ភ្នំពេញៈ ក្រុមប្រឹក្សាជាតិប្រាក់ឈ្នួលអប្បបរមា កំណត់យកថ្ងៃទី ២៨ កញ្ញា ដើម្បីធ្វើការបោះឆ្នោតជ្រើសរើសតួលេខណាមួយ ដែលភាគីនីមួយៗបានកំណត់ បើគ្មានការឯកភាពទាំងស្រុងនោះទេ ខណៈតួលេខរបស់តំណាងនិយោជក និងតំណាងនិយោជិតនៅឆ្ងាយពីគ្នា ចំណែកភាគីរាជរដ្ឋាភិបាល ស្នើឱ្យរក្សាប្រាក់ឈ្នួលដដែលដូចឆ្នាំ ២០២១។
នៅព្រឹកថ្ងៃទី ២១ ខែ កញ្ញា ឆ្នាំ ២០២១ ក្រុមប្រឹក្សាជាតិប្រាក់ឈ្នួលអប្បបរមា បានបន្តការចរចាជាលក្ខណៈត្រីភាគីជាលើកទី៣ ដើម្បីកំណត់ប្រាក់ឈ្នួលអប្បបរមា សម្រាប់វិស័យកាត់ដេរនិងផលិតស្បែកជើងនៅកម្ពុជា សម្រាប់ឆ្នាំ ២០២២ នៅទីស្តីការក្រសួងការងារ។
ក្រោយចប់ការចរចាអស់រយៈពេល១ថ្ងៃរួចមក ភាគីទាំង ៣ បានសម្រេចយកតួលេខដែលខ្លួនរកឃើញរៀងៗខ្លួន ដើម្បីបន្តការចរចាបន្តទៀត និងឈានទៅរកការបោះឆ្នោតសម្រេចក្នុងពេលខាងមុខ។ នេះបើតាមរបាយការណ៍របស់ក្រុមប្រឹក្សាជាតិប្រាក់ឈ្នួលអប្បបរមា ដែលដាក់ជូនរដ្ឋមន្ត្រីក្រសួងការងារបណ្តុះបណ្តាលវិជ្ជាជីវៈ នៅថ្ងៃទី ២១ កញ្ញា។
របាយការណ៍របស់ក្រុមប្រឹក្សាជាតិប្រាក់ឈ្នួលអប្បបរមា បានឱ្យដឹងថា តួលេខទាំង ៣ ដែលភាគីនីមួយៗបានកំណត់ គឺរួមមានភាគីសហជីពស្នើតួលេខ ២០៤ ដុល្លារ ចំណែកភាគីនិយោជស្នើរក្សាតួលេខ ១៨៨ ដុល្លារ និងភាគីរាជរដ្ឋាភិបាលស្នើរក្សា ១៩២ ដុល្លារ ឱ្យនៅដដែល។
របាយការណ៍នេះបញ្ជាក់ថា៖ «ដោយតួលេខនៃភាគីនីមួយៗនៅមានគម្លាតឆ្ងាយ ទោះបីជាបានប្រជុំពិភាក្សាជាលក្ខណៈផ្ទៃក្នុង លក្ខណៈទ្វេភាគី និងលក្ខណៈត្រីភាគីជាច្រើនលើកក៏ដោយ និងយោងតាមមាត្រា នៃច្បាប់ស្តីពីប្រាក់ឈ្នួលអប្បបរមា យើងខ្ញុំសូមគោរពដាក់ជូនឯកឧត្តប្រធាន នូវគោលជំហរនៃតួលេខប្រាក់ឈ្នួលនេះ ដើម្បីដាក់ជូនក្រុមប្រឹក្សាជាតិប្រាក់ឈ្នួលអប្បបរមាពិនិត្យ ឬបោះឆ្នោតទៅតាមនីតិវិធី»។
សូមជម្រាបថា ប្រាក់ឈ្នួលអប្បបរមា សម្រាប់វិស័យកាត់ដេរនិងផលិតស្បែកជើង ឆ្នាំ ២០២១ គឺមានចំនួន ១៩២ ដុល្លារ។
លោក ប៉ាវ ស៊ីណា ប្រធានសហភាពចលនាកម្មករកម្ពុជា មើលឃើញថា ការចរចាប្រាក់ឈ្នួលគោលក្នុងពេលនេះ បើទោះភាគីទាំងសងខាង ហាក់មានតួលេខឆ្ងាយពីគ្នា ព្រោះតែហេតុផលរៀងខ្លួនក៏ពិតមែន ប៉ុន្តែភាគីទាំងសងខាង បង្ហាញជំហររួមគ្នា ក្នុងការដោះស្រាយបញ្ហាដែលកំពុងជួបប្រទះក្នុងពេលបច្ចុប្បន្ន។
លោករំពឹងថា ប្រាក់ឈ្នួលរបស់កម្មករសម្រាប់ឆ្នាំ ២០២២ នឹងឡើងក្នុងកម្រិតណាមួយ ដែលជួយឱ្យជីវភាពកម្មករអាចមានភាពល្អប្រសើរ បើទោះតួលេខដែលភាគីបានកំណត់ចុងក្រោយ មិនមានចំណុចរួមយ៉ាងណាក៏ដោយ។
លោកបញ្ជាក់ថា៖ «ការចរចាប្រាក់ឈ្នួលឆ្នាំនេះ គឺនឹងមានភាពវិជ្ជមាន ព្រោះបើយើងពិនិត្យទៅមើលអនុសាសន៍របស់ថ្នាក់ដឹកនាំ ដែលបានមានប្រសាសន៍ថា វិស័យកាត់ដេរ មានភាពល្អប្រសើរ មានការបញ្ជាទិញកាន់តែច្រើន។ ថ្នាក់ដឹកនាំ ក៏បានលើកឡើងពីការដំឡើងប្រាក់ឈ្នួលដែរ។ ដូច្នេះ ខ្ញុំគិតថា ទាំងអស់នេះ យើងនឹងទទួលបានសញ្ញាបូក គ្រាន់តែថា យើងមិនដឹង មានការឡើងចំនួនប៉ុនណា»៕