ភ្នំពេញៈ តុលាការខេត្តតាកែវ បានឃុំខ្លួនបុរសម្នាក់ នៅពន្ធនាគារខេត្ត កាលពីថ្ងៃទី ២៦ កញ្ញា ពាក់ព័ន្ធនឹងការជួញដូរគ្រឿងញៀនជិត ១ គីឡូក្រាម ដែលឃាត់ខ្លួននៅភូមិត្រាំត្បាល់ ឃុំក្រាំងលាវ ស្រុកបាទី ខេត្តតាកែវ។
លោក ង៉ែត ដាវុធ អ្នកនាំពាក្យតុលាការខេត្តតាកែវប្រាប់នៅរសៀលថ្ងៃទី ២៧ កញ្ញាថា ជនត្រូវចោទ ឈ្មោះ លិន តូច អាយុ ៤៧ ឆ្នាំ ត្រូវបានឃុំខ្លួនក្នុងពន្ធនាគារខេត្តតាកែវ ហើយ កាលពីថ្ងៃទី ២៦ កញ្ញា។
លោកថ្លែងថា៖ «ករណីនេះ ចៅក្រមសម្រេចចេញដីកាឃុំហើយ ពីថ្ងៃម្សិលមិញ ក្នុងបទចោទជួញដូរគ្រឿងញៀន តាមមាត្រា ៤០ ច្បាប់ស្តីពីការត្រួតពិនិត្យគ្រឿងញៀន»។
លោក អុិន សុង នាយករងមន្ទីរគ្រឿងញៀន នៃក្រសួងមហាផ្ទៃ កាលពីថ្ងៃទី ២៦ កញ្ញា ប្រាប់ថា ជនសង្ស័យត្រូវបានកម្លាំងសមត្ថកិច្ចនៃមន្ទីរប្រឆាំងគ្រឿងញៀនចាប់ខ្លួននៅភូមិត្រាំត្បាល់ ឃុំក្រាំងលាវ ស្រុកបាទី ខេត្តតាកែវកាលពីថ្ងៃទី ២៤ កញ្ញា ឆ្នាំ ២០២១។ ការឃាត់ខ្លួនជនសង្ស័យ គឺមានការសម្របសម្រួលផ្លូវច្បាប់ពីព្រះរាជអាជ្ញានៃអយ្យការអមសាលាដំបូងខេត្តតាកែវ។
បើតាមលោក អុិន សុង វត្ថុតាងដែលសមត្ថកិច្ចរឹបអូសបានពីជនសង្ស័យមានម្សៅសថ្លាសង្ស័យមេតំហ្វេតាមីន (ICE) ទម្ងន់ ៨៥៤.៣៦ ក្រាម៕