ភ្នំពេញៈ នគរបាលព្រហ្មទណ្ឌរាជធានីភ្នំពេញ នៅថ្ងៃទី ២៨ តុលា កំពុងតាមចាប់ស្ត្រីដៃដល់ម្នាក់ ដែលបានប្រើហិង្សាវាយតប់ស្ត្រីម្នាក់ នៅក្នុងជម្លោះរឿងជំពាក់លុយ ដែលក្រោយមក គឺនៅថ្ងៃទី ២៦ តុលា ស្រ្តីរងគ្រោះបានស្លាប់ដោយសារគាំងបេះដូង នៅសង្កាត់ព្រែកលៀប ខណ្ឌជ្រោយចង្វារ។
លោក សាន សុខសីហា អ្នកនាំពាក្យស្នងការដ្ឋាន នគរបាលរាជធានីភ្នំពេញ ប្រាប់ ភ្នំពេញ ប៉ុស្តិ៍ នៅថ្ងៃទី ២៨ តុលាថា ករណីស្ត្រីសង្ស័យដែលពាក់ព័ន្ធការស្លាប់របស់ស្ត្រីរងគ្រោះ ឈ្មោះ អៀង អេង អាយុ ៤៣ ឆ្នាំ ត្រូវកម្លាំងជំនាញកំពុងតែធ្វើការស្រាវជ្រាវតាមចាប់ខ្លួនជនបង្កហើយ។
លោកថ្លែងថា៖ «សមត្ថកិច្ចជំនាញបានធ្វើកោសល្យវិច័យលើសាកសព។ ជាលទ្ធផលបញ្ជាក់ថា ស្ត្រីរងគ្រោះស្លាប់ដោយគាំងបេះដូង ក្រោយពីមានអំពើហិង្សាហ្នឹង»។
លោកសង្កត់ធ្ងន់ថា ចាប់តាំងពីថ្ងៃកើតហេតុថ្ងៃទី ២៦ តុលាមក គឺទាំងកម្លាំងនគរបាលប៉ុស្តិ៍ នគរបាលខណ្ឌជ្រោយចង្វារ និងកម្លាំងជំនាញព្រហ្មទណ្ឌនៃស្នងការដ្ឋាននគរបាលរាជធានីភ្នំពេញ កំពុងសហការគ្នាដើម្បីតាមចាប់ខ្លួនស្ត្រីបង្ក។
បើតាមលោក សុខសីហា កាលពីថ្ងៃទី ២៦ តុលា ស្ត្រីរងគ្រោះ អៀង អេង ស្នាក់នៅបន្ទប់ជួលជាន់ទី៣ នៅចំណុចទីតាំងកើតហេតុខាងលើ បានទាស់ពាក្យសម្តីគ្នា និងវាយទាត់ធាក់គ្នា ជាមួយស្ត្រីសង្ស័យ។
បន្ទាប់ពីត្រូវបានអ្នកជិតខាងជួយឃាត់មកស្ត្រីរងគ្រោះ បានប្រាប់សមាជិកក្នុងគ្រួសារថា គាត់មានអារម្មណ៍ឈឺក្បាល និងបានចូលទៅសម្រាក។
លុះរហូតដល់ម៉ោងប្រហែល ៥ ល្ងាច ថ្ងៃខែដដែល ស្រាប់តែក្រុមគ្រួសារចូលទៅដាស់ ទើបដឹងថា ស្ត្រីរងគ្រោះដាច់ខ្យល់ស្លាប់បាត់ទៅហើយ។
លោកបន្តថា ក្រោយពីស្ត្រីរងគ្រោះស្លាប់ សមត្ថកិច្ចជំនាញផ្នែកជំនាញរួមគ្រូពេទ្យ បានធ្វើកោសល្យវិច័យទៅឃើញថា ស្ត្រីរងគ្រោះស្លាប់ដោយសារគាំងបេះដូង។
ក្រោយពីទទួលរងការវាយដំភ្លាមៗនោះ ក្រុមគ្រួសារស្ត្រីរងគ្រោះ បានដាក់ពាក្យបណ្តឹងទៅនគរបាលខណ្ឌជ្រោយចង្វារដើម្បីសុំការអន្តរាគមន៍ចាប់ស្ត្រីសង្ស័យ។
បើតាមមន្ត្រីនគរបាលខណ្ឌជ្រោយចង្វារមួយរូប ស្នើមិនឱ្យបញ្ចេញឈ្មោះ បានឱ្យដឹងនៅរសៀលថ្ងៃទី ២៨ តុលាថា ស្ត្រីរងគ្រោះឈ្មោះ អៀង អេង ស្នាក់នៅបន្ទប់ជួលជាន់ទី៣ ក្នុងបុរីរុងរឿងស្ថិតនៅសង្កាត់ព្រែកលៀប បានខ្ចីលុយស្ត្រីសង្ស័យ។ មុនពេលកើតហេតុ ថ្ងៃទី ២៦ តុលា ស្ត្រីសង្ស័យបានទៅបន្ទប់ជួលរបស់ស្ត្រីរងគ្រោះ និងទាស់ពាក្យសម្តីគ្នា ធ្វើឱ្យស្ត្រីសង្ស័យខឹង ហើយក៏បានទាត់ធាក់ត្រូវដើមទ្រូងជាច្រើងជើង ហើយក៏ដើរចេញបាត់ពីកន្លែងកើតហេតុ។
មន្ត្រីនគរបាលបន្តថា ក្រោយបង្កហេតុ និងបន្ទាប់ពីមានការជួយឃាត់ពីអ្នកស្នាក់នៅបន្ទប់ជាប់គ្នាមក ស្ត្រីរងគ្រោះបានប្រាប់សាច់ញាតិថា មិនស្រួលខ្លួនហើយចូលដេក។ រហូតដល់ពេលល្ងាចទើបសាច់ញាតិដឹងថា ស្ត្រីរងគ្រោះស្លាប់៕
វីដេអូ៖