ស្ថានភាពទឹកជំនន់ហូរជន់លិចកំណាត់ផ្លូវជាតិលេខ ៥ នៃខេត្តកំពង់ឆ្នាំង នាថ្ងៃទី ២១ តុលា។ រូបថត FB
ភ្នំពេញៈ បើទោះជាក្នុងខណៈនេះ ទឹកជំនន់ស្ទឹងព្រែកត្នោត នៅមិនទាន់ហក់ឡើងដល់កម្រិតប្រកាសឱ្យប្រុងប្រយ័ត្នក៏ដោយ ប៉ុន្តែជំនន់ទឹកភ្លៀង ហូរធ្លាក់ពីខេត្តកំពង់ស្ពឺ បានធ្វើឱ្យស្ថានភាពទឹកស្ទឹងព្រែកត្នោតជន់ឡើងយ៉ាងឆាប់រហ័សគួរឱ្យកត់សម្គាល់ ដោយមានការជន់លិចនៅផ្នែកខ្លះនៃតំបន់ទំនាបសណ្ដរស្ទឹងព្រែកត្នោត ក្នុងភូមិសាស្ត្រ ខណ្ឌដង្កោ រាជធានីភ្នំពេញ។
លោកឃួង ស្រេង អភិបាលរាជធានីភ្នំពេញ ក្នុងដំណើរចុះត្រួតពិនិត្យស្ថានភាពកម្ពស់ទឹកស្ទឹងព្រែកត្នោត ក្នុងភូមិសាស្ត្រ ខណ្ឌដង្កោ នាព្រឹកថ្ងៃទី ២៤ ខែតុលា និយាយថា ដោយសារមានភ្លៀងធ្លាក់ខ្លាំង២ថ្ងៃជាប់គ្នា ទាំងក្នុងរាជធានីភ្នំពេញ និង បណ្ដាខេត្តមួយចំនួនទៀត នៅជាប់ព្រំប្រទល់នឹងរាជធានីនេះ ពិសេសខេត្តកំពង់ស្ពឺ ដែលជាតំបន់ខ្ពង់រាប បានធ្វើឱ្យទឹកហូរធ្លាក់យ៉ាងគំហុកមកក្នុងដងស្ទឹងព្រែកត្នោត។ ស្ថានភាពនេះ ធ្វើឱ្យទឹកស្ទឹងជន់ឡើងយ៉ាងឆាប់រហ័ស និងគួរឱ្យកត់សម្គាល់។
លោកប្រាប់ឱ្យបងប្អូនប្រជាពលរដ្ឋ ដែលរស់នៅក្នុងតំបន់ទំនាបដីសណ្ដរស្ទឹងព្រែកតោ្នត បង្កើនការប្រុងប្រយ័ត្នខ្ពស់។ ជាពិសេសអ្នកដែលរស់នៅក្នុងភូមិសាស្ត្រសង្កាត់គងនយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួសនៃខណ្ឌដង្កោ។
.jpg)
លោកបញ្ជាក់ថា៖«ថ្វីបើនៅពេលនេះ អាជ្ញាធរយើងបាននិងកំពុងខិតខំបង្ការ និងទប់ស្កាត់ទឹកជំនន់តាមសណ្តរស្ទឹងព្រែកត្នោតនេះ ហើយស្ថានភាពទឹកកំពុងគ្រប់គ្រងបានយ៉ាងល្អប្រសើរក៏ដោយ ក៏សូមឱ្យបងប្អូនដែលរស់នៅតាមសណ្ដរស្ទឹងព្រែកត្នោតនេះ មេត្តាបង្កើនការប្រុងប្រយ័ត្នខ្ពស់ចំពោះគ្រោះទឹកជំនន់ស្ទឹងព្រែកត្នោតនេះ។ ព្រោះវាអាចកើតមានជាយថាហេតុ គ្រប់ពេលក្នុងករណីមេឃនៅតែបន្តភ្លៀងធ្លាក់ខ្លាំងបន្ថែមទៀតនោះ»។
កាលពីថ្ងៃទី ២៣ ខែតុលា ឆ្នាំ ២០២១ អាជ្ញាធរខេត្តកំពង់ស្ពឺ បានសម្រេចបើកទ្វារទឹកនៃសំណង់បង្ហៀរទឹក ស្ទើរគ្រប់កន្លែង ដើម្បីការពារបាក់ស្រុតទំនប់ និងជន់លិចលំនៅឋាន និងដំណាំកសិផលរបស់ប្រជាពលរដ្ឋ បន្ទាប់ពីភ្លៀងធ្លាក់ខ្លាំងច្រើនថ្ងៃជាប់ៗគ្នា។ ពិសេសនៅស្រុកសំរោងទង បរិមាណទឹកភ្លៀងបានធ្លាក់ក្នុងកម្រិត ១០០ ម.ម ក្នុង ១ ថ្ងៃ ធ្វើឱ្យទឹកនៅទំនប់បង្ហៀរទឹកជណ្ដើរកាច់ ជន់ឡើងពេញប្រៀប និងហៀរលើខ្នងទំនប់ ដែលតម្រូវឱ្យមន្ត្រីជំនាញបង្ខំចិត្តបើកទ្វារទឹកធំៗទាំងអស់នៃទំនប់នេះ ដើម្បីការពារបាក់ស្រុត និងជន់លិចផ្ទះនិងផលដំណាំរបស់ប្រជាពលរដ្ឋ ។ នេះបើតាមលោក វ៉ី សំណាង អភិបាលខេត្តកំពង់ស្ពឺ។
លោកសំណាងថ្លែងថា៖«ទំនប់ជណ្តើរកាច់ ជារៀងរាល់ឆ្នាំ គឺមានទឹកតិចតួចប៉ុណ្ណោះ តែនៅឆ្នាំនេះទឹកបានពេញប្រៀប និងលើសពីសមត្ថភាពដែលអាចតម្កល់ទឹកទុក។ យើងមានការសោកស្ដាយ ប៉ុន្តែបើមិនបើកទ្វារទឹក នឹងអាចធ្វើឱ្យទំនប់បាក់ធ្លាយ។ ដូច្នេះសូមពុកម៉ែមាមីងបងប្អូន ដែលរងផលប៉ះពាល់ដោយសារការបើកទ្វារទឹកនៃទំនប់នេះ មេត្តាយោគយល់ដោយក្តីអនុគ្រោះបំផុត ហើយមិនយូរទេទឹកនឹងស្រកវិលទៅរកសភាពដើមវិញក្នុងរយៈពេលខ្លីខាងមុខនេះ» ។
បើតាមលោកអភិបាលខេត្ត នៅពេលនេះ ស្ថានភាពជំនន់ទឹកភ្លៀងនៅតំបន់មួយចំនួនបានស្រកអស់ហើយ។ តំបន់ខ្លះនៅបន្តលិចបន្តិចបន្តួច ក៏ប៉ុន្តែមិនប៉ះពាល់ធ្ងន់ធ្ងរដល់ជីវភាពរស់នៅរបស់ប្រជាពលរដ្ឋនោះទេ។ ចំណែកដំណាំស្រូវក៏មិនប៉ះពាល់ដែរ។
ចំណែកនៅឯខេត្តកំពង់ឆ្នាំង អាជ្ញាធរខេត្តបានអំពាវនាវឱ្យពលរដ្ឋ ដែលរស់នៅតាមតំបន់ទំនាបជាប់មាត់បឹងទន្លេសាប បង្កើនការប្រុងប្រយ័ត្នចំពោះជំនន់ទឹកភ្លៀង និងទឹកដែលហូរធ្លាក់ពីតំបន់ជួរភ្នំឱរ៉ាល់នៃខេត្តកំពង់ស្ពឺ ខណៈស្ថានភាពកម្ពស់ទឹកបឹងទន្លេសាបនៅរសៀលថ្ងៃទី ២៤ ខែតុលា ឆ្នាំ ២០២១ នេះបានងើបឡើងដល់កម្ពស់ ៨,១៥ ម៉ែត្រ បើធៀបកម្ពស់ទឹកនៅថ្ងៃទី ២៣ ខែតុលា ឆ្នាំ ២០២១ កើនឡើង ០,២៥ ម៉ែត្រ។ នេះបើតាមលោកសាន់ យូ អភិបាលរងខេត្តកំពង់ឆ្នាំង។ ចំណែកកម្ពស់ទឹកប្រកាសអាសន្នគឺ ១១ ម៉ែត្រ។
លោកថ្លែងថា៖«នៅពេលនេះស្ថានភាពជំនន់ទឹកភ្លៀងនៅចំណុចស្ពានក្រាំងពន្លៃពុំទាន់ស្រកចុះទៅវិញនៅឡើយទេ ដោយសាតែភ្លៀងនៅតែបន្ត ជាប់នៅតំបន់ជួរភ្នំឱរ៉ាល់ នៃខេត្តកំពង់ស្ពឺ។ ទឹកដែលហូរធា្លក់ពីតំបន់ជួរភ្នំឱរ៉ាល់នោះបានបង្កជន់លិចកំណាត់ផ្លូវជាតិលេខ៥ចាប់ពីចំណុចព្រំប្រទល់ រវាងឃុំស្វាយ ស្រុកសាមគ្គីមានជ័យ និងឃុំលង្វែក ស្រុកកំពង់ត្រឡាច ខេត្តកំពង់ឆ្នាំងផងដែរ»។
លោកថ្លែងថា នៅពេលនេះមន្ទីរសាធារណៈការ និងដឹកជញ្ជូនខេត្តកំពង់ឆ្នាំងបានសហការជាមួយក្រុមហ៊ុនជប៉ុនដែលកំពុងសាងសង់ផ្លូវជាតិលេខ ៥ ធ្វើការចាក់ថ្ម (អងដឺ) លើកំណាត់ផ្លូវជាតិលេខ ៥ បន្ថែមឱ្យផុតពីទឹក នៅចំណុចទឹកកំពុងជន់លិចនិងបានបិទផ្លូវនៅចំណុចនោះដោយបានតម្រូវឱ្យធ្វើដំណើរតាមផ្លូវវាងជំនួសវិញ គឺចាប់ពីចំណុចផ្លូវបំបែកផ្សារត្រាច ឱ្យឡើងទៅលើស្រុកថ្ពង ខេត្តកំពង់ស្ពឺ និងឆ្លងកាត់ស្រុកទឹកផុស ខេត្តកំពង់ឆ្នាំង មុនចូលដល់ផ្លូវជាតិលេខ ៥៕
វីដេអូ៖
