គ្រូពេទ្យយកសំណាកពីព្រះសង្ឃគង់នៅវត្តចាក់អង្រែលើ ខណ្ឌមានជ័យ រាជធានីភ្នំពេញ ដើម្បីរកវីរុសកូវីដ ១៩។ រូបថត រ៉ាស់ហ៊ីម
ភ្នំពេញៈ លោកនាយករដ្ឋមន្ត្រី ហ៊ុន សែន ថ្លែងថា ចំនួនវត្តស្ទើរតែពាក់កណ្តាលនៅរាជធានីភ្នំពេញត្រូវបានរកឃើញថា មានអ្នកបានឆ្លងជំងឺកូវីដ ១៩ បន្ទាប់ពីក្រុមគ្រូពេទ្យបានចុះយកសំណាកគ្រប់វត្តទាំងអស់។ លោកអំពាវនាវដល់ប្រជាពលរដ្ឋឱ្យប្រកាន់យកវិធានការសុខាភិបាល ដើម្បីទប់ស្កាត់ការឆ្លងជំងឺនេះ។
ក្រុមគ្រូពេទ្យបានចុះយកសំណាករកវីរុសកូវីដ ១៩ នៅវត្តអារាមទាំងអស់ជាង ១៥០ វត្តក្នុងរាជធានីភ្នំពេញរយៈពេល ២ ថ្ងៃ គឺនៅថ្ងៃទី ២៤ ដល់ថ្ងៃទី ២៥ កញ្ញា បន្ទាប់ពីវត្តមួយចំនួនមានការផ្ទុះការឆ្លងរាលដាលនូវវីរុសកូវីដ ១៩ ក្នុងពិធីបុណ្យកាន់បិណ្ឌថ្ងៃទី ១ និងទី ២។
តាមរយៈសារជាសំឡេងនាថ្ងៃទី ២៥ ខែកញ្ញា លោក ហ៊ុន សែន ថ្លែងថា៖ «ម្សិលមិញនេះ [២៤ កញ្ញា] ខាងក្រុមគ្រូពេទ្យបានយកសំណាកនៅគ្រប់វត្ត។ ស្ទើរតែពាក់កណ្តាលនៃវត្តនៅក្នុងទីក្រុងភ្នំពេញនេះគឺមានឆ្លងនៃជំងឺកូវីដ ១៩ នេះ»។
.jpg)
លោកបន្តថា៖ «នៅក្នុងពេលជំងឺរាតត្បាតនេះកើតឡើង ខ្ញុំព្រះករុណាខ្ញុំបែរជាមានការធ្វេសប្រហែសដោយយល់យោគទៅលើសភាពការណ៍ដែលឃើញ ថាមានការស្រុតចុះបន្តិចនៃជំងឺកូវីដនេះ យើងក៏បានចាប់ផ្តើមឱ្យមានការធ្វើបុណ្យធ្វើទានទៅតាមទំនៀមទម្លាប់ឡើងវិញ»។
លោក ហ៊ុន សែន ថ្លែងថា ក៏ប៉ុន្តែត្រឹមតែរយៈពេល ៣ ថ្ងៃតែប៉ុណ្ណោះចំនួនឆ្លងជំងឺកូវីដ ១៩ នៅតាមវត្តអារាមមួយចំនួនបានកើតឡើង។ ធ្វើឱ្យចំនួនអ្នកឆ្លងដែលមានត្រឹមតែចន្លោះប្រមាណ ៤០០ នាក់ ទៅ ៦០០ នាក់ ក្នុង ១ ថ្ងៃ កើនលើសពី ៨០០ នាក់ និងចំនួនអ្នកស្លាប់កើនឡើងជាង ២០ នាក់ក្នុង ១ ថ្ងៃ ក្នុងដំណាក់កាលចុងក្រោយនេះ។
លោករំឭកឡើងវិញថា វ៉ាក់សាំង ជំងឺកូវីដ ១៩ តែ ១ មុខ គឺមិនគ្រប់គ្រាន់ទេសម្រាប់ទប់ស្កាត់ជំងឺនេះ តែវាគ្រាន់តែកាត់បន្ថយ មិនឱ្យមានការវិវឌ្ឍទៅរកភាពធ្ងន់ធ្ងរនៃជំងឺ និងកាត់បន្ថយការស្លាប់តែប៉ុណ្ណោះ។ លោកនាយករដ្ឋមន្ត្រី អំពាវនាវដល់ប្រជាពលរដ្ឋឱ្យប្រកាន់យកវិធានការសុខាភិបាល គឺ ៣ ការពារ និង ៣ កុំ ដើម្បីទប់ស្កាត់ការឆ្លងជំងឺនេះ។
លោកបញ្ជាក់ថា៖ «ចំណុចនេះគឺជាចំណុចដើម្បីរក្សានូវជីវិតរបស់ប្រជាជនរក្សានូវសុខភាពរបស់ប្រជាជន។ ដូច្នេះហើយ បើសិនជាយើងរក្សាបានជីវិត យើងនៅមានឱកាសធ្វើបុណ្យធ្វើទានរាប់សិបឆ្នាំតទៅទៀតសម្រាប់អ្នកដែល មានវ័យក្មេង និងរាប់ឆ្នាំទៅទៀតសម្រាប់អ្នកដែលមានវ័យចំណាស់ ដូច្នេះវាមិនមែនជាការងាយស្រួលសម្រាប់ការសម្រេចចិត្តមួយដែលត្រូវធ្វើបែបនេះនោះទេ»។
លោក ហ៊ុន សែន កាលពីយប់ថ្ងៃទី ២៣ កញ្ញា បានចេញសេចក្តីសម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌចាប់ពីបិណ្ឌ ៤ រហូតដល់ថ្ងៃភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ក្រោយពិនិត្យឃើញមានការជួបជុំ និងប្រមូលផ្តុំមនុស្សជាច្រើននៅតាមបណ្តាវត្តអារាម។
លោកថ្លែងតាមរយៈសារជាសំឡេងនេះថា៖ «ខ្ញុំព្រះករុណាខ្ញុំសង្ឃឹមថា បងប្អូនជនរួមជាតិ ព្រះសង្ឃ ក៏ដូចជាបងប្អូនជនរួមជាតិរបស់យើងដែលជាពុទ្ធបរិស័ទ ពុទ្ធសាសនិក ពិតជានឹងយោគយល់បាននូវការសម្រេចរបស់ខ្ញុំព្រះករុណាខ្ញុំ ដើម្បីធានាដល់ជីវិតរបស់ប្រជាជនយើង។ ព្រោះថា ប្រសិនបើមានការរីករាលដាល វត្តដែលមានឆ្លងប្រមាណជាពាក់កណ្តាលចំនួនវត្តនៅទីក្រុងភ្នំពេញ នេះត្រូវបានបន្តនៅថ្ងៃនេះហើយរហូតទៅដល់ថ្ងៃភ្ជុំ។ តើយើងនឹងមានព្រះសង្ឃ និងប្រជាពលរដ្ឋប៉ុន្មានទៀតទៅដែលត្រូវឆ្លង»។
អ្វីដែលគួរឱ្យបារម្ភបំផុតនោះគឺការឆ្លងជំងឺកូវីដ ១៩ ចាប់ផ្តើមចេញពីវត្តជាទីដែលប្រជាពលរដ្ឋបានមកធ្វើបុណ្យហើយបានធ្វើដំណើរចេញពីវត្តអារាមដោយនាំជំងឺទៅកាន់ក្នុងផ្ទះរបស់ពួកគេ។ ជំងឺនេះមិនត្រឹមតែកើតឡើងនៅភ្នំពេញនោះទេ តែវារាលដាលដល់ទីជនបទ។ លោក ហ៊ុន សែន បន្ត។
លោកថ្លែងថា៖ «ដូច្នេះ សភាពការណ៍នេះជាសភាពការណ៍ដ៏អាក្រក់សម្រាប់ការព្យាករទុករបស់ខ្ញុំព្រះករុណាខ្ញុំ។ ពិតហើយ គឺយើងមិនឱ្យព្រះសង្ឃរបស់យើងដាច់ចង្ហាន់នោះទេ។ ខ្ញុំនៅក្នុងការបញ្ជាទាក់ទិននឹងការដាក់ចេញនូវវិធានការបិទ [ពិធីបុណ្យកាន់បិណ្ឌ និងភ្ជុំបិណ្ឌ] ត្រូវធ្វើទាំងយប់ ដើម្បីធានាថា អនុញ្ញាតឱ្យបន្តកាន់បិណ្ឌទី ៣»។
លោក ហ៊ុន សែន បញ្ជាក់ថា៖ «ប៉ុន្តែបិណ្ឌទី ៤ ត្រូវបានផ្អាក តែប្រជាជនយើងក៏នៅមានឱកាសចាត់តាំង ដើម្បីជាមួយនឹងអាជ្ញាធរ សម្របសម្រួលគ្នាដើម្បីនាំចង្ហាន់ ឬក៏នាំទេយ្យវត្ថុដើម្បីយកទៅប្រគេនព្រះសង្ឃបានដដែល»។
ព្រះសង្ឃ និងអ្នកស្នាក់នៅវត្តចំនួន ១៤១ អង្គ/នាក់ ត្រូវបានរកឃើញវិជ្ជមានជំងឺកូវីដ ១៩ ក្នុងនោះព្រះសង្ឃវិជ្ជមានជំងឺនេះមាន ៩៧ អង្គ ក្រោយពីក្រុមគ្រូពេទ្យចុះយកសំណាកទាំង ១៥១ វត្ត នៅទូទាំងរាជធានីភ្នំពេញ បន្ទាប់ពីវត្តមួយចំនួន មានការផ្ទុះការឆ្លងរាលដាលវីរុសកូវីដ ១៩ ក្នុងពិធីបុណ្យកាន់បិណ្ឌថ្ងៃទី ១ និងទី ២។
លោក ទេព គង្គា ប្រធានមន្ទីរធម្មការ និងសាសនារាជធានីភ្នំពេញ ប្រាប់នាថ្ងៃទី ២៦ កញ្ញា ថា៖ «សរុប ទាំងអស់ ១៤១ [អ្នកវិជ្ជមានកូវីដ] ប៉ុន្តែព្រះសង្ឃតែ ៩៧ អង្គទេ»។
លោកថា ក្រុមការងារប្រយុទ្ធជំងឺនេះកំពុងដើរបាញ់ថ្នាំសម្លាប់មេរោគនៅទូទាំង ១៥១ វត្ត ហើយការកាន់បិណ្ឌមិនទាន់ត្រូវបានអនុញ្ញាតទេ រង់ចាំការសម្រេចពីថ្នាក់ដឹកនាំរដ្ឋាភិបាលជាមុនសិន។
លោកថ្លែងថា៖ «យើងបិទការកាន់បិណ្ឌ ប៉ុន្តែយើងអត់បិទវត្តទេ ដោយសារថាយើងត្រូវអនុញ្ញាតឱ្យប្រជាពលរដ្ឋដូចថាយើងកាន់វេន អ៊ីចឹង ១ វេន ៥០ នាក់ ៦០ នាក់។ អ៊ីចឹង យើងធ្វើចង្ហាន់វន្ទាទៅដឹកទៅតែ ២ នាក់អីទៅបានហើយ ដាក់នៅមុខវត្តនៅតាមតំបន់ទីតាំងសុវត្ថិភាពអ៊ីចឹង ដូចជាបាញ់អាល់កុល បាញ់អីឱ្យលោកវេរហ្នឹងឱ្យទៅ»។
បើតាមលោក គង្គា ការចុះយកសំណាកនៅ ១៥១ វត្តធ្វើតែ ១ ថ្ងៃប៉ុណ្ណោះគឺនៅថ្ងៃទី ២៤ កញ្ញា៕
