មន្ត្រីជំនាញត្រួតពិនិត្យការវេចខ្ចប់វត្ថុបុរាណនៅសារមន្ទីរជាតិ។ រូបថត សារមន្ទីរជាតិ
ភ្នំពេញៈ ក្រសួងវប្បធម៌ និងវិចិត្រសិល្បៈគ្រោងនឹងនាំយកវត្ថុបុរាណមុនសម័យអង្គរចំនួន ៨ ទៅតាំងពិព័រណ៍នៅសារមន្ទីរសិល្បៈក្លេវើឡេន រដ្ឋអូហៃយ៉ូនៃសហរដ្ឋអាមេរិក ដែលចាប់ផ្ដើមពីថ្ងៃទី ១៤ ខែវិច្ឆិកា ឆ្នាំ ២០២១ រហូតដល់ថ្ងៃទី ២៣ ខែមករា ឆ្នាំ ២០២២ ក្រោមចំណងជើងថា «Revealing Krishna: Journey to Cambodias Sacred Mountain»។
លោក ឆាយ វិស្សុត ប្រធាននាយកដ្ឋានគ្រប់គ្រងសារមន្ទីរជាតិនៃក្រសួងវប្បធម៌ និងវិចិត្រសិល្បៈប្រាប់ភ្នំពេញប៉ុស្តិ៍នៅថ្ងៃទី ២១ ខែតុលា ថា៖ «ចំពោះការតាំងពិព័រណ៍នេះគឺជាការសហការរវាងសារមន្ទីរជាតិកម្ពុជា និង សារមន្ទីរសិល្បៈ ក្លេវើឡេន របស់អាមេរិក មិនមែនជាការតាំងពិព័រណ៍អន្តរជាតិ ដែលមានការចូលរួមពីភាគីពាក់ព័ន្ធផ្សេងៗនោះទេ។
សារមន្ទីរសិល្បៈក្លេវើឡេន គេនឹងជួយជាថវិកាខ្លះទៅក្រសួង ដើម្បីអភិវឌ្ឍ និងអភិរក្សបេតិកភណ្ឌជាតិ ប៉ុន្តែ វាមិនច្រើនទេ ព្រោះជាគម្រោងសហការ វាមិនមែនជាការខ្ចីយកទៅដាក់តាំងរហូតទេ ពេលចប់យកត្រឡប់មកវិញ»។
.jpg)
លោកបានបន្តថា សម្រាប់ការតាំងពិព័រណ៍នេះ សារមន្ទីរជាតិបានជ្រើសរើសរូបសិល្បៈមុនសម័យអង្គរចំនួន ៨ យកទៅដាក់តាំងបង្ហាញជូនភ្ញៀវទេសចរ ព្រោះវាឆ្លើយតបទៅនឹងចំណងជើង ពិព័រណ៍ ថា «Revealing Krishna: Journey to Cambodias Sacred Mountain» ដែលមានន័យថា «ព្រះក្រឹស្ណា៖ ដំណើរទៅកាន់ភ្នំពិសិដ្ឋរបស់កម្ពុជា» ជាពិសេសសិល្បៈនៅភ្នំដា ពាក់ព័ន្ធនឹងព្រះនារាយណ៍ និងលិង្គ ព្រះឥសូរ ១។
លោក ឆាយ វិស្សុត ថ្លែងថា ចាប់តាំងពីឆ្នាំ ១៩៩៦ សារមន្ទីរជាតិបានយកវត្ថុសិល្បៈជាច្រើនប្រភេទទៅតាំងបង្ហាញនៅក្នុងប្រទេសជាច្រើន ទាំងនៅក្នុងអាមេរិកខាងជើង អឺរ៉ុប អាស៊ី អូស្ត្រាលី អាស៊ីអាគ្នេយ៍ ម៉ាឡេស៊ី ជប៉ុន និងសិង្ហបុរី ជាដើម ព្រោះដោយសារភាពទាក់ទាញនៃសិល្បៈវប្បធម៌របស់កម្ពុជា។
លោកថ្លែងថា៖ «មានប្រទេសជាច្រើនបានទាក់ទងមកសារមន្ទីរឱ្យយកវត្ថុសិល្បៈទៅដាក់តាំងបង្ហាញនៅក្រៅប្រទេស ជាពិសេសនៅសហរដ្ឋអាមេរិក។ ប្រទេសអាមេរិក គឺជាទីតាំង ១ សម្បូរសារមន្ទីរច្រើនជាងបណ្តាប្រទេសផ្សេងទៀតនៅលើពិភពលោក។ អ៊ីចឹង ហើយកិច្ចសហការប្រតិបត្តិការបញ្ជូនរូបសិល្បៈទៅតាំងនៅអាមេរិកមានច្រើនដងចាប់តាំងពីឆ្នាំ ១៩៩៦ មក»។
លោកបន្តថា ចំពោះការយករូបសិល្បៈវប្បធម៌របស់កម្ពុជាទៅដាក់តាំងពិព័រណ៍ នេះគឺជាឱកាសក្នុងការផ្សព្វផ្សាយនៅក្នុងប្រទេសលោកខាងលិចឱ្យបានស្គាល់ និងផលប្រយោជន៍ និងជាការផ្លាស់ប្តូរបទពិសោធនៃការរៀបចំពិព័រណ៍ និងបច្ចេកទេសវេចខ្ចប់ឱ្យបានត្រឹមត្រូវទៅតាមវត្ថុសិល្បៈ។ មួយវិញទៀតគឺដើម្បីពង្រីកកិច្ចសហប្រតិបត្តិការរវាងសារមន្ទីរជាតិកម្ពុជា និងសារមន្ទីរនៅក្នុងប្រទេសអាមេរិកផងដែរ។
លោកថ្លែងថា៖ «កន្លងមកនេះ ភាគីអាមេរិកធ្លាប់បានបញ្ជូនរូបចម្លាក់ឱ្យយើងដែរ។ អ៊ីចឹងទេ ការដែលយើងបញ្ជូនទៅនេះ ក្រៅតែពីការផ្សព្វផ្សាយ គឺយើងភ្ជាប់ទំនាក់ទំនងឱ្យកាន់តែល្អ ប្រសើររវាងសារមន្ទីរយើង និងខាងគេ»។ តាមការផ្សព្វផ្សាយរបស់ទំព័រហ្វេសប៊ុករបស់សារមន្ទីរជាតិកាលពីថ្ងៃទី ១៩ ខែតុលាឱ្យដឹងថា សារមន្ទីរជាតិមានប្រារព្ធពិធីបញ្ចប់ការវេចខ្ចប់រូបចំនួន ៨ ដើម្បីយកទៅតាំងពិព័រណ៍នៅសារមន្ទីរសិល្បៈក្លេវើឡេននារដ្ឋអូហៃយ៉ូ សហរដ្ឋ-អាមេរិក ដែលនឹងរៀបចំឡើងពីថ្ងៃទី ១៤ ខែវិច្ឆិកា ឆ្នាំ ២០២១ រហូតដល់ថ្ងៃទី ២៣ ខែមករា ឆ្នាំ ២០២២។
សារមន្ទីរជាតិបញ្ជាក់ថា រូបសិល្បៈ ឬ សមុច្ច័យទាំង ៨ ដែលត្រៀមយកទៅតាំងពិព័រណ៍នោះរួមមាន លិង្គមកពីសារមន្ទីរអង្គរបុរីនៃខេត្តតាកែវ។ ដោយឡែករូបនាងទុគ៌ា ព្រះនារាយណ៍ ព្រះក្រឹស្ណៈទ្រភ្នំគោវធ៌ន ព្រះពុទ្ធទ្រង់អភ័យមុទ្រា ស្នានទ្រោណី ពលរាម និងដងខ្លួនព្រះក្រឹស្ណៈទ្រភ្នំគោវធ៌ននៅសារមន្ទីរជាតិផ្ទាល់។
ក្រោមកិច្ចសហប្រតិបត្តិការរវាងរាជរដ្ឋាភិបាលកម្ពុជា និងសហរដ្ឋអាមេរិកលើវិស័យវប្បធម៌កាលពីខែមិថុនា ឆ្នាំ ២០២១ កន្លងមកនេះបានបញ្ជូនរូបចម្លាក់សិល្បៈបុរាណចំនួន ២៧ មកកាន់ប្រទេសកម្ពុជាវិញ ដែលមានរូបព្រះពុទ្ធបដិមា និងរូបចម្លាក់ព្រះវិស្ណុ៕
