ទិដ្ឋភាពសិស្សសាលានៅក្នុងខេត្តរតនគិរី និងបដាជំរុញឱ្យសិស្សចូលរៀន និងរៀនដោយការប្រុងប្រយ័ត្នក្នុងបរិបទកូវីដ ១៩។ រូបថត PIC page
ភ្នំពេញៈ អង្គការភ្លែនអន្តរជាតិកម្ពុជា និងអង្គការដៃគូកំពុងសហការជាមួយមន្ទីរអប់រំ យុវជន និងកីឡា តាមខេត្ដមួយចំនួនធ្វើយុទ្ធនាការជំរុញដល់កុមារ ពិសេសកុមារីឱ្យចូលរៀនវិញ និងបន្តរៀនជាបណ្ដុំតូចនៅតាមភូមិ និងសហគមន៍តាមគន្លងថ្មី ព្រោះសិស្សជនបទប្រឈមនឹងការមិនចូលរៀន និងបោះបង់ការសិក្សា។
តំណាងរងនៃអង្គការភ្លែនអន្តរជាតិកម្ពុជា លោក យី គឹមថាន ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ១៤ ខែកញ្ញានេះថា អង្គការភ្លែនអន្តរជាតិកម្ពុជា និងអង្គការសុវណ្ណភូមិនឹងធ្វើយុទ្ធនាការនេះចាប់ពីខែកញ្ញា រហូតដល់ចុងឆ្នាំ ២០២១ នៅខេត្ដរតនគិរី ខេត្តស្ទឹងត្រែង និងជំហានបន្តនៅខេត្ដសៀមរាប ដើម្បីជំរុញកុមារ ពិសេសកុមារីឱ្យចូលរៀនវិញ។
លោក គឹមថាន បានថ្លែងថា ក្រសួងអប់រំ យុវជន និងកីឡាប្រកាសបើកសាលាឡើងវិញ។ ប៉ុន្ដែការបើកសាលានេះ គឺអាស្រ័យទៅលើរដ្ឋបាលរាជធានី-ខេត្ដ ជាអ្នកសម្រេចចិត្ដអនុញ្ញាតឱ្យសាលារៀននៅតំបន់ណាគួរបើក និងតំបន់ណាមិនគួរបើក អាស្រ័យលើហានិភ័យការឆ្លងរីករាលដាលជំងឺកូវីដ ១៩ តិច ឬច្រើន។
.jpg)
លោក គឹមថាន បានបញ្ជាក់ថា៖ «យើងគិតថាបើសិនជាយើងមិនធ្វើជាយុទ្ធនាការប្រមូលសិស្សឱ្យមកចូលរៀនវិញទេ ប្រហែលយើងមិនមានសិស្សចូលមករៀនវិញទេ ដោយសារពួកគេខានចូលរៀនច្រើនខែ ហើយទៅធ្វើស្រែចម្ការជាមួយឪពុកម្ដាយ ជាពិសេសកុមារីអាចនឹងឈប់រៀនទៅរកការងារធ្វើ ឬរៀបការតែម្ដង»។
លោក យី គឹមថាន បានឱ្យដឹងថា តាមរយៈយុទ្ធនាការនេះ អង្គការភ្លែន និងអង្គការដៃគូនឹងជួយជំរុញដល់មន្ទីរអប់រំ ខេត្ត ឱ្យជំរុញសិស្សត្រឡប់ចូលរៀនវិញផង និងជំរុញឱ្យមានការបង្រៀន និងការរៀនពីចម្ងាយជាបណ្ដុំដល់កុមារ តាមរយៈការចែកសន្លឹកកិច្ចការទៅដល់សិស្សនៅតាមផ្ទះនៅតាមភូមិ ឬសហគមន៍។
សកម្មភាពរបស់អង្គការបើកគោយន្ត ធ្វើយុទ្ធនាការឱ្យកុមារា កុមារី ចូលរៀនវិញ។ រូបថត PIC
លោកបញ្ជាក់ថា៖ «យុទ្ធនាការនេះយើងក៏បានធ្វើការងារជាមួយសហគមន៍ និងសាលារៀនដើម្បីធ្វើការផ្សព្វផ្សាយយ៉ាងណាឱ្យឪពុកម្ដាយបញ្ជូនកូនត្រឡប់មករៀនឡើងវិញ ដោយពន្យល់ពលរដ្ឋថា កូនរបស់ពួកគាត់អាចចូលរៀនវិញតាមគន្លងថ្មី ដោយពាក់ម៉ាស់ រក្សាអនាម័យខ្ពស់ជាដើម»។
លោក យី គឹមថាន បានឱ្យដឹងថា សាលារៀននីមួយៗដែលអង្គការភ្លែនអនុវត្ដយុទ្ធនាការនេះ អង្គការនឹងបំពាក់ម៉ាស៊ីនវាស់កម្ដៅ ចែកម៉ាស់ អាល់កុល និងធ្វើកន្លែង សម្រាប់លាងដៃ បង្គន់អនាម័យជាដើម ដើម្បីរួមចំណែកទប់ស្កាត់ការឆ្លងរីករាលដាលជំងឺកូវីដ ១៩។
លោកបានឱ្យដឹងថា បន្ទាប់ពីការបិទសាលា នាពេលកន្លងមកកូនសិស្សភាគច្រើននៅខេត្ដរតនគិរី និងស្ទឹងត្រែងគឺមិនបានរៀនពេញលេញ តាមរយៈប្រព័ន្ធអនឡាញទេ ដោយសារពួកគេ គ្មានបណ្ដាញ អ៊ីនធឺណិត និងគ្មានឧបករណ៍អេឡិចត្រូនិកសម្រាប់សិក្សា។
លោកបញ្ជាក់ថា៖ «ពួកគាត់ស្ទើរតែទាំងអស់ហើយ ដែលមិនបានរៀនជាប់លាប់ពួកគាត់រៀនបានខ្លះតាមរយៈវិទ្យុ និងគ្រូបង្រៀន។ ប៉ុន្ដែមិនមានការរៀនជាប់លាប់ទេ។ យើងព្រួយបារម្ភណាស់ថាពួកគាត់អាចមិនចេះអានអក្សរ ពួកគាត់ខ្វះចំណេះដឹង ហើយពេលសាលារៀនបើកឡើងវិញ មានការលំបាកចំពោះការបន្តការសិក្សាដែលអាចនាំឱ្យមានការបោះបង់ការសិក្សាច្រើន។ យើងត្រូវតែធ្វើយុទ្ធនាការនេះដើម្បីប្រមូលសិស្សឱ្យចូលរៀនតាមរយៈគន្លងថ្មីឡើងវិញ»។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងនាថ្ងៃទី ១៤ ខែកញ្ញាថា៖ «ក្រសួងអប់រំយុវជន និងកីឡា ស្វាគមន៍ និងថ្លែងអំណរគុណចំពោះកិច្ចសហការពីសំណាក់ក្រសួងស្ថាប័នដៃគូអភិវឌ្ឍន៍ រួមមានអង្គការភ្លែន-អន្តរជាតិកម្ពុជា វិស័យឯកជន បុគ្គលិកអប់រំ មាតាបិតា សិស្សានុសិស្ស និងអាជ្ញាធរមូលដ្ឋានក្នុងការចូលរួមចំណែកលើកកម្ពស់គុណភាពអប់រំ និងការពង្រឹងសុវត្ថិភាពសុខភាពសិក្សាសម្រាប់ការបង្រៀន និងរៀនតាមបណ្តុំក្នុងបរិបទកូវីដ-១៩ស្របតាមស្មារតីលិខិតលេខ ៤៦ និងលិខិតលេខ ៥០ របស់ក្រសួង»។
ក្រសួងអប់រំកាលពីថ្ងៃទី ១៣ ខែកញ្ញានេះបានឱ្យដឹងថា តាមរយៈយុទ្ធនាការនេះនឹងជំរុញដល់កុមារ ពិសេសកុមារីឱ្យចូលរួមរៀនពីចម្ងាយតាមរយៈការបង្រៀនជាក្រុមតូច និងរៀនខ្លួនឯងនៅផ្ទះអំឡុងពេលជំងឺកូវីដ ១៩ និងការរៀនដោយប្រកាន់ភ្ជាប់នូវអនាម័យ។ ជំរុញដល់មាតាបិតា ឬអាណាព្យាបាលសិស្ស ដើម្បីជំរុញកូនៗរបស់គាត់បន្ថែមក្នុងការរៀនពីចម្ងាយតាមរយៈការរៀនជាក្រុមតូច និងជំរុញកូនៗរៀននៅផ្ទះ និងពន្យល់ណែនាំកុមារអំពីអនាម័យតាមរយៈការលាងដៃឱ្យបានញឹកញាប់ និងពាក់ម៉ាស់ការពារជាប្រចាំ។
លោក យី គឹមថាន ថ្លែងថា តាមរយៈយុទ្ធនាការនេះ កុមារ ពិសេសកុមារីនឹងត្រឡប់ចូលរៀនវិញ ដោយអនុវត្ដបានល្អ តាមវិធានការរបស់ក្រសួងសុខាភិបាល និងក្រសួងអប់រំ។ ការអាចបន្តការសិក្សានេះ ចំណេះដឹងរបស់សិស្សនឹងមានការកើនឡើង សិស្សនឹងមិនបោះបង់ចោលការសិក្សានឹងបន្តរៀននៅក្នុងគន្លងថ្មី ដោយពួកគេនឹងរៀនថា តើត្រូវរៀនយ៉ាងម៉េចនៅក្នុងបរិបទកូវីដ ១៩ នេះ។
លោកថា៖ «យើងនឹងអាចឃើញកុមារនៅតាមជនបទ ទោះបីជានៅតំបន់ដាច់ស្រយាលយ៉ាងណា ក៏អាចត្រឡប់មកចូលរៀនវិញ តាមគន្លងថ្មី»។
ក្រសួងអប់រំយុវជន និងកីឡាកាលពីថ្ងៃទី ៣១ ខែសីហា ឆ្នាំនេះ បានចេញសេចក្ដីណែនាំស្ដីពីការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាសាធារណៈ និងឯកជននៅភូមិសាស្ត្រដែលមានហានិភ័យទាប បន្ទាប់ពីលោកនាយករដ្ឋមន្ត្រី ហ៊ុន សែន បានផ្តល់អនុសាសន៍ឱ្យក្រសួងអប់រំពិនិត្យលទ្ធភាពបើកសាលារៀនឡើងវិញ។
តាមរយៈសេចក្ដីណែនាំក្រសួងអប់រំបានដាក់ចេញគោលការណ៍មួយចំនួនដល់អង្គភាពក្រោមឱវាទវិស័យឯកជន មាតាបិតាអាណាព្យាបាលសិស្សានុសិស្សស្ដីពីការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាសាធារណៈ និងឯកជននៅភូមិសាស្ត្រដែលមានហានិភ័យទាប។
ក្នុងនោះក្រសួងអប់រំបានស្នើទៅដល់អភិបាល និងមន្ទីរអប់រំរាជធានី-ខេត្តទាំងអស់ធ្វើការពិនិត្យ និងវាយតម្លៃស្ថានភាពជាក់ស្តែងទៅលើសាលាដែលអាចនឹងមានលទ្ធភាពបើកដំណើរការឡើងវិញនៅតាមតំបន់ដែលមានហានិភ័យទាប និងតំបន់ដែលមិនមានការឆ្លងមេរោគកូវីដ ១៩៕
