សកម្មភាពពលករមកពីថៃរៀបចំសម្ភារដាក់រថយន្តកងទ័ព បន្តធ្វើចត្តាឡីស័កតាមបណ្តាខេត្តនានា ដែលជាស្រុកកំណើតរបស់ពួកគេ។ រូបថត កងទ័ព
ភ្នំពេញៈ កងពលតូចដឹកជញ្ជូនលេខ ៩០ នៃកងទ័ពជើងគោក នៅតែបន្តដឹកជញ្ជូនពលករខ្មែរនៅតាមបណ្តាគោលដៅជាប់ព្រំដែនដែលបានកំណត់ ដើម្បីបន្តធ្វើចត្តាឡីស័កតាមបណ្តាខេត្តនានាដែលជាស្រុកកំណើតរបស់ពួកគេ ខណៈកាលពីថ្ងៃទី ២៦ មានពលករជាង ២០០ នាក់ត្រូវបានចល័ត។
ទំព័រហ្វេសប៊ុករបស់កងទ័ពជើងគោកនៃកងយោធពលខេមរភូមិន្ទ ចេញផ្សាយនៅថ្ងៃទី ២៦ កញ្ញា បានឱ្យដឹងថា រថយន្តកងទ័ពរបស់កងពលតូចដឹកជញ្ជូនលេខ ៩០ នៅថ្ងៃទី ២៦ ខែ កញ្ញា ឆ្នាំ ២០២១ នេះ បានដឹកជញ្ជូនពលករចំណាកស្រុកនៅតាមព្រំដែនកម្ពុជា-ថៃ មកដាក់នៅតាមបណ្តាខេត្តនានា បានចំនួន ២០៦ នាក់ ដែលស្មើនឹង ៣៥ ជើង។
ទំព័រហ្វេសបុ៊កដដែល បានបន្តថា កងពលតូចដឹកជញ្ជូនលេខ ៩០ កងទ័ពជើងគោក ជាអង្គភាពជំនាញដឹកជញ្ជូនសម្ភារ កម្លាំងទ័ពធានាបម្រើប្រយុទ្ធ បច្ចុប្បន្នកំពុងទទួលបទបញ្ជាដឹកពលករចំណាកស្រុកនៅតាមព្រំដែនកម្ពុជា-ថៃ មកដាក់នៅតាមបណ្តាខេត្តនានា ដែលជាវិធានការមួយរបស់រដ្ឋាភិបាល ក្នុងការទប់ស្កាត់ការឆ្លងរីករាលដាលជំងឺកូវីដ ១៩ ចូលសហគមន៍ តាមរយៈពលករចំណាកស្រុកទាំងនោះ។
.jpg)
ទំព័រហ្វេសប៊ុកនេះ បានអះអាងថា៖ «តាមរយៈបទបញ្ជានេះ កងពលតូចដឹកជញ្ជូនលេខ ៩០ និងកងកម្លាំងជំនាញដឹកជញ្ជូន ដែលបានចាត់តាំងក្នុងបេសកកម្មនេះ នៅបន្តអនុវត្តយ៉ាងយកចិត្តទុកដាក់ និងប្រកបដោយការទទួលខុសត្រូវខ្ពស់ ក្នុងការដឹកពលករខ្មែរ ទៅដាក់នៅតាមបណ្តាគោលដៅដែលបានកំណត់ ទាន់ពេលវេលា និងប្រកបដោយសុវត្ថិភាព»។
លោក ហ៊ុល សំអុន មេបញ្ជាការកងពលតូចលេខ ៩៩ ដែលចូលរួមក្នុងការដឹកជញ្ចូនពលករខ្មែរដែរនោះ បានប្រាប់ ភ្នំពេញ ប៉ុស្តិ៍ បន្ថែមនៅថ្ងៃទី ២៧ កញ្ញាថា កម្លាំងកងទ័ពបានបន្តសកម្មភាពដឹកពលករខ្មែរ ដើម្បីយកទៅដាក់កន្លែងចត្តាឡីស័កនានា ជាបន្តបន្ទាប់ ហើយចំនួននេះ គឺនៅតែមានចំនួនច្រើនក្នុងមួយថ្ងៃៗ។
លោកបានបញ្ជាក់ថា៖ «សកម្មភាពរបស់យើងនេះ គឺយើងដឹកតាំងពីថ្ងៃទី ២០ ខែ ១២ ឆ្នាំ ២០២០ មក។ អ៊ីចឹងយើងដឹករហូត ហើយចំនួនសរុប គឺច្រើនណាស់ គ្រាន់យើងមិនសរុបទេ។ យើងធ្វើរបាយការណ៍សរុបពីចំនួននេះ»។
លោក ឌី ថេហូយ៉ា ប្រធានផ្នែកកម្មវិធីប្រឆាំងអំពើជួញដូរមនុស្ស និងការពារសិទ្ធិពលករចំណាកស្រុកនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានលើកឡើងថា ជារួមការត្រលប់មកវិញរបស់ពលករចំណាកស្រុកខ្មែរ គឺមានជាហូរហែជាប់មិនដាច់ ដោយសារហេតុផលមិនមានការងារធ្វើការឆ្លងកួវីដ ១៩ ការព្យាបាលកូវីដ ១៩ និងការចង់ទទួលការចាក់វ៉ាក់សាំងនៅកម្ពុជា។
លោក ឌី ថេហូយ៉ា ថ្លែងថា ដើម្បីកុំឱ្យមានហានិភ័យ រដ្ឋាភិបាល គួរតែត្រៀមការផ្តល់វ៉ាក់សាំងដល់ពលករនៅថៃឬរៀបចំតាមព្រំដែន ក្នុងនោះការដឹកជញ្ជូនពីព្រំដែនត្រូវធានាពីសុវត្ថិភាព កុំឱ្យមានភាពចង្អៀត និងត្រូវរក្សាគម្លាត។ នៅតាមមណ្ឌលចត្តាឡីស័កត្រូវរៀបចំបន្ទប់ទឹក និងបន្ទប់ស្នាក់នៅឱ្យបានច្រើន និងដាច់ដោយឡែកស្របតាមនិយាមសុវត្ថិភាព ហើយរដ្ឋត្រូវតែផ្តល់កិច្ចគាំពារសង្គម និងជំនាញការងារ និងមុខរបរសម្រាប់ពលករដែលត្រលប់មកវិញ ដើម្បីធានាដល់ការមិនវិលត្រឡប់របស់ពួកគេផងដែរ៕
