តុលាការសម្រេចឃុំខ្លួនមន្ត្រីអាវុធហត្ថម្នាក់ ករណីជេរប្រមាថអភិបាលខេត្ត និងវាយតាអាចារ្យភ្លុក
ភ្នំពេញៈ មន្រ្តីកងរាជអាវុធហត្ថម្នាក់ ត្រូវបានតុលាការសម្រេចឃុំខ្លួនក្នុងពន្ធនាគារ កាលពីចុងសប្តាហ៍ពាក់ព័ន្ធនឹងករណីបង្ហោះសារជេរប្រមាថអភិបាលខេត្តរតនគិរី និងប្រើហិង្សាលើតាអាចារ្យភ្លុក។
លោក កែវ ភក្តី អ្នកនាំពាក្យអយ្យការអមសាលាដំបូងខេត្តរតនគិរីប្រាប់ ភ្នំពេញ ប៉ុស្តិ៍ នៅថ្ងៃទី ១២ កញ្ញាថា មន្រ្តីកងរាជអាវុធហត្ថឈ្មោះ ទួង ចាន់ ត្រូវបានចៅក្រមស៊ើបសួរសម្រេចចេញដីកាឃុំខ្លួន នៅពន្ធនាគារខេត្តរតនគិរីហើយ កាលពីថ្ងៃទី ១១ កញ្ញា។
លោកថ្លែងថា៖ «មន្រ្តីអាវុធហត្ថម្នាក់នេះត្រូវបានតំណាងអយ្យការចោទ បទហិង្សា ដោយចេតនា តាមមាត្រា ២១៧ និងបទប្រមាថតាមមាត្រា ៥០២ នៃក្រមព្រហ្មទណ្ឌ»។
បើយោងតាមបទចោទនៃមាត្រា ២១៧ នេះ ជនត្រូវចោទត្រូវប្រឈមនឹងការជាប់ពន្ធនាគារពី ១ ឆ្នាំ ទៅ ៣ ឆ្នាំ និងពិន័យប្រាក់ពី ២ លាន ទៅ ៦ លានរៀល។ ចំណែកមាត្រា ៥០២ នៃក្រមព្រហ្មទណ្ឌដូចគ្នានេះ ជនត្រូវចោទក៏ត្រូវប្រឈមជាប់ពន្ធនាគារពី ១ ថ្ងៃទៅ ៦ ថ្ងៃ និងពិន័យប្រាក់ពី ១ ពាន់រៀល ទៅ ១ សែនរៀលផងដែរ។
ចំពោះអង្គហេតុនៃការឃុំខ្លួនមន្រ្តីកងរាជអាវុធហត្ថខាងលើ បើយោងតាមសេចក្តីប្រកាសព័ត៌មានកាលពីថ្ងៃទី ៩ កញ្ញា របស់លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ប្រកាសព័ត៌មានជូនសាធារណជន និងអ្នកសារព័ត៌មាន អំពីការអនុវត្តច្បាប់ទៅលើនាយទាហាន នៃកងរាជអាវុធហត្ដខេត្តរតនគិរី ១ រូប ដោយសារមន្ត្រីអាវុធហត្ថរូបនោះបានជេរប្រមាថ និងប្រើអំពើហិង្សាដោយចេតនា នាពេលកន្លងមក។
សេចក្តីប្រកាសព័ត៌មានដដែល បានដកស្រង់សេចក្តីរាយការណ៍ របស់លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី ផ្ញើមកបញ្ជាការដ្ឋានកងរាជអាវុធហត្ថលើផ្ទៃប្រទេសថា កាលពីថ្ងៃទី ៥ កញ្ញា ឆ្នាំ ២០២១ ម្តាយបង្កើតរបស់លោក ទួង ចាន់ ដែលមានតួនាទីជាអនុប្រធានមន្ទីរភ័ស្តុភា នៃកងរាជអាវុធហត្ថខេត្តរតនគិរី បានស្លាប់ដោយជំងឺកូវីដ ១៩។ សេចក្តីប្រកាសព័ត៌មានបន្តថា ក្រោយស្លាប់ភ្លាមសពត្រូវបានក្រុមគ្រូពេទ្យដឹកយកទៅវត្តគិរីសោភ័ណ ហៅវត្តអូរភ្លង ស្ថិតក្នុងភូមិ ៣ ឃុំត្រពាំងច្រេស ស្រុកកូនមុំ ខេត្តរតនគិរី។
នៅកន្លែងបូជាសព លោក ទួង ចាន់ បានបញ្ចេញអាកប្បកិរិយាច្រងេងច្រងាងប្រើពាក្យសម្តីមិនសមរម្យ និងបានវាយលោកតាម្នាក់ជាអាចារ្យភ្លុក ត្រូវ ១ ដៃ។ លុះដល់ថ្ងៃទី ៦ កញ្ញា ឆ្នាំ ២០២១ លោក ទួង ចាន់ បានបង្ហោះព័ត៌មានតាមគណនីហ្វេសប៊ុក ឈ្មោះ Chheang Sok ដោយសរសេរប្រមាថទៅលើលោកអភិបាលនៃគណៈអភិបាលខេត្តរតនគិរីទៀតផង។
ប្រភពដដែលបន្តថា នៅថ្ងៃទី ៧ កញ្ញា មន្រ្តីនគរបាលយុត្តិធម៌ នៃកងរាជអាវុធហត្ថខេត្តរតនគិរី បានធ្វើការស៊ើបអង្កេត ស្រាវជ្រាវ និងស្តាប់ចម្លើយជនសង្ស័យឈ្មោះ ទួង ចាន់ ជានាយទាហាននៃកងរាជអាវុធហត្ថខេត្តរតនគិរី ចប់ ក៏បានស្នើសុំព្រះរាជអាជ្ញាសាលាដំបូងខេត្តរតនគិរីធ្វើការឃាត់ខ្លួនបុគ្គលនេះដើម្បីកសាងសំណុំរឿងបញ្ជូនទៅតុលាការតាមនីតិវិធី។
សេចក្តីប្រកាសព័ត៌មានបញ្ជាក់ថា៖ «យោធិន នៃកងរាជអាវុធហត្ថ ជាមន្ត្រីប្រតិបត្តិច្បាប់ត្រូវតែជាគំរូ ក្នុងការអនុវត្តច្បាប់គោរពវិន័យក្រមសីលធម៌ វិជ្ជាជីវៈ។ បើបុគ្គលណា មិនគោរព ឬប្រព្រឹត្ត ល្មើសច្បាប់ ត្រូវតែអនុវត្តតាមច្បាប់»។
ទោះយ៉ាងណា នៅថ្ងៃទី ៦ កញ្ញា ឆ្នាំ ២០២១ ក្រោយប៉ុន្មានម៉ោងនៃការបង្ហោះសារប្រមាថអភិបាលខេត្ត លោក ថង សាវុន គឺមន្រ្តីអាវុធហត្ថរូបនេះបានប្រើគណនីហ្វេសប៊ុក ឈ្មោះ Chheang Sok បានសរសេរសារបង្ហោះសុំទោស លោកអភិបាលខេត្ត ថង សាវុន និងសារសុំទោសដែលមានន័យថា៖ «ខ្ញុំសុំទោសពី មីង កូន ក្មួយ ជាជនជាតិដើមភាគតិចផងដែរ។ កន្លងមកខ្ញុំបានបង្ហោះសារប្រើពាក្យធ្វើឱ្យប៉ះពាល់ដល់កិត្តិយស លោកអភិបាលខេត្តរតនគិរី»៕
