មន្ត្រីអង្គការសង្គមស៊ីវិលនិងមន្ត្រីក្រសួងព័ត៌មាន ពិភាក្សាលើសេចក្តីព្រាងច្បាប់សិទ្ធិទទួលព័ត៌មាន។ រូបថត NGO Forum
ភ្នំពេញៈ មន្ត្រីអង្គការសង្គមស៊ីវិលជាច្រើនស្ថាប័ន មន្ត្រីរាជរដ្ឋាភិបាល និងប្រជាសហគមន៍ប្រមាណ ២០០ នាក់ នៅថ្ងៃទី ២២ កញ្ញា បានជួបពិភាក្សាគ្នាក្នុងសន្និសីទថ្នាក់ជាតិ តាមរយៈវីដេអូអនឡាញ និងចូលរួមដោយផ្ទាល់នៅសណ្ឋាគារហៃយ៉ាត់ រីជិនស៊ីភ្នំពេញ ស្តីពីសិទ្ធិទទួលព័ត៌មានសម្រាប់ទាំងអស់គ្នា ការបង្ហាញព័ត៌មាន និងតម្លាភាព អំពីថវិការដ្ឋបាលថ្នាក់ក្រោមជាតិ និងសម្បទានដីសេដ្ឋកិច្ច។
លោក មាស សុភ័ណ្ឌ អ្នកនាំពាក្យក្រសួងព័ត៌មាន បានថ្លែងក្នុងឱកាសនោះថា រហូតមកដល់ពេលនេះ សេចក្តីព្រាងច្បាប់សិទ្ធិទទួលព័ត៌មាន បានបញ្ចប់កិច្ចពិភាក្សាពិគ្រោះយោបល់នៅកម្រិតក្រុមការងារបច្ចេកទេស និងកិច្ចពិភាក្សាពិគ្រោះយោបល់នៅកម្រិតអន្តរក្រសួងរួចរាល់ហើយ។
លោកបន្តថា បច្ចុប្បន្ន សេចក្តីព្រាងច្បាប់នេះ កំពុងស្ថិតនៅក្នុងដំណើរការកិច្ចពិភាក្សាពិគ្រោះយោបល់រវាងក្រសួងព័ត៌មាន និងក្រសួងយុត្តិធម៌លើជំពូកទោសបញ្ញត្តិ និងជំពូកដែលពាក់ព័ន្ធនឹងជំពូកទោសបញ្ញត្តិ ដែលនឹងឈានដល់ពេលបញ្ចប់ក្នុងពេលដ៍ខ្លីខាងមុខនេះ។
.jpg)
លោក មាស សុភ័ណ្ឌ បានអះអាងថា៖ «បន្ទាប់ពីបញ្ចប់កិច្ចពិភាក្សាពិគ្រោះយោបល់ជាមួយក្រសួងយុត្តិធម៌ ក្រសួងព័ត៌មាននឹងរៀបចំដាក់ស្នើសុំការអនុម័តសេចក្តីព្រាងច្បាប់នេះទៅស្ថាបន័នីតិប្រតិបត្តិ និងស្ថាប័ននីតិបញ្ញត្តិឱ្យបានឆាប់បំផុត ហើយក្រសួងសង្ឃឹមថាសេចក្តីព្រាងច្បាប់នេះនឹងត្រូវអនុម័តក្នុងឆ្នាំ ២០២១ នេះ»។
យោងតាមសេចក្តីប្រកាសរួមរបស់ក្រុមអង្គការស៊ីវីល បានបង្ហាញថា ការបង្កើនលទ្ធភាពក្នុងការទទួលបាននូវព័ត៌មានឯករាជ្យដោយផ្អែកលើភ័ស្តុតាង និងការលើកកម្ពស់សេរីភាពបញ្ចេញមតិ នឹងចូលរួមចំណែកយ៉ាងសកម្មក្នុងការធ្វើឱ្យប្រជាពលរដ្ឋ ចូលរួមបានកាន់តែពេញលេញជាសាធារណៈ និងក្នុងជីវិតសង្គមរបស់ពួកគេ។
ក្រុមអង្គការទាំងនេះ ក៏បានលើកឡើងដែរថា៖«វាគឺជាការជឿជាក់យ៉ាងមុតមាំរបស់យើង ដែលថា ប្រជាពលរដ្ឋកម្ពុជា ត្រូវមានលទ្ធភាព មានសំឡេង នៅក្នុងរបៀបនៃការចំណាយថវិកាសាធារណៈ ក៏ដូចជានៅក្នុងការសម្រេចចិត្តនានា ដែលប៉ះពាល់ដល់ជីវភាបរស់នៅរបស់ពួកគេនៅក្នុងឃុំស្រុក និងក្រុង»។
ជាមួយនឹងក្តីសង្ឃឹមទាំងនេះ អង្គការសង្គមស៊ីវិលទាំងនេះ ក៏រំពឹងដែរថា ច្បាប់ស្តីពីសិទ្ធិទទួលបានព័ត៌មាន ដែលធានាដល់សិទ្ធិទាំងនេះ នឹងឆាប់បានអនុម័ត ដើម្បីដាក់ឱ្យប្រើប្រាស់បានជាប្រយោជន៍ដល់ប្រជាពលរដ្ឋទូទាំងប្រទេស។
លោក ឡាំ សុជាតិ លេខាធិការនៃក្រុមប្រឹក្សាភិបាល CPDD និងជានាយកប្រតិបត្តិនៃវិទ្យាស្ថានតស៊ូមតិ និងគោលនយោបាយ បានថ្លែងក្នុងឱកាសនោះដែរថា សង្គមស៊ីវិល មានក្តីសប្បាយចិត្តដែលរដ្ឋាភិបាល បានប្រកាសពីតម្លាភាពនៃការប្រើប្រាស់ថវិកានៅថ្នាក់ក្រោមជាតិ ហើយកញ្ចប់ថវិកាដែលឃុំសង្កាត់នីមួយៗ ទទួលបាន ក៏ត្រូវបានទទួលជារៀងរាល់ឆ្នាំផងដែរ។
ប៉ុន្តែលោក មើលឃើញថា ក្នុងរយៈពេលនៃវិបត្តិដោយសារជំងឺកូវីដ ១៩ ប៉ុន្មានឆ្នាំនេះ ព័ត៌មានទាក់ទងនឹងបញ្ហាទាំងនេះ ហាក់មិនមានការផ្សព្វផ្សាយឱ្យបានទូលំទូលាយនោះទេនៅក្នុងថ្នាក់ក្រោមជាតិ ខណៈដែលលោក បារម្ភថា ថវិកាដែលមានសារៈសំខាន់សម្រាប់អភិវឌ្ឍមូលដ្ឋាន នឹងត្រូវបានកាត់បន្ថយ។
លោក បានរៀបរាប់ថា៖«យើងមិនទាន់ទទួលបានព័ត៌មានច្បាស់លាស់ទេពីកំណើនថវិកានេះ ព្រោះដោយសារតែបរិបទកូវីដ កើតឆ្នាំ ២០២០ ដល់ ២០២១នេះ ហើយរាជរដ្ឋាភិបាល បានប្រកាសឱ្យកាត់បន្ថយចំណាយគ្រប់ក្រសួង។ យើងសុំធ្វើម៉េច កុំកាត់លុយឃុំសង្កាត់នេះ ព្រោះឃុំសង្កាត់ត្រូវការជំនួយច្រើនជាងមុន»។
ជាមួយនឹងការបារម្ភនេះ លោក ឡាំ សុជាតិ ក៏បានស្នើឱ្យមានការផ្សព្វផ្សាយនៅតាមមូលដ្ឋាន អំពីព័ត៌មាននានាទាក់ទងនឹងសេវា និងព័ត៌មានជុំវិញការអភិវឌ្ឍឃុំសង្កាត់ឱ្យបានទូលំទូលាយបន្ថែមទៀត ខណៈដែលព័ត៌មានដែលអាជ្ញាធរឃុំ បានផ្សព្វផ្សាយទៅ គឺមានការខ្វះចន្លោះ ហើយពលរដ្ឋតិចតួចណាស់ ដែលទទួលបាន។
លោក ឃុត ចាន់ដារ៉ា តំណាងគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធាននៃរដ្ឋសភា បានលើកឡើងថា ថវិកា គឺជាយុទ្ធសាស្ត្រនៃការរក្សាបាននូវសមិទ្ធផលសំខាន់ៗរបស់ប្រទេសជាតិ ការអភិវឌ្ឍលើគ្រប់វិស័យ ការកសាងហេដ្ឋរចនាសម្ព័ន្ធ ការអភិវឌ្ឍធនធានមនុស្សប្រកបដោយគុណភាព ព្រមទាំងការអភិវឌ្ឍប្រកបដោយចីរភាព។ លោកថា ការរៀបចំថវិការដ្ឋបាលថ្នាក់ក្រោមជាតិ គឺត្រូវធ្វើការ រួមគ្នាជាមួយនឹងថវិកាថ្នាក់ជាតិ ដើម្បីធ្វើឱ្យសម្រេចនូវផែនការតាមវិស័យ និងអាទិភាពគោលនយោបាយជាតិ។
លោកបានបញ្ជាក់ថា៖ «ទាំងរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ ដែលរដ្ឋបាលទាំង ២ នេះ មានគោលបំណងតែមួយគត់គឺ សម្រេចឱ្យបាននូវគោលនយោបាយអាទិភាព និងសមិទ្ធផលសំខាន់ៗជូនប្រជាជន និងប្រទេសជាតិ។ ការបែងចែកដាច់ពីគ្នានៃថវិកាថ្នាក់ជាតិ និងថ្នាក់ក្រោមជាតិក៏ដោយ ក៏ការរៀបចំកំណែទម្រង់ហិរញ្ញវត្ថុសាធារណៈ គឺទាមទារនូវពេលវេលា និង គោរពនូវសង្គតិភាពនៃគោលការណ៍នៃបរិការណ៍កែទម្រង់រដ្ឋបាលថ្នាក់ក្រោមជាតិ ព្រមទាំងអភិក្រមនៃការគ្រប់គ្រងថវិកាជាតិ»៕
