ភ្នំពេញៈរដ្ឋបាលរាជធានីភ្នំពេញ បានឱ្យដឹងពីការត្រៀមស្បៀង សម្រាប់ជួយប្រជាពលរដ្ឋរងគ្រោះ ខណៈដែលសង្កាត់ចំនួន ១០ នៅក្នុងខណ្ឌដង្កោទទួលរងការលិចលង់ ដោយជំនន់ទឹកស្ទឹងព្រែកត្នោត ក្នុងនោះប្រជាពលរដ្ឋប្រមាណជាង ៣ ០០០ គ្រួសារ បានទទួលរងផលប៉ះពាល់។
លោក ឃួង ស្រេង អភិបាលរាជធានីភ្នំពេញ បានថ្លែងនៅក្នុងពេលចុះពិនិត្យនិងដឹកនាំកម្លាំងដើម្បីត្រៀមសង្គ្រោះប្រជាពលរដ្ឋចេញពីតំបន់ទឹកលិច នៅខណ្ឌដង្កោ នាយប់ថ្ងៃទី ២៧ តុលាថា៖ «គ្រួសារជាច្រើនបានរងផលប៉ះពាល់ពីទឹកជំនន់នេះ ហើយយើងនឹងចាត់វិធានការពិនិត្យថា តើការរងផលប៉ះពាល់នេះ មានប្រជាពលរដ្ឋណាខ្លះ ដែលមានការខ្វះខាត យើងនឹងធ្វើការផ្តល់ជំនួយដែលជាការឧបត្ថម្ភរបស់សម្តេចនាយករដ្ឋមន្ត្រី ដើម្បីឱ្យពួកគាត់ បន្តការរស់នៅមានជីវិត»។
ជាមួយគ្នានោះ លោកបានជំរុញ ឱ្យអាជ្ញាធរគ្រប់លំដាប់ថ្នាក់ ត្រូវមើលការខុសត្រូវប្រជាពលរដ្ឋ ដោយមិនត្រូវទុកឱ្យអ្នកណាម្នាក់ស្លាប់ ដោយអត់បាយនោះទេ ក្នុងរជ្ជកាលដែលដឹកនាំដោយលោកនាយករដ្ឋមន្ត្រីហ៊ុន សែន។
លោកបញញ្ជាក់ថា៖ «សម្រាប់រាជធានីភ្នំពេញ យើងត្រៀមអង្ករចំនួន ១ ពាន់តោនជារៀងរាល់ពេលដើម្បីត្រៀមលក្ខណៈក្នុងករណីមានអ្វីមួយកើតឡើងជាយកថាហេតុ ដើម្បីជួយសង្គ្រោះប្រជាពលរដ្ឋដែលនេះជាកិច្ចការរបស់អាជ្ញាធរយើងបាននិងកំពុងធ្វើ»។
នៅយប់ថ្ងៃទី ២៧ តុលា អាជ្ញាធរ កម្លាំងសមត្ថកិច្ច និងកម្លាំងកងទ័ព បានត្រៀមរួចរាល់ទាំងកម្លាំង និងឧបករណ៍សម្ភារ ដើម្បីជួយសង្គ្រោះប្រជាពលរដ្ឋ នៅពេលដែលពួកគាត់ជួបហានិភ័យដោយទឹកជំនន់ បើទោះបីឆ្នាំនេះស្ថានភាពទឹកលិចលង់នៅក្នុងមូលដ្ឋានខណ្ឌដង្កោ មានទំហំតូចជាងឆ្នាំកន្លងទៅក៏ដោយ។
យោងតាមមន្ទីរសាធារណការនិងដឹកជញ្ជូនរាជធានីភ្នំពេញបានឱ្យដឹងថា នៅវេលាម៉ោង ១២:៤០ ថ្ងៃត្រង់ នាថ្ងៃទី ២៨ ខែតុលា ស្ថានភាពទឹកជំនន់សណ្តរស្ទឹងព្រែកត្នោត ត្រូវបានគ្រប់គ្រងបានទាំងស្រុង ដោយទឹកស្ទឹងបានស្រកពី ០.៥ ម ទៅ ០.៧ ម។
មន្ទីរសាធារណការបានបញ្ជាក់ថា ដោយការខិតខំប្រឹងប្រែងទាំងថ្ងៃទាំងយប់រយៈពេល ១៨ ថ្ងៃមកនេះ ដើម្បីទប់ទំនប់ការពារទឹកជំនន់ និងជួសជុលទំនប់បាក់ធ្លាយ របស់រដ្ឋបាលរាជធានីភ្នំពេញ និងក្រសួងធនធានទឹក និងឧតុនិយម ធ្វើឱ្យពេលនេះ ស្ថានភាពទឹកជំនន់នៅភូមិសាស្ត្រខណ្ឌដង្កោ ត្រូវបានគ្រប់គ្រងបានហើយ។
មន្ទីរសាធារណការ និងដឹកជញ្ជូនរាជធានីភ្នំពេញបានបន្ថែមថា ៖ «ទឹកជំនន់ពេលនេះ នឹងមិនបន្ថែមការពង្រីកវិសាលភាពលិចលង់ទៀតឡើយ ហើយទីតាំងដែលបានលិច បាននិងកំពុងស្រក ជាបណ្តើរៗ ឈានទៅដំណើរការជីវភាពរស់នៅធម្មតាឡើងវិញ នាពេលប៉ុន្មានថ្ងៃខាងមុខ»។
ជាមួយគ្នានេះដែរ បើតាមការលើកឡើងរបស់ឧត្តមនាវាឯក វ៉ាន់ ប៊ុនលៀង មេបញ្ជាការរងនាយសេវាធិការនៃបញ្ជាការដ្ឋានកងទ័ពជើងទឹក បានឱ្យដឹងថា លោកបានត្រៀមកម្លាំងដើម្បីសង្គ្រោះប្រជាពលរដ្ឋលិចលង់មិនថាតែនៅក្នុងតំបន់រាជធានីភ្នំពេញទេ ប៉ុន្តែតាមបណ្តាខេត្តនិងគោលដៅដែលបានកំណត់។
លោកមានប្រសាសន៍ថា៖ «កម្លាំងរបស់ខ្ញុំបានត្រៀមជួយសង្គ្រោះប្រជាពលរដ្ឋនៅក្នុងខណ្ឌដង្កោតាំងពីថ្ងៃទី ២៥ តុលា មកម្ល៉េះ ដែលយើងត្រៀមដូចទៅនឹងឆ្នាំមុនដែរដែលយើងបានប្រុងប្រៀមរៀបចំជាមុនរួចជាស្រេច»។
ចំណែកក្រុមកងសង្គ្រោះលេខ ៩១១ នៃបញ្ជាការដ្ឋានទ័ពពិសេសកងទ័ពជើងគោក បានបន្តសហការជាមួយនឹងអាជ្ញាធរ ដើម្បីសង្គ្រោះប្រជាពលរដ្ឋក្នុងខណ្ឌកំបូលដែលទទួលរងផលប៉ះពាល់ដោយទឹកជំនន់ផងដែរ។
លោក ស៊ុំ សំណាង មេបញ្ជាការរង នាយសេនាធិការ បញ្ជាការដ្ឋានទ័ពពិសេស បានឱ្យដឹងថា កម្លាំងបញ្ជាការដ្ឋានទ័ពពិសេស បានប្រើប្រាស់កម្លាំងអន្តរាគមន៍សង្គ្រោះ គ្រោះមហន្តរាយលេខ ៩១១ នៅប្រចាំការសហការជាមួយអាជ្ញាធរ ក្នុងការជួយសង្គ្រោះ និងចម្លងប្រជាពលរដ្ឋ ២៤ ម៉ោងលើ ២៤ ម៉ោង ក្នុងភូមិសាស្ត្រ ភូមិដូនកុក សង្កាត់បឹងធំ ខណ្ឌកំបូល ដើម្បីជួយដឹកជញ្ជូនទ្រព្យសម្បតិ្ត និងជម្លៀសមនុស្សមកកាន់ទីទួលសុវត្ថិភាព។
លោកបញ្ជាក់ថា៖ «ចាប់តាំងពីថ្ងៃទី ២៥ មកដល់ថ្ងៃទី ២៧ តុលា មានប្រជាជនប្រមាណ ១ ០៦៨ នាក់ ត្រូវបានក្រុមសង្គ្រោះជួយដឹកជញ្ជូនពីតំបន់លិចលង់ទៅកាន់ទីទួលសុវត្ថិភាព»។
លោក ស៊ុំ សំណាង បានបន្ថែមថា បច្ចុប្បន្នកងកម្លាំងសង្គ្រោះគ្រោះមហន្តរាយលេខ ៩១១ បានបន្តយកចិត្តទុកដាក់ខ្ពស់ ចំពោះសុវត្ថិភាពប្រជាពលរដ្ឋនៅក្នុងតំបន់នោះ ដោយកងកម្លាំងរបស់លោកបានធ្វើការចល័តទូកជាបន្តបន្ទាប់ ដើម្បីជួយដឹកជញ្ជូនពួកគាត់ពីតំបន់លិចលង់មកកាន់ទីទួលសុវត្ថិភាព និងធ្វើការអន្តរាគមន៍ភ្លាមៗបើសិនជាមានការស្នើសុំជំនួយពីសំណាក់អាជ្ញាធរមូលដ្ឋាន។
យោងតាមរបាយការណ៍កងទ័ពជើងគោកនៃកងយោធពលខេមរភូមិន្ទ បានបញ្ជាក់ផងដែរថា ទឹកជំនន់ស្ទឹងព្រែកត្នោតបានបង្កការជន់លិចផ្ទះ ដីកសិកម្ម សាលារៀនផ្លូវថ្នល់ក្នុងភូមិសាស្ត្រខណ្ឌកំបូល គឺទឹកហូរធ្លាក់យ៉ាងគំហុកពីខេត្តកំពង់ស្ពឺ ចាប់ផ្តើមជន់លិចរយៈពេល ២ ទៅ ៣ ថ្ងៃចុងក្រោយនេះ យ៉ាងហោចណាស់មានផ្ទះប្រជាពលរដ្ឋ រាប់ពាន់ខ្នងត្រូវបានលិចលង់ និងសង្កាត់ចំនួន ២ ទទួលរងផលប៉ះពាល់ធ្ងន់ធ្ងរ ដោយក្នុងនោះក៏មានសាលារៀន, ផ្លូវ និងផ្ទៃដីកសិកម្មជាច្រើនហិកតាត្រូវទឹកជន់លិច៕
វីដេអូ៖