំនាញសាកសួរចម្លើយ បុរសជាប្តីនោះ ក៏បានសារភាពថា គាត់ពិតជាបានដាក់ថ្នាំ ដើម្បីសម្លាប់ប្រពន្ធរបស់គាត់ ហើយនឹងកូន ២ នាក់ និងចៅ ១ នាក់ មែន។ យើងបានបញ្ជូនទៅការិយាល័យជំនាញកាលពីថ្ងៃទី ៣០ កក្កដា ហើយការិយាល័យជំនាញ បានបន្តនីតិវិធីបញ្ជូនទៅតុលាការហើយ»។
ករណីនេះលោកស្រី ជា ច័ន្ទរស្មី អ្នកនាំពាក្យសាលាដំបូងខេត្តបាត់ដំបង ប្រាប់ ភ្នំពេញ ប៉ុស្តិ៍ នៅថ្ងៃទី ១ ខែសីហាថា លោកស្រីមិនទាន់ដឹងថា ព្រះរាជអាជ្ញាបានចោទប្រកាន់ ឬមិនទាន់ចោទនោះទេ ដោយរង់ចាំថ្ងៃចូលធ្វើការវិញ៕
