ភ្នំពេញ៖ វ៉ាក់សាំងកូវីដ១៩ ប្រភេទស៊ីណូវ៉ាក់ចំនួនជាង ១២ម៉ឺនដូស ដែលផ្តល់មករាជរដ្ឋាភិបាលកម្ពុជា តាមរយៈយន្តការ កូវ៉ាក់ (COVAX Facility) បានដឹកមកដល់កម្ពុជាដោយជោគជ័យ នាល្ងាចថ្ងៃទី២២ ខែតុលា ឆ្នាំ ២០២១។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានថ្លែងឱ្យដឹងក្នុងពេលចុះទទួលវ៉ាក់សាំងនាព្រលានយន្តហោះអន្តរជាតិភ្នំពេញ ថា ជំនួយសរុបវ៉ាក់សាំងចំនួនប្រមាណ ២,៥ លានដូសហើយដែលកម្ពុជាបានទទួលពីយន្តការកូវ៉ាក់ក្នុងចំណោមវ៉ាក់សាំងចំនួន ៦,៦ លានដែលយន្តការកូវ៉ាក់បានប្តេជ្ញាជួយមកប្រទេសកម្ពុជា ក្នុងការផ្គត់ផ្គង់វ៉ាក់សាំងនេះ។
លោកស្រីថា៖ «វ៉ាក់សាំងប្រមាណជាង ៤ លានដូសទៀត មិនទាន់មានការបញ្ជាក់ច្បាស់នៅឡើយទេថានឹងផ្តល់មកកម្ពុជានៅពេលណាទៀតនោះទេ»។
តំណាងអង្គការយូនីសេហ្វ (UNICEF) ប្រចាំកម្ពុជា លោកស្រី Foroogh Foyouzat បានធ្វើការលើកឡើងដោយបានកោតសរសើរចំពោះរាជរដ្ឋាភិបាលកម្ពុជាក្នុងការចាក់វ៉ាក់សាំងកូវីដ១៩ ទៅដល់ប្រជាពលរដ្ឋជាច្រើននាក់ផងដែរ។
លោកស្រីបានមានប្រសាសន៍ថា៖ «សម្រាប់យន្តការកូវ៉ាក់ នៅក្នុងផែនការយើងមានចំនួន ៦,៦ លានដូសដែលយើងមានគម្រោងក្នុងការផ្តល់មកប្រទេសកម្ពុជា ហើយបច្ចុប្បន្ននេះ យើងបានផ្តល់មកបានចំនួន ២,៥ លានដូសហើយរួមនៅថ្ងៃនេះ ហើយសម្រាប់វ៉ាក់សាំងដែលនៅសល់យើងនឹងធ្វើការដឹកមកជាបណ្តើរៗតាមផែនការរបស់រាជរដ្ឋាភិបាលកម្ពុជា»។
ទន្ទឹមនឹងនេះដែរ លោកស្រី Foroogh Foyouzat បានធ្វើការកោតសរសើរចំពោះរាជរដ្ឋាភិបាលកម្ពុជាក្នុងការចាក់វ៉ាក់សាំងកូវីដ១៩ ជូនដល់ប្រជាពលរដ្ឋរបស់ខ្លួនរហូតដល់កម្រិតមួយដែលហៅថាកម្រិតខ្ពស់និងសម្រេចបានមុនផែនការផងដែរ ដែលមនុស្សម្នាក់យ៉ាងហោចណាស់ចាក់បាន ២ដូសដែរ។
លោកស្រីថា ៖ «ការចាក់វ៉ាក់សាំងតែមួយមុខមិនមែនជាឧបករណ៍មួយក្នុងការចៀសផុតពីកូវីដនោះទេ ប៉ុន្តែត្រូវអនុវត្តនូវវិធានការសុខាភិបាល ពិសេស ៣ ការពារនិង ៣កុំ ដើម្បីឈានទៅបើកឡើងវិញនូវវិស័យជាច្រើន ក្នុងនោះខ្ញុំសប្បាយចិត្តដែលសាលារៀននឹងបើកឡើងវិញនៅថ្ងៃទី០១ ខែវិច្ឆិកានេះ»។
ក្នុងពេលនេះ លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជា ដែលបានទៅទទួលវ៉ាក់សាំងនាព្រលានយន្តហោះអន្តរជាតិភ្នំពេញនេះដែរ ក៏បានថ្លែងផងដែរថា វាជាដំណឹងល្អដែលរាជរដ្ឋាភិបាលគ្រោងនឹងបើកវិស័យសេដ្ឋកិច្ចឡើងវិញដោយសារគ្រប់គ្នាមានការនឿយណាយជាមួយនឹងជំងឺកូវីដ១៩នេះយូរដែរហើយ ប៉ុន្តែគ្រប់គ្នាត្រូវតែរក្សានូវតុល្យភាពក្នុងការបើកឡើងវិញនេះ។
លោកស្រី លី អៃឡែន បានមានប្រសាសន៍ថា ៖ «យើងត្រូវប្រយ័ត្នទុកជាមុនផងដែរ សម្រាប់គ្រប់គ្នាក៏ដូចជាខ្លួនខ្ញុំផ្ទាល់ថា ប្រសិនបើយើងបើកឡើងវិញយើងត្រូវតែមានការគ្រប់គ្រងហានិភ័យមួយច្បាស់លាស់ ដើម្បីចៀសវាងកុំឱ្យមានការត្រលប់មកវិញនូវការកើនឡើងនៃជំងឺកូវីដ១៩»។
គិតត្រឹមថ្ងៃទី២១ ខែតុលា កម្ពុជា ចាក់វ៉ាក់សាំងជូនប្រជាពលរដ្ឋអាយុចាប់ពី ៦ឆ្នាំឡើង បានចំនួនជាង ១៣,៦លាននាក់ ឬស្មើនឹង៨៥,២៧% ធៀបនឹងចំនួនប្រជាពលរដ្ឋសរុបប្រមាណ ១៦ លាននាក់៕