ភ្នំពេញៈ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ណែនាំឱ្យបញ្ឈប់រាល់ការស្នើសុំបណ្ណខេមរភូមិន្ទ (ខម) ដើម្បីបំពាក់លើរថយន្តឯកជន បើទោះបីជារថយន្តទាំងនោះបានចូលរួមផ្នែកណាមួយក្នុងការបម្រើការងារអង្គភាពក៏ដោយ។
លោក វង្ស ពិសេន នៅថ្ងៃទី ១៤ ខែកញ្ញា ចេញលិខិតណែនាំមេបញ្ជាការប្រភេទទ័ព ទ័ពជំនាញ និងស្ថានប័នចំណុះអគ្គបញ្ជាការដ្ឋានទាំងអស់ ឱ្យបញ្ឈប់រាល់ការស្នើសុំបណ្ណខេមរភូមិន្ទ ដើម្បីបំពាក់លើរថយន្តឯកជន បើទោះបីជារថយន្តទាំងនោះបានចូលរួមផ្នែកណាមួយក្នុងការបម្រើការងារអង្គភាពក្តី។
ក្នុងលិខិតណែនាំដដែល នាយឧត្តមសេនីយ៍ វង្ស ពិសេន ក៏បានប្រាប់ឱ្យយករថយន្តចង្កូតស្តាំ កែទៅជាចង្កូតឆ្វេង។ រីឯរថយន្តចង្កូតឆ្វេង ដែលមិនទាន់បង់ពន្ធនាំចូលត្រូវប្រញាប់ទៅបង់ពន្ធជូនរដ្ឋ តាមការកំណត់របស់អគ្គនាយកដ្ឋានគយ និងរដ្ឋាករកម្ពុជា។
លោកអគ្គមេបញ្ជាការក៏បានណែនាំឱ្យគោរពយ៉ាងម៉ឺងម៉ាត់នូវច្បាប់លក្ខន្តិកៈទូទៅចំពោះយោធិននៃកងយោធពលខេមរភូមិន្ទ និងអនុក្រឹត្យស្តីពីបទវិន័យទូទៅ សម្រាប់កងយោធពលខេមរភូមិន្ទ។ ជាពិសេស ការគោរពនូវឋានានុក្រមកងទ័ព និងការបំពេញតួនាទីភារកិច្ចរបស់ខ្លួនដោយភាពម្ចាស់ការ និងការទទួលខុសត្រូវខ្ពស់ចំពោះមុខរាជរដ្ឋាភិបាល និងច្បាប់ជាធរមាន។
លោកបញ្ជាក់ក្នុងលិខិតថា៖ «អប់រំបន្ទាន់ដល់យោធិនថ្នាក់ក្រោមឱ្យយល់ និងចូលរួមរំលែកការលំបាករបស់រាជរដ្ឋាភិបាលក្នុងការប្រមូលថវិកាជាតិ ក្នុងអំឡុងពេលវិបត្តិកូវីដ ១៩ ឱ្យហ៊ានលះបង់គ្រប់បែបយ៉ាង ដើម្បីជាតិមាតុភូមិ និងស្មោះត្រង់ដាច់ខាតឥតងាករេ ចំពោះរាជរដ្ឋាភិបាលក្រោមការដឹកនាំរបស់សម្តេចនាយករដ្ឋមន្ត្រីនៃព្រះរាជាណាចក្រកម្ពុជា»។
ជាមួយគ្នានេះលោក វង្ស ពិសេន បានធ្វើការហាមឃាត់មិនឱ្យផ្ទេរការប្រើប្រាស់ក្រោមរូបភាពជាអំណោយដើម្បីផ្តល់យានយន្ត ស្លាកលេខខេមរភូមិន្ទឱ្យអ្នកផ្សេង ប្រើប្រាស់ខុសច្បាប់ ឬធ្វើអាជីវកម្មផ្សេងៗឡើយ។ បើរកឃើញអ្នកប្រព្រឹត្តនឹងមានទោសទៅតាមច្បាប់ដែលបានកំណត់។
លោកបញ្ជាក់ថា៖ «បញ្ឈប់ជាបន្ទាន់នូវការបន្តប្រើប្រាស់ដោយខុសច្បាប់ ការផ្ទេរដោយការធ្វើអំណោយ ការជួល ឬលក់រថយន្តស្លាកលេខខេមរភូមិន្ទទៅឱ្យអ្នកដទៃ។ ប្រសិនបើរកឃើញថា មានហេតុការណ៍ខាងលើនេះកើតឡើង យោធិននោះនឹងត្រូវទទួលខុសត្រូវចំពោះមុខច្បាប់ជាធរមាន»។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាថ្លែងនៅថ្ងៃទី ១៤ ខែកញ្ញាថា លោកគាំទ្រចំពោះការបញ្ឈប់ការស្នើសុំបណ្ណខេមរភូមិន្ទ ដើម្បីបំពាក់លើរថយន្តឯកជន។ លោកបញ្ជាក់ថា បណ្ណ ឬក៏ស្លាកលេខខេមរភូមិន្ទ គួរតែសម្រាប់ប្រើប្រាស់ក្នុងការផ្តល់សេវារដ្ឋ បម្រើជូនប្រជាជន មិនគួរប្រើប្រាស់សម្រាប់ឯកជននោះទេ ព្រោះអាចនាំឱ្យពលរដ្ឋមានការភាន់ច្រឡំ និងភ័យខ្លាចផងដែរ។
លោកថ្លែងថា៖ «ជួនកាលឡានហ្នឹងជាឡានឯកជន ប៉ុន្តែគាត់ប្រើជាសាធារណៈតាមផ្លូវទៅ ពលរដ្ឋភ័យខ្លាច ព្រោះឃើញស្លាក ខ.ម. អាចច្រឡំថា ឡានហ្នឹង គឺសមត្ថកិច្ចប្រើ។ តាមពិត គាត់ជិះលក្ខណៈគ្រួសារ ហើយជួនកាលរូបគាត់ជាមន្ត្រីហ្នឹងប្រើទៅទៀត អាចជាក្រុមគ្រួសារ ឬក៏កូនគាត់ប្រើ អ៊ីចឹងធ្វើឱ្យសាធារណជនបារម្ភ និងភាន់ច្រឡំ»៕
វីដេអូ៖