ភ្នំពេញៈ របាយការណ៍អង្គការទេសន្តរប្រវេសន៍អន្តរជាតិ (IOM) បានឱ្យដឹងថា ក្នុងរយៈពេល ១ ឆ្នាំ និង ៦ ខែកន្លងមកនេះ ពលករចំណាកស្រុកកម្ពុជាដែលបានត្រឡប់ពីប្រទេសថៃវិញមានចំនួនជាង ២៥ ម៉ឺននាក់ ដែលក្នុងនោះ អ្នកឆ្លងជំងឺកូវីដ ១៩ មានជិត ២ ម៉ឺននាក់។
របាយការណ៍ដែលបានផ្សព្វផ្សាយនៅថ្ងៃទី ២២ ខែតុលា បញ្ជាក់ថាគិតចាប់តាំងខែមីនា ឆ្នាំ ២០២០ រហូតដល់ខែកញ្ញា ឆ្នាំ ២០២១ ពលករកម្ពុជាដែលបានត្រឡប់ពីប្រទេសថៃវិញក្នុងអំឡុងពេលការរាតត្បាតជំងឺកូវីដ ១៩ មានចំនួន ២៥២ ៩៥៦ នាក់ដែលក្នុងនោះអ្នកឆ្លងជំងឺកូវីដ ១៩ មានចំនួន ១៨ ៩៨៣ នាក់។
របាយការណ៍បន្តថា ពលករកម្ពុជាដែលត្រឡប់ពីប្រទេសថៃវិញ ក្នុងខែកញ្ញាមានចំនួន ១០ ៨០៥ នាក់ដែលក្នុងនោះអ្នកឆ្លងជំងឺកូវីដ ១៩ មានចំនួន ៣ ៨៣១ នាក់។
បើតាមរបាយការណ៍ក្នុងរយៈពេល ៩ ខែឆ្នាំនេះ គិតចាប់ពីខែមករាដល់ខែកញ្ញា ពលករកម្ពុជាដែលត្រឡប់ពីថៃវិញបានឆ្លងជំងឺកូវីដ ១៩ គឺមានចំនួន ១៨ ៤៦១ នាក់៕