ភ្នំពេញៈ មន្ត្រីជំនាញបានអំពាវនាវឱ្យពលរដ្ឋមានការប្រុងប្រយ័ត្ន កុំយកធុងហ្គាសចាស់ៗ ដែលអស់ហ្គាស យកទៅដុតលេង ព្រោះសម្ពាធនៅក្នុងធុងហ្គាសនោះ ពេលត្រូវកម្តៅខ្លាំង វាអាចផ្ទុះ បង្កគ្រោះថ្នាក់ដល់អាយុជីវិត និងអាចនាំឱ្យមានអគ្គិភ័យកើតឡើង។
ការអំពាវនាវនេះធ្វើឡើងក្រោយពីមានហេតុការណ៍ផ្ទុះធុងហ្គាសបណ្តាលឱ្យបាត់បង់ជីវិតជាងជួសជុលរថយន្តចំនួន ២ នាក់ និងម្នាក់ទៀតរងរបួសធ្ងន់ នៅចំណុចយានដ្ឋានជួសជុលរថយន្តមួយកន្លែង ស្ថិតក្នុងភូមិវត្តពោធិ ឃុំថ្មី ស្រុកទឹកឈូ ខេត្តកំពត កាលថ្ងៃទី ២២ តុលា ដោយសារយកធុងហ្គាសចាស់ៗ ដែលគេចោល មកដុតលេង។
លោក ព្រហ្ម យ៉ន នាយការិយាល័យបង្ការ ពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញ នៅថ្ងៃទី ២៥ ខែតុលា បានអំពាវនាវដល់ប្រជាពលរដ្ឋទាំងអស់ឱ្យមានការប្រុងប្រយ័ត្នខ្ពស់កុំយកធុងហ្គាសចាស់ៗ ទៅដុតលេង ព្រោះធុងហ្គាសចាស់ៗទាំងនោះ នៅមានសម្ពាធដែលនាំឱ្យផ្ទុះពេលត្រូវក្តៅខ្លាំង ជាហេតុនាំឱ្យមានគ្រោះថ្នាក់ដល់អាយុជីវិត និងអាចបង្កជាអគ្គិភ័យផ្សេងៗ។
លោក ព្រហ្ម យ៉ន ថា កំប៉ុងហ្គាសដែលប្រើអស់ហើយ ទោះកំប៉ុងតូច ឬធុងធំក៏ដោយ គេមិនអាចយកទៅដុតលេងបានទេ ព្រោះទឹកហ្គាសមិនអាចសាយភាយចេញមកក្រៅអស់បានទេ ទោះបីហ្គាសគឺជាតិទឹកអាចហូរចេញមកខាងក្រៅប៉ះបរិយាកាសហើយប្រែប្រួលជាចំហាយក៏ដោយ។
លោកថ្លែងថា៖ «កំប៉ុងហ្គាស វាមានសម្ពាធហើយវាមានជាតិឆេះ នៅក្នុងហ្នឹងដោយសារវាបញ្ចេញជាតិឆេះអត់ទាន់អស់ អ៊ីចឹងករណីហ្នឹង គេមិនឱ្យយើងយកទៅដុតទេ តែដុតគឺផ្ទុះហើយ សូម្បីតែកំប៉ុងតូច យើងប្រើអស់ហើយយើងដុតក៏ផ្ទុះដែរ ពេលផ្ទុះហើយអាជាតិហ្គាសនៅក្នុងហ្នឹងជះចេញមកត្រូវ គ្រោះថ្នាក់»។
លោកក៏បានរំឭកដល់ម្ចាស់អាជីវកម្មហ្គាស ឧស្ម័នចំហេះ ប្រេងឥន្ធនៈ ឬសារធាតុផ្សំបង្កជាប្រភពកម្ដៅ ត្រូវប្រុងប្រយ័ត្នខ្ពស់គ្រប់វិនាទី និងត្រៀមវិធីបង្ការប្រកបដោយប្រសិទ្ធភាពខ្ពស់បំផុត ដើម្បីឆ្លើយតបទៅនឹងគ្រោះអគ្គិភ័យ។
លោក ម៉េង សុង ម្ចាស់ហាងពិភពហ្គាសនៅខណ្ឌសែនសុខថ្លែងនៅថ្ងៃទី ២៥ ខែតុលាថា កន្លែងអាជីវកម្មរបស់លោកតែងមានការប្រុងប្រយ័ត្នខ្ពស់ក្នុងការទុកដាក់ថែរក្សា ធ្វើយ៉ាងណាមិនឱ្យមានបញ្ហាកើតឡើង ដែលនាំឱ្យមានគ្រោះថ្នាក់ ឬគ្រោះអគ្គិភ័យកើតឡើងឡើយ។
លោកនិយាយថា ធុងហ្គាស ដែលប្រើអស់ហើយមិនអាចយកទៅដុតលេងបានទេ ព្រោះវានៅមានចំហាយ និងសម្ពាធ ដែលនាំឱ្យផ្ទុះបាន។
លោកបញ្ជាក់ថា៖ «បើយើងយកទៅដុតវាចៀសមិនផុតពីផ្ទុះទេ តែបើដុតហើយ យើងបើកវ៉ានវា អត់អីទេ តែបើបិទវ៉ានទៀត អាសម្ពាធវានៅក្នុងហ្នឹងវាធ្វើឱ្យផ្ទុះតែម្តង សូម្បីធុងសាំងយើង យកទៅផ្សារទៅអីបិទជិតហ្នឹង ក៏អត់កើតដែរ វាផ្ទុះដូចគ្នា»។
លោក ម៉េង សុង ប្រាប់ថា ដើម្បីបង្ការហានិភ័យផ្ទុះហ្គាស ទី១ ត្រូវទុកដាក់ធុងហ្គាស កំប៉ុងហ្គាសកុំឱ្យត្រូវថ្ងៃ ទី២ ពេលដូរហ្គាស ត្រូវត្រួតពិនិត្យមើលទុយោឱ្យបានត្រឹមត្រូវ។
កន្លែងទុកដាក់ហ្គាស ត្រូវមានលម្ហគ្រប់គ្រាន់ មិនត្រូវរក្សាទុកនៅទីកន្លែងបិទហប់ជិតនោះទេ ព្រោះវាអាចបណ្តាលឱ្យមានហានិភ័យផ្សេងៗកើតមានឡើង ដោយសារការហៀរហ្គាសចេញវានឹងប្រតិកម្មជាមួយភ្លើង៕