បន្ទាយមានជ័យៈ អាជ្ញាធរខេត្តបន្ទាយមានជ័យបានហាមរថយន្តធុនធ្ងន់ធ្វើចរាចរណ៍លើកំណាត់ផ្លូវលេខ ២៦៨A ចាប់ពីចំណុចព្រៃមាន់ដល់អាងត្រពាំងថ្ម ស្រុកភ្នំស្រុកជាបណ្ដោះអាសន្ន ដើម្បីថែរក្សាផ្លូវថ្នល់ ស្ពាន កុំឲ្យបាក់ស្រុត ខណៈជំនន់ទឹកភ្លៀងកំពុងប៉ះពាល់ដល់ ៦ ក្រុង-ស្រុកនៃខេត្តនេះ ហើយពលរដ្ឋប្រមាណ ៧៤០ គ្រួសារ ត្រូវបានជម្លៀសទៅទីទួលសុវត្ថិភាព។
លោក សុក ចាន់ថា ប្រធានមន្ទីរសាធារណការនឹងដឹកជញ្ជូន ខេត្តបន្ទាយមានជ័យបានប្រាប់ ភ្នំពេញ ប៉ុស្តិ៍នៅថ្ងៃទី ២៧ ខែកញ្ញាថា ជំនន់ទឹកភ្លៀងនាប៉ុន្មានថ្ងៃចុងក្រោយនេះបានបង្កឲ្យមានការជន់លិច និងហូរកាត់ផ្លូវមួយចំនួនក្នុងខេត្តបន្ទាយមានជ័យ ជាពិសេសកំណាត់ផ្លូវខេត្តលេខ ២៦៨A ចាប់ពីព្រៃមាន់ ដល់អាងត្រពាំងថ្ម ស្រុកភ្នំស្រុក។
លោកបានបញ្ជាក់ថា៖ «ដើម្បីថែរក្សាផ្លូវថ្នល់ ស្ពាន កុំឲ្យបាក់ស្រុត និងធានាដល់ការធ្វើចរាចរណ៍ ប្រកបដោយសុវត្ថិភាពយើងបានសម្រេចផ្អាកចរាចរណ៍បណ្តោះអាសន្ននូវរថយន្តដឹកជញ្ជូនធុនធ្ងន់គ្រប់ប្រភេទ ធ្វើដំណើរឆ្លងកាត់តាមកំណាត់ផ្លូវខេត្តលេខ ២៦៨A ចាប់ពីចំណុចព្រៃមាន់ដល់អាងត្រពាំងថ្ម ស្រុកភ្នំស្រុក ចាប់ពីថ្ងៃជូនដំណឹងនេះតទៅ រហូតដល់មានការជូនដំណឹងសាជាថ្មី»។
បើតាម លោក ចាន់ថា ប្រភេទរថយន្តទេសចរណ៍ជាលក្ខណៈគ្រួសារ អាចធ្វើដំណើរឆ្លងកាត់កំណាត់ផ្លូវនេះបានជាធម្មតា។ ជាមួយគ្នានេះលោកបានរំពឹងថា ក្រោយពីទទួលបានសេចក្តីជូនដំណឹងនេះ ពលរដ្ឋ និងក្រុមហ៊ុនដឹកជញ្ជូនទំនិញធុនធំនឹងអនុវត្តតាមដោយការទទួលខុសត្រូវខ្ពស់ដើម្បីរួមចំណែកថែរក្សា ផ្លូវថ្នល់ ស្ពាន ប្រើប្រាស់ឲ្យបានយូរអង្វែង ។
ចាប់តាំងពីដើមខែកញ្ញាមក ជំនន់ទឹកភ្លៀងបានបង្កផលប៉ះពាល់ដល់ហេដ្ឋារចនាសម្ព័ន្ធផ្លូវជាតិ ផ្លូវខេត្តនិង ផ្លូវលំជនបទនិងដំណាំកសិកម្ម រួមទាំងលំនៅឋានពលរដ្ឋក្នុងខេត្តចំនួន៧ រួមមាន ខេត្តបន្ទាយមានជ័យ បាត់ដំបង ប៉ៃលិន ព្រះវិហារ ឧត្តរមានជ័យ ពោធិ៍សាត់ និងកំពង់ឆ្នាំង។ ក្នុងនោះខេត្តបន្ទាយមានជ័យរងផលប៉ះពាល់ធ្ងន់ធ្ងរជាងគេ។ នេះបើតាមលោក ឃុន សុខា អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ ។
លោកបានថ្លែងថា៖ «គិតត្រឹមព្រឹកថ្ងៃទី ២៧ ខែ កញ្ញា ឆ្នាំ ២០២១ ជំនន់ទឹកភ្លៀងក្នុងខេត្តយបន្ទាយមានជ័យ បានបង្កផលប៉ះពាល់ជីវភាពរស់នៅរបស់ពលរដ្ឋចំនួន ៦ ៦៨៦ គ្រួសារ ក្នុងក្រុង-ស្រុកចំនួន ៦ រួមមាន ក្រុងសិរីសោភ័ណ ប៉ោយប៉ែត ស្រុកមង្គលបុរី ភ្នំស្រុក ម៉ាឡៃ និងស្រុកអូរជ្រៅ ក្នុងនោះពលរដ្ឋចំនួន ៧៣៦ គ្រួសារ ត្រូវបានជម្លៀសទៅទីទួលសុវត្ថិភាព»។
បើតាមលោកសុខា មកទល់ពេលនេះ ក្រុមអន្តរាគមន៍សង្គ្រោះរបស់គណៈកម្មាធិការជាតិគ្រប់គ្រងគ្រោះមហន្តរាយថ្នាក់ជាតិ កំពុងសហការជាមួយថ្នាក់ខេត្តចុះជួយអន្តរាគមន៍ដល់ពលរដ្ឋគ្រោះដោយជំនន់ទឹកភ្លៀងនេះ។ ក្រុមការងារក៏បានផ្ដល់ជំនួយសង្គ្រោះបឋមមួយចំនួន រួមមាន គ្រឿងបរិភោគ ឧបភោគ និងសម្ភារប្រើប្រាស់ដល់គ្រួសាររងគ្រោះដែលកំពុងស្នាក់នៅបណ្ដោះអាសន្នក្នុងទីទួលសុវត្ថិភាព។
យ៉ាងណាក្ដី នៅពេលនេះស្ថានភាពជំនន់ទឹកភ្លៀងក្នុងខេត្តបន្ទាយមានជ័យបានថមថយបន្តិចហើយ ប៉ុន្តែនៅខេត្តឧត្តរមានជ័យកម្ពស់ទឹកក្នុងអាងស្តុកទឹកមួយចំនួនបានហក់ឡើងដល់កម្រិតប្រកាសអាសន្ន។មិនតែប៉ុណ្ណោះមានសេចក្ដីរាយការណ៍ពីអាជ្ញាធរមូលដ្ឋានថាមានយុវជនវ័យ ១៩ ឆ្នាំម្នាក់បានស្លាប់ដោយលង់ទឹកអូរ កាលពីព្រលប់ថ្ងៃទី ២៦ ខែកញ្ញា នៅឃុំ ស្រឯម ស្រុកជាំក្សាន្ត គ្រាដែលកំពុងមានជំនន់ទឹកភ្លៀងកើតឡើង។
លោក ប្រាក់ ភី មេឃុំស្រអែមបានប្រាប់ ភ្នំពេញ ប៉ុស្តិ៍ថា យុវជនរងគ្រោះឈ្មោះ ជុំ មិថុនា អាយុ ១៩ ឆ្នាំ ជាសិស្សថ្នាក់ទី១២ មានលំនៅក្នុងភូមិស្រអែមខាងជើង ឃុំស្រអែម ស្រុកជាំក្សាន្ត ខេត្តព្រះវិហារ។ មុនកើតហេតុ យុវជនរងគ្រោះ និងមិត្តភក្តិគាត់៩នាក់នាក់ទៀតបាននាំគ្នាមកលោតលេងទឹក នៅទំនប់បង្ហៀរទឹកតេជោបុស្សស្បូវ។
លោកបានបញ្ជាក់ថា៖ «តាមការអះអាងពីសាក្សីនៅកន្លែងកើតហេតុ បន្ទាប់ពីលោតលេងទឹកមួយសម្ទុះក្រោយមកនៅវេលាម៉ោងជាង ៦ ល្ងាច យុវជនរងគ្រោះ ក៏បានលោតទឹកលេងម្ដងទៀត ហើយក៏ត្រូវទឹកហូរកួចបោកគាបចូលទៅក្នុងរូងថ្ម បណ្ដាលឲ្យលង់ទឹកស្លាប់តែម្ដង»។
ដោយមានជំនឿអរូបី លោក ប្រាក់ ភី បានប្រាប់ថា ទឹកអូរបុស្សស្បូវនៅចំណុចនោះ គឺមាន «ជើងកប» ព្រោះជារៀងរាល់ឆ្នាំ ឲ្យតែរដូវទឹកជំនន់មកដល់គឺតែងតែមានមនុស្សលង់ស្លាប់។កាលពីឆ្នាំមុន ក្មេងប្រុសអាយុ៧ឆ្នាំម្នាក់ បានរួមដំណើរជាមួយឪពុកម្ដាយរបស់វាតាមម៉ូតូ មកដល់ចំណុចខាងលើនេះ ក៏បានរអិលដួល ធ្លាក់ចូលទៅក្នុងអូរ ហើយត្រូវទឹកហូរគួចបណ្ដាលឲ្យលង់ស្លាប់ដែរ។
ជាមួយគ្នានេះ លោក ប្រាក់ ភី បានអំពាវនាវ ដល់ពលរដ្ឋឱ្យបង្កើនការប្រុងប្រយ័ត្ន ជាពិសេសគួរផ្អាកកម្មការកម្សាន្តតាមតំបន់រមណីយដ្ឋានទឹកធ្លាក់ឬតំបន់ដែលមានទឹកអូរស្ទឹងនឹងបឹងបួ ក្នុងអំឡុងពេលមានគ្រោះទឹកជំនន់នេះ ព្រោះវាអាចបង្កឲ្យមានគ្រោះថ្នាក់ដល់អាយុជីវិត ។
លោក ញើន កួន ប្រធានមន្ទីរធនធានទឹកនិងឧតុនិយម ខេត្តឧត្តរមានជ័យ បានប្រាប់ភ្នំពេញប៉ុស្តិ៍ថា ពេលនេះ កម្ពស់ទឹកក្នុងអាងស្តុកទឹកចំនួន ៥ ទីតាំង ក្នុងស្រុកត្រពាំងប្រាសាទ ស្រុកអន្លង់វែង និងស្រុកចុងកាល់ បានហក់ឡើង ជិតដល់កម្រិតប្រកាសអាសន្នហើយ។ ក្នុងនោះអាងទឹកថ្មី នៅឃុំត្រពាំងតាវ ស្រុកអន្លង់វែង ទឹកមានកម្ពស់ ៣,៤៩ ម៉ែត្រ ជិតដល់កម្រិតប្រកាសអាសន្នដែលមានកម្ពស់ ៣,៥០ ម៉ែត្រ។ ដូចគ្នានេះ អាងទឹកស្រែង ២ ស្ថិតនៅឃុំពង្រ ស្រុកចុងកាល់ ទឹកមានកម្ពស់ ៣៩,៨០ ម៉ែត្រ ខណៈកម្ពស់ទឹកត្រូវប្រកាសអាសន្នគឺ ៣៩,៩០ ម៉ែត្រ។
ចំណែកអាងទឹក ០៥ (សូន្យប្រាំ) នៅឃុំអូរស្វាយ ស្រុកត្រពាំងប្រាសាទទឹកមានកម្ពស់ ១,៦៥ ម៉ែត្រ ទាបជាងកម្រិតប្រកាសអាសន្ន ០,៣៥ ម៉ែត្រ ខណៈអាងទឹកតាម៉ុក នៅឃុំ-ស្រុកអន្លង់វែង ទឹកមានកម្ពស់ ៣,៩៩ម៉ែត្រ និងលិចហូរកាត់លើស្ពានតាម៉ុកក្នុងកម្ពស់ ០,៣០ ម៉ែត្រ ប៉ុន្តែកម្រិតកម្ពស់ទឹកដែលត្រូវប្រកាសអាសន្នគឺ ៤,៥០ ម៉ែត្រនិងអាងទឹកស្រែង ១ ស្ថិតនៅឃុំ ស្រុកចុងកាល់ ទឹកមានកម្ពស់ ២៦,៥៥ ម៉ែត្រ ជិតដល់កម្រិតប្រកាសអាសន្នដែលមាន ២៧ ម៉ែត្រ ។
លោក កួន បានបញ្ជាក់ថា៖ «ប៉ុន្តែដោយសារ សមត្ថភារំដោះទឹករបស់សំណង់បង្ហៀរ និងសំណង់ទ្វារទឹក បានបង្ហូរទឹកចេញលឿន នៅរសៀលថ្ងៃ ២៧ ខែ កញ្ញា ឆ្នាំ ២០២១ នេះ តំបន់អាងទឹកខ្លះ ទឹកបានស្រកចុះជាបណ្ដើរៗហើយ មិនបង្កផលប៉ះពាល់ដល់ដំណាំកសិកម្ម ឬលំនៅឋានប្រជាពលរដ្ឋនោះទេ»៕