ជនសង្ស័យពាក់ព័ន្ធករណីកាប់រានព្រៃ ក្រោយសមត្ថកិច្ចឃាត់ខ្លួនពីថ្ងៃទី ២២ តុលា ។ រូបថត រដ្ឋបាលខេត្តព្រះសីហនុ
ព្រះសីហនុៈជនសង្ស័យចំនួន ៦ នាក់ក្នុងចំណោមមនុស្សចំនួន ៤៣ នាក់ត្រូវបានសមត្ថកិច្ចខេត្តបញ្ជូនដល់សាលាដំបូងខេត្តព្រះសីហនុ ដើម្បីបន្តនីតិវិធីច្បាប់បន្ទាប់ពីឃាត់ខ្លួនពាក់ព័ន្ធនឹងសកម្មភាពកាប់រានដីព្រៃឈើនៅចំណុចបាតខ្ទះស្ថិតនៅភូមិទួលទទឹង២ ឃុំទួលទទឹង ស្រុកព្រៃនប់ ខេត្តព្រះសីហនុ ។
លោក ហ៊ួត វិចិត្រ ព្រះរាជអាជ្ញារង និងជាអ្នកនាំពាក្យសាលាដំបូងខេត្តព្រះសីហនុប្រាប់ភ្នំពេញប៉ុស្តិ៍នៅថ្ងៃទី ២៤ ខែតុលា ឆ្នាំ ២០២១ថា សំណុំរឿងជនសង្ស័យទាំង ៦ នាក់បានបញ្ជូនដល់ស្ថាប័នអយ្យការរួចរាល់ហើយ។ករណីនេះតំណាងអយ្យការកំពុងតែពិនិត្យសំណុំរឿងនោះ និងក្រោយពេលពិនិត្យចប់សព្វគ្រប់ទើបលោកតំណាងអយ្យការសម្រេចថាត្រូវចោទប្រកាន់ពីបទល្មើសអ្វី។
លោកថ្លែងថា៖«តំណាងអយ្យការកំពុងពិនិត្យសំណុំរឿងលើករណីនេះ ការពិនិត្យសំណុំរឿងរបស់តំណាងអយ្យការគឺពិនិត្យលើចម្លើយ ជនសង្ស័យ សាក្សី និងភ័ស្តុតាងដែលប្រមូលបានដោយសមត្ថកិច្ច»។
.jpg)
លោកស្រី ជៀប សុធារី មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តព្រះសីហនុថ្លែងថា ករណីនេះ លោកស្រីមិនទាន់ប្រមូលបានព័ត៌មានគ្រប់ជ្រុងជ្រោយនៅឡើយទេ ដោយរង់ចាំដល់ថ្ងៃចន្ទ លោកស្រីនឹងទៅជួបសួរនាំមន្ត្រីពាក់ព័ន្ធពីករណីនេះ ឱ្យបានច្បាស់លាស់។
លោកស្រីបានបន្តថា ប្រជាពលរដ្ឋទាំង៦នាក់ នេះ រួមជាមួយនឹងប្រជាពលរដ្ឋផ្សេងទៀត ត្រូវបានគេអះអាងថាចូលទៅកាប់រានទន្ទ្រានដីព្រៃ ក្រោមការគ្រប់គ្រោងដោយរដ្ឋបាលខណ្ឌព្រៃឈើខេត្តព្រះសីហនុ ។
យ៉ាងណាក្ដី លោកស្រីថានឹងចុះស៊ើបអង្កេតឱ្យបានស៊ីជម្រៅនិងប្រមូលព័ត៌មានឱ្យបានគ្រប់ជ្រុងជ្រោយពីករណីនេះ ព្រោះកន្លងមក លោកស្រីធ្លាប់ទទួលបានឯកសារពីប្រជាពលរដ្ឋ ដោយអះអាងថា ពួកគាត់បានកាន់កាប់ដីនេះតាំងពីឆ្នាំ ១៩៩៤-១៩៩៦ ប៉ុន្តែក្រោយមកក៏មានការជាប់ព័ន្ធទៅនឹងគម្រប់ដីព្រៃឈើរបស់រដ្ឋបាលខណ្ឌព្រៃឈើខេត្តព្រះសីហនុ ។
លោកស្រីបញ្ជាក់ថា៖«ឥឡូវយើងពិបាកស្វែងរកព័ត៌មានពីអាជ្ញាធរពាក់ព័ន្ធណាស់ យើងបានតែពីប្រជាពលរដ្ឋ ព្រោះយើងចង់ជួយប្រជាពលរដ្ឋ ដូចលោកដឹងស្រាប់ហើយ ប្រជាពលរដ្ឋមិនមានលទ្ធភាពជួលមេធាវីក្នុងតម្លៃ ១០០០ ទៅ ២០០០ ដល្លារក្នុងដំណើរការក្តីនេះទេ »។
ភ្នំពេញប៉ុស្តិ៍ មិនអាចការបកស្រាយពី លោក ឌី សុខុម នាយខណ្ឌរដ្ឋបាលព្រៃឈើ ខេត្តព្រះសីហនុបានទេ នៅថ្ងៃទី ២៤ ខែតុលា នេះ ដោយលោកអះអាងថា កិច្ចការនេះ លោកមិនបានចូលរួមទេ ព្រោះលោកកំពុងជាប់ចត្តាឡីស័ក។
ទោះជាយ៉ាងណា តាមការផ្សព្វផ្សាយរបស់រដ្ឋបាលខេត្តព្រះសីហនុ កាលពីថ្ងៃទី ២២ ខែតុលាឱ្យដឹងថា ក្រុមការងារចម្រុះរបស់រដ្ឋបាលខេត្តព្រះសីហនុកាលពីថ្ងៃទី ២២ ខែតុលាឆ្នាំ ២០២១ បានឃាត់ខ្លួនមនុស្សដែលកំពុងនៅលើទីតាំងដីជាក់ស្តែងបានចំនួន ៤៣ នាក់ក្នុងនោះមានស្រី ៨ នាក់ហើយបានបញ្ជូនជនសង្ស័យចំនួន ៦ នាក់ទៅស្នងការដ្ឋានខេត្តព្រះសីហនុដើម្បីសួរនាំបន្ត។ ដោយឡែកអ្នកពាក់ព័ន្ធចំនួន ៣៧ នាក់ទៀត បន្ទាប់ពីសាកសួរនិងធ្វើកិច្ចសន្យាគឺបានឱ្យមេឃុំ ចៅសង្កាត់របស់ពួកគាត់មកធានាត្រឡប់ទៅលំនៅឋានវិញ។
រដ្ឋបាលខេត្តព្រះសីហនុបន្តថាតាមចម្លើយរបស់ប្រជាពលរដ្ឋទាំងនោះគឺមានទាំងអ្នកក្នុងខេត្តនិងក្រៅខេត្ត។ពួកគេត្រូវបានមេខ្យល់ដែលមានអង្គការចាត់តាំងបោកបញ្ឆោតឱ្យចូលទៅកាប់រានដីព្រៃឈើដើម្បីយកដីចែកគ្នា។
ជាមួយគ្នានេះរដ្ឋបាលខេត្តព្រះសីហនុអំពាវនាវដល់បងប្អូនប្រជាពលរដ្ឋទាំងអស់កុំឱ្យចាញ់បោកមេខ្យល់និងជនខិលខូចដែលញុះញង់ឱ្យទៅកាប់រានទន្ទ្រានដីព្រៃយកធ្វើជាកម្មសិទ្ធិ ឬរំលោភបំពានលើដីកម្មសិទ្ធឯកជននិងការប្រើប្រាស់អំពើហិង្សាប្រឆាំងមន្ត្រីសាធារណៈជាដើម ដែលទង្វើនេះ នឹងធ្វើឱ្យបងប្អូនក្លាយខ្លួនជាជនល្មើស ហើយត្រូវប្រឈមមុខចំពោះផ្លូវច្បាប់ថែមទៀត។
លោក ជួន ណារិន្ទ សងការនគរបាលខេត្តបានប្រាប់ភ្នំពេញប៉ុស្ដិ៍នៅថ្ងៃទី ២៤ តុលាករណីនេះជាភារកិច្ចរបស់រដ្ឋបាលខណ្ឌព្រៃឈើមិនពាក់ព័ន្ធនឹងស្នងការនគរបាលខេត្តព្រះសីហនុឡើយ។រីឯការបញ្ជូនជនសង្ស័យទាំង ៦ នាក់នេះលោកមិនបានដឹងទេដោយសារករណីនេះរដ្ឋបាលខណ្ឌព្រៃឈើខេត្តព្រះសីហនុគ្រាន់តែខ្ចីទីតាំងស្នងការដ្ឋានគរបាលខេត្តព្រះសីហនុដាក់ជនសង្ស័យបណ្ដោះអាសន្នប៉ុណ្ណោះ ៕
