ភ្នំពេញៈ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានអះអាងថា វត្តមានរបស់វីរុសបំប្លែងថ្មីប្រភេទម៉ូ (Mu) មិនទាន់មាននៅក្នុងប្រទេសកម្ពុជាទេ ប៉ុន្តែលោកស្រី បានបង្ហាញនូវក្ដីបារម្ភថាមេរោគនេះ អាចនឹងមាននៅក្នុងប្រទេសនៅថ្ងៃណាមួយ ប្រសិនបើប្រជាពលរដ្ឋមិនបន្តអនុវត្តការការពារក្នុងការទប់ស្កាត់ការចម្លងវីរុសកូវីដ១៩ នោះទេ។
លោកស្រី ឱ វណ្ណឌីន កាលពីថ្ងៃទី ១៣ ខែកញ្ញា ក្នុងពេលចុះបិទបញ្ចប់ការចាក់វ៉ាក់សាំងបង្ការជំងឺកូវីដ១៩ក្នុងខេត្តស្វាយរៀង បានថ្លែងថា មកដល់ពេលនេះ មានប្រទេសប្រមាណជា ៣០ ទៅ ៤០ ហើយដែលបានឆ្លងរាលដាលនៃវីរុសកូវីដ ១៩ បំប្លែងថ្មីប្រភេទម៉ូ (Mu) នេះ។
លោកស្រីថ្លែងថា៖ «មិនខុសពីវីរុសប្រភេទអាល់ហ្វាដែលតា ឬដែលតានោះទេ ប្រសិនបើបងប្អូនប្រជាពលរដ្ឋមិនបន្តអនុវត្តនូវការការពារ ទប់ស្កាត់នូវការចម្លងនៃវីរុសកូវីដ ១៩ នេះទេ ខ្ញុំគិតថាវីរុសម៉ូនេះ ប្រហែលជានឹងអាចមានចូលក្នុងប្រទេសយើង ដូចករណីវីរុសអាល់ហ្វានិងដែលតាដែរ»។
ដូច្នេះ លោកស្រី ឱ វណ្ណឌីន បានបន្តអំពាវនាវទៅដល់ប្រជាពលរដ្ឋទាំងអស់ត្រូវតែបន្តការពារខ្លួនជានិច្ច បើទោះបីជាបានចាក់វ៉ាក់សាំងកូវីដ ១៩ ដូសទី២ ឬដូសជំរុញរួចក៏ដោយ៕