ព្រះសីហនុៈ អភិបាលខេត្តព្រះសីហនុ លោក គួច ចំរើន មិនឱ្យមានការចតយានយន្តគ្រប់ប្រភេទ និងការដាក់តាំងសម្ភារលក់ដូរនៅលើចំណីផ្លូវសាធារណៈក្នុងក្រុងព្រះសីហនុលើកលែងតែការបើកបរឆ្លងកាត់ចំណីផ្លូវចូលទៅក្នុងផ្ទះ ឬដីកម្មសិទ្ធិ ឬអគារផ្សេងៗ ដែលមានចំណតរបស់ខ្លួនតែប៉ុណ្ណោះ។
លោក គួច ចំរើន លើកឡើងថា ដើម្បីប្រែក្លាយខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង រាជរដ្ឋាភិបាលបានរៀបចំស្ថាបនាហេដ្ឋារចនាសម្ព័ន្ធផ្លូវក្នុងក្រុងចំនួន ៣៤ ខ្សែ អនុវត្តគម្រោងដោយគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជាគឺបានស្ថាបនារួចរាល់ ជាស្ថាពរ ១០០ ភាគរយជាមួយគ្នានេះរដ្ឋបាលខេត្តក៏បានរៀបចំគម្រោងស្ថាបនាផ្លូវ ក្នុងខេត្តមួយចំនួនទៀតដែលប្រើប្រាស់កញ្ចប់ថវិការបស់រដ្ឋបាលខេត្ត។
ការរៀបចំហេដ្ឋារចនាសម្ព័ន្ធផ្លូវគឺអនុវត្តស្របទៅតាមលក្ខខណ្ឌបច្ចេកទេស និងស្តង់ដា ដោយបានរៀបចំដាក់គំនូសចរាចរណ៍ បង្គោលភ្លើង ស្លាកសញ្ញាចរាចរណ៍ បង្គោលភ្លើងបំភ្លឺផ្លូវ គំនូសសញ្ញាចរាចរណ៍ ដាំដើមឈើ បំពាក់កាមេរ៉ាសុវត្ថិភាព និងបានរៀបក្រាលថ្មក្រានីត ឬការ៉ូឡានៅលើចំណីផ្លូវ សម្រាប់អ្នកថ្មើរជើង ជាពិសេសមានគន្លងសម្រាប់ជនពិកាធ្វើដំណើរ។
លោក គួច ចំរើនបញ្ជាក់ថា៖ «ក្នុងរយៈពេលកន្លងមកនេះ យើងបានសង្កេតឃើញថា មានប្រជាពលរដ្ឋ ម្ចាស់អាជីវកម្ម សណ្ឋាគារ កាស៊ីណូ ធនាគារ ផ្សារទំនើប ភោជនីយដ្ឋាន បានយកចំណីផ្លូវធ្វើជាកន្លែងដាក់តាំង សម្ភារលក់ដូរ ប្រកបអាជីវកម្ម និងយកយានយន្តមកចតលើកម្រាលថ្មក្រានីត ដែលជាចំណីផ្លូវ សម្រាប់អ្នកថ្មើរជើងដើរ។ ស្ថានភាពនេះបានធ្វើឱ្យដងផ្លូវក្នុងក្រុងព្រះសីហនុបាត់បង់នូវសណ្តាប់ធ្នាប់ សោភណភាព និងធ្វើឱ្យប៉ះពាល់ដល់អ្នកថ្មើរជើងគ្មានចំណីផ្លូវសម្រាប់ដើរ»។
ក្នុងន័យនេះ ដើម្បីរក្សាឱ្យមានសណ្តាប់ធ្នាប់ សោភណភាព តាមដងផ្លូវក្នុងក្រុងព្រះសីហនុសម្រាប់ជាប្រយោជន៍សាធារណៈ លោក គួច ចំរើន បានសម្រេចមិនអនុញ្ញាតឱ្យយានយន្តគ្រប់ប្រភេទឈប់ ឬចត ឬបើកបរនៅលើចំណីផ្លូវ (កម្រាលថ្មក្រានីត ឬកម្រាលការ៉ូឡា) លើកលែងចំពោះការបើកបរឆ្លងកាត់ចំណីផ្លូវ (កម្រាលថ្មក្រានីត ឬកម្រាលការ៉ូឡា) ចូលទៅក្នុងផ្ទះ ឬដីកម្មសិទ្ធិ ដែលមានចំណតរបស់ខ្លួន។
លោកបញ្ជាក់ថា៖ «ម្ចាស់អាជីវកម្ម ឬសណ្ឋាគារ កាស៊ីណូ ផ្ទះសំណាក់ ធនាគារ ផ្សារទំនើប ភោជនីយដ្ឋាន អាហារដ្ឋានត្រូវរៀបចំចំណតយានយន្តឱ្យបានត្រឹមត្រូវសម្រាប់អតិថិជនរបស់ខ្លួនចៀសវាងការយកចំណីផ្លូវ ឬទ្រូងផ្លូវជាចំណតយានយន្ត»។
មួយវិញទៀត រដ្ឋបាលខេត្តព្រះសីហនុក៏មិនអនុញ្ញាតឱ្យអាជីវករ ម្ចាស់ភោជនីយដ្ឋាន អាហារដ្ឋាន យកចំណីផ្លូវសាធារណៈធ្វើអាជីវកម្មដូចជាការដាក់អាហារការដាក់តាំងលក់ដូរ និងការប្រើប្រាស់ចំណីផ្លូវក្នុងន័យ បម្រើផលប្រយោជន៍បុគ្គល។
លោក គួច ចំរើន ថា៖ «ចំណីផ្លូវប្រើប្រាស់សម្រាប់ការដើរថ្មើរជើងតែប៉ុណ្ណោះ និងជិះកង់ប្រសិនបើមានគំនូសផ្លូវសម្រាប់អ្នកជិះកង់។ ចំពោះការបែកបាក់កម្រាលថ្មក្រានីត ឬកម្រាលការ៉ូឡាជាការទទួលខុសត្រូវរបស់ម្ចាស់ផ្ទះ ឬបុគ្គលណាដែលធ្វើឱ្យបែកបាក់ ដោយទង្វើណាមួយ»។
ចំពោះបងប្អូនប្រជាពលរដ្ឋ ម្ចាស់អាជីវកម្មសណ្ឋាគារ កាស៊ីណូ ផ្ទះសំណាក់ ធនាគារ ផ្សារទំនើប ភោជនីយដ្ឋាន អាហារដ្ឋានដែលមានចំណតនៅក្នុងដីកម្មសិទ្ធិរបស់ខ្លួន ហើយចង់ស្នើសុំធ្វើច្រកចេញ-ចូលត្រូវដាក់លិខិតស្នើសុំមករដ្ឋបាលខេត្ត ក្នុងករណីមានការយល់ព្រមពីរដ្ឋបាលខេត្ត នោះការចំណាយសាងសង់ផ្លូវចេញ-ចូលជាបន្ទុករបស់ម្ចាស់សំណើ។ នេះបើតាមលោក គួច ចំរើន។
លោកព្រមានថា សមត្ថកិច្ចជំនាញនឹងអនុវត្តវិធានការរដ្ឋបាល និងច្បាប់ស្តីពីចរាចរណ៍ផ្លូវគោកចំពោះម្ចាស់អាជីវកម្មសណ្ឋាគារ កាស៊ីណូ ផ្ទះសំណាក់ ធនាគារ ផ្សារទំនើប ភោជនីយដ្ឋាន អាហារដ្ឋាន ដែលមិនអនុវត្តតាមការណែនាំនេះ៕