ប្រជាពលរដ្ឋកម្ពុជាដែលធ្វើដំណើរទៅកាន់ប្រទេសថៃ មិនតម្រូវឱ្យធ្វើចត្តាឡីស័កឡើយ សម្រាប់អ្នកដំណើរដែលបានចាក់វ៉ាក់សាំងពេញលេញមិនតិចជាង ១៤ ថ្ងៃដែលនឹងចាប់ផ្តើមអនុវត្តពីថ្ងៃទី ០១ ខែវិច្ឆិកា ឆ្នាំ ២០២១ខាងមុខនេះ សម្រាប់អ្នកដែលចូលតាមផ្លូវអាការតែប៉ុណ្ណោះ។ នេះបើយោងតាមសេចក្តីជូនដំណឹងរបស់ស្ថានទូតព្រះរាជាណាចក្រកម្ពុជាប្រចាំប្រទេសថៃ។
ប្រទេសថៃបានលើកលែងការធ្វើចត្តាឡីស័កសម្រាប់ប្រជាពលរដ្ឋមកពីប្រទេស ឬដែនដីមានចំនួន ៤៦ ប្រទេសដែលក្នុងនោះមានប្រទេសកម្ពុជាផងដែរ។
ស្ថានទូតកម្ពុជាបានបញ្ជាក់ពីនីតិវិធីនៃការចូលប្រទេសថៃ សម្រាប់ប្រទេសលើកលែងចត្តាឡីស័កថា មុនពេលធ្វើដំណើរអ្នកដំណើរត្រូវមានបណ្ណចាក់វ៉ាក់សាំងបង្ការជំងឺកូវីដ ១៩ ពេញលេញមិនតិចជាង ១៤ ថ្ងៃ, មានឯកសារធានារ៉ាប់រងសុខភាពដែលមានប្រាក់ធានាមិនតិចជាង ៥ ម៉ឺនដុល្លារ។
សេចក្តីជូនដំណឹងបានបន្ថែមថា៖ «អ្នកដំណើរត្រូវមានឯកសារកក់ SHA+ ឬសណ្ឋាគារ AQ (ត្រូវមានបញ្ជាក់អំពីការបង់ប្រាក់) ដើម្បីរង់ចាំលទ្ធផលធ្វើតេស្តរកជំងឺកូវីដ ១៩ ពេលទៅដល់ប្រទេសថៃ និងត្រូវមានវិញ្ញាបនបត្របញ្ជាក់ថា គ្មានជំងឺកូវីដ ១៩ មិនលើស ៧២ ម៉ោង មុនពេលធ្វើដំណើរ (RT-PCR Covid-19)»។
ប្រភពដដែលបានបញ្ជាក់ផងដែរថា អ្នកដំណើរទាំងនេះ ត្រូវរស់នៅក្នុងប្រទេសដែលលើកលែងចត្តាឡីស័ករយៈពេល ២១ ថ្ងៃជាប់ៗគ្នា។
ស្ថានទូតកម្ពុជាបានបន្ថែមថា នៅពេលដែលមកដល់ប្រទេសថៃ អ្នកដំណើរត្រូវបង្ហាញឯកសារពាក់ព័ន្ធទាំងអស់នោះ ហើយត្រូវធ្វើតេស្ត RT-PCR រកជំងឺកូវីដ ១៩ មួយទៀត និងត្រូវរង់ចាំលទ្ធផល ១ យប់នៅសណ្ឋាគារ ដែលបានកក់ហើយ។
ស្ថានទូតកម្ពុជាថា៖ «ប្រសិនបើទទួលបានលទ្ធផលវិជ្ជមានត្រូវបញ្ជូនទៅព្យាបាល ដោយប្រើប្រាស់ធានារ៉ាប់រង ហើយប្រសិនបើលទ្ធផលអវិជ្ជមាន អ្នកដំណើរនោះអាចធ្វើដំណើរក្នុងប្រទេសថៃបានធម្មតា»។
គួរបញ្ជាក់ផងដែរថា SHA+ សំដៅលើសណ្ឋាគារដែលទទួលវិញ្ញាបនបត្រដែលចេញដោយ Amazing Thailand Safety និងរដ្ឋបាលសុខាភិបាលថៃ។ ចំណែក AQ សំដៅលើសណ្ឋាគារសម្រាប់ចត្តាឡីស័កដែលទទួលស្គាល់ដោយរដ្ឋាភិបាលថៃ៕