លោកស្រី ឱ វណ្ណឌីន ផ្ដល់អំណោយដល់មនុស្សចាស់ចាក់វ៉ាក់សាំងពីខែសីហា។ រូប ក្រសួងសុខាភិបាល
ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នៃក្រសួងសុខាភិបាលបានក្រើនរំឭកដល់ពលរដ្ឋដែលមិនទាន់បានចាក់វ៉ាក់សាំងដោយសារមូលហេតុផ្សេងៗ អាចស្ម័គ្រចិត្តចាក់ដោយពិគ្រោះជាមួយគ្រូពេទ្យនៅតាមទីតាំងចាក់វ៉ាក់សាំង ពិសេសសម្រាប់ក្រុមគោលដៅ និងប្រឈមនឹងហានិភ័យនៃភាពធ្ងន់ធ្ងរជំងឺកូវីដ ១៩ ដែលមានស្ត្រីមានផ្ទៃពោះ ស្ត្រីបំបៅកូនដោយទឹកដោះ និងអ្នកមានជំងឺប្រចាំកាយ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នៅថ្ងៃទី ១៩ ខែតុលាបានធ្វើការជូនព័ត៌មានបន្ថែមពីការចាក់វ៉ាក់សាំងកូវីដ ១៩ ដល់ប្រជាពលរដ្ឋដែលមានវ័យចាស់ស្ត្រីមានផ្ទៃពោះ ស្ត្រីបំបៅកូនដោយទឹកដោះ អ្នកដែលបានព្យាបាលជាសះស្បើយពីជំងឺផ្សេងៗរួមទាំងជំងឺកូវីដ ១៩ និងអ្នកមានជំងឺប្រចាំកាយ។
លោកស្រីបានលើកឡើងថា រហូតមកទល់បច្ចុប្បន្ននេះ (គ.វ.ក-១៩) សង្កេតឃើញថា មានប្រជាពលរដ្ឋ និងកុមារចាប់ពីអាយុ ៦ ឆ្នាំឡើង បានស្ម័គ្រចិត្តទៅចាក់វ៉ាក់សាំងកូវីដ ១៩ បានយ៉ាងច្រើនក្នុងនោះក៏មានលោកតា និងលោកយាយ ដែលមានអាយុលើសពី ១០០ ឆ្នាំបានមកចាក់វ៉ាក់សាំងកូវីដ ១៩ ប្រកបដោយសុវត្ថិភាពផងដែរ។
.jpg)
ទន្ទឹមគ្នានេះដែរ (គ.វ.ក-១៩) ក៏សង្កេតឃើញថា មានប្រជាពលរដ្ឋមួយចំនួនតូចមិនទាន់បានស្ម័គ្រចិត្តមកចាក់វ៉ាក់សាំងកូវីដ ១៩ នៅឡើយ ដោយសារមូលហេតុផ្សេងៗ។
លោកស្រី ឱ វណ្ណឌីន បានបញ្ជាក់ថា៖ «ចំពោះអ្នកជំងឺកូវីដ ១៩ ដែលបានស្លាប់កន្លងមក ភាគច្រើនជាអ្នកដែលមិនបានចាក់វ៉ាក់សាំង ដូចនេះដើម្បីកាត់បន្ថយសភាពធ្ងន់ធ្ងរនៃជំងឺកូវីដ ១៩ និងកាត់បន្ថយជាអតិបរមានូវអត្រាស្លាប់ដែលបណ្តាលមកពីជំងឺកូវីដ ១៩ (គ.វ.ក-១៩) សូមអំពាវនាវដល់ប្រជាពលរដ្ឋទាំងអស់ ស្ម័គ្រចិត្តទៅចាក់វ៉ាក់សាំង ដោយបងប្អូនអញ្ជើញទៅពិគ្រោះជាមួយគ្រូពេទ្យនៅតាមទីតាំងចាក់ឱ្យបានគ្រប់ៗគ្នា»។
ប្រធាន គ.វ.ក-១៩ រូបនេះក៏បានប្រាប់ទៅដល់ប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌរាជធានី-ខេត្ត ត្រូវបន្តណែនាំបន្ថែមដល់ប្រធានមន្ទីរសុខាភិបាល រាជធានី-ខេត្ត ឱ្យជូនដំណឹងទៅគ្រប់ទីតាំងចាក់វ៉ាក់សាំងកូវីដ ១៩ ទាំងអស់ឱ្យផ្ដល់ការចាក់វ៉ាក់សាំងនេះដល់ក្រុមគោលដៅទាំងនេះឱ្យមានភាពរលូននៅគ្រប់ទីតាំងចាក់វ៉ាក់សាំងទាំងអស់។
លោកស្រី ឱ វណ្ណឌីន បានបន្ថែមថា៖ «ប្រធានអនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌរាជធានី-ខេត្ត ក៏ត្រូវសម្រង់ចំនួនឱ្យបានច្បាស់លាស់នៅតាមផ្ទះនីមួយៗនូវអ្នកដែលមិនទាន់បានចាក់វ៉ាក់សាំង និងមូលហេតុច្បាស់លាស់ហើយជំរុញការអប់រំ ដើម្បីឱ្យពួកគាត់យល់ពីសារៈប្រយោជន៍របស់វ៉ាក់សាំង និងសម្រេចចិត្តចាក់ឱ្យបានគ្រប់ៗគ្នា ទោះជាមានវ័យចាស់ក៏ដោយ»។
ទាក់ទងនឹងការចាក់វ៉ាក់សាំងកូវីដ ១៩ ក្នុងប្រទេសកម្ពុជានេះដែរ លោកនាយករដ្ឋមន្ត្រី ហ៊ុន សែន ក៏បានថ្លែងក្នុងសារសំឡេងពិសេសនាថ្ងៃទី ១៩ ខែតុលាថា ការចាក់វ៉ាក់សាំងបានប្រព្រឹត្តទៅយ៉ាងប្រសើរដែលមកទល់ពេលនេះពលរដ្ឋជាង ១៣,៦ លាននាក់ បានចាក់វ៉ាក់សាំងកូវីដ ១៩ នៃប្រជាជន ១៦ លាននាក់ ដែលធ្វើឱ្យអ្នកឆ្លងមួយចំនួនមិននាំទៅរកភាពធ្ងន់ធ្ងរបាន។
លោកបានថ្លែងថា៖ «ស្ថានភាពទាំងអស់នេះ អាចនិយាយបានថា វ៉ាក់សាំងគឺជាគ្រឹះការពារដ៏រឹងមាំសម្រាប់ការពារអាយុជីវិតរបស់ប្រជាជន កាត់បន្ថយការឆ្លង និងមិននាំដល់គ្រោះថ្នាក់»។
លោកក៏បានស្នើដល់អាជ្ញាធរ ក្រុមគ្រូពេទ្យ និងប្រជាពលរដ្ឋត្រូវខិតខំ ដើម្បីទទួលបានការចាក់វ៉ាក់សាំង បើទោះបីជាយុទ្ធនាការចាក់វ៉ាក់សាំងតាមបណ្តាខេត្តជាច្រើនបានបិទបញ្ចប់ក៏ដោយក៏ក្រុមគ្រូពេទ្យបានទុកវ៉ាក់សាំងសម្រាប់ចាក់ជូនដល់ប្រជាពលរដ្ឋ ដែលមិនទាន់បានចាក់ផងដែរ។
លោក ហ៊ុន សែន មានប្រសាសន៍ថា៖ «យើងអាចមានកម្មវិធីចាក់វ៉ាក់សាំងទៅដល់ប្រជាពលរដ្ឋនៅតាមភូមិ និងតាមផ្ទះតែម្តងក្នុងករណីដែលប្រជាពលរដ្ឋរបស់យើងមិនអាចធ្វើដំណើរមកកាន់ទីកន្លែងចាក់វ៉ាក់សាំងបាន។ អាជ្ញាធរត្រូវពិនិត្យសិក្សាភូមិសាស្ត្រនៅកន្លែងដាច់ស្រយាលឆ្ងាយដែលមិនទាន់បានចាក់ ត្រូវទៅចាក់ឱ្យពួកគាត់ដល់ទីកន្លែង ដើម្បីឱ្យពួកគាត់ទទួលបានភាពស៊ាំសហគមន៍»។
បើតាមលោកនាយករដ្ឋមន្ត្រីមកទល់ពេលនេះ កម្ពុជាទទួលបានវ៉ាក់សាំងកូវីដ ១៩ ទាំងការបញ្ជាទិញ និងការផ្តល់ជាជំនួយពីប្រទេសផ្សេងៗបានចំនួនជាង ៣៨ លានដូស សម្រាប់ចាក់ជូនប្រជាពលរដ្ឋនៅក្នុងប្រទេសកម្ពុជា៕
វីដេអូ៖
