រថយន្តដែលជួបគ្រោះថ្នាក់ចរាចរណ៍បណ្តាលឱ្យស្លាប់៥នាក់ របួសធ្ងន់១នាក់ នៅភូមិ-ឃុំមោង ស្រុកមោងឫស្សី ខេត្តបាត់ដំបង នៅព្រឹកថ្ងៃទី២៨តុលា។ រូបថត នគរបាល
បាត់ដំបងៈ យ៉ាងហោចណាស់បុរស ៥ នាក់ ត្រូវបានកៀបស្លាប់ក្នុងរថយន្ត និងបុរសម្នាក់ទៀត រងរបួសធ្ងន់ក្នុងគ្រោះថ្នាក់ចរាចរណ៍រថយន្តបុកគ្នាស្ថិតនៅភូមិ-ឃុំមោង ស្រុកមោងឫស្សី ខេត្តបាត់ដំបង នៅព្រឹកថ្ងៃទី ២៨ តុលា។
លោក ចាន់ សុធី នាយការិយាល័យចរាចរណ៍ នៃស្នងការដ្ឋាននគរបាលខេត្តបាត់ដំបង ឱ្យ ភ្នំពេញ ប៉ុស្តិ៍ ដឹងនៅរសៀលថ្ងៃទី ២៨ តុលាថា ជនរងគ្រោះស្លាប់ទី១- ឈ្មោះ ឡុង ហុង ភេទប្រុស អាយុ ៤៧ ឆ្នាំ (អ្នកបើកបរ) រស់នៅភូមិកំពង់ពិល ឃុំវត្តតាមិម ស្រុកសង្កែខេត្តបាត់ដំបង ទី២- ឈ្មោះ វ៉ាង សំបូរ ភេទប្រុស អាយុ ៥៧ ឆ្នាំ រស់នៅភូមិអូរស្រឡៅ ឃុំវត្តតាមិម ស្រុកសង្កែ ទី៣- ឈ្មោះ ម៉ក់ ភេទប្រុស អាយុ ១៩ ឆ្នាំ រស់នៅភូមិអូរស្រឡៅ ឃុំវត្តតាមិម ស្រុកសង្កែ ទី៤- ឈ្មោះ ចាន់ សុវឌ្ឍនៈ ភេទប្រុស អាយុ ១៥ ឆ្នាំរស់នៅ ភូមិព្រែកចាន់ ឃុំអូរបីជាន់ ស្រុកអូរជ្រៅ និងទី៥-ឈ្មោះ ឈុំ វិឆ័យ ភេទប្រុស អាយុ ១៥ ឆ្នាំ រស់នៅ ភូមិព្រែកចាន់ ឃុំអូរបីជាន់ ស្រុកអូរជ្រៅខេត្តបន្ទាយមានជ័យ។
ចំណែកម្នាក់ទៀតរងរបួសធ្ងន់ឈ្មោះ ឈួយ បញ្ញា ភេទប្រុស អាយុ ២២ ឆ្នាំ រស់នៅភូមិអូរស្រឡៅ ឃុំវត្តតាមិម ស្រុកសង្កែ។
.jpg)
ក្រោយកើតហេតុភ្លាមៗ សមត្ថកិច្ចបានបញ្ជូនជនរងគ្រោះដែលរងរបួស ទៅមន្ទីរពេទ្យបង្អែកស្រុកមោងឫស្សីដើម្បីសង្គ្រោះជីវិត។
លោក ចាន់ សុធី ថ្លែងថា៖«ករណីនេះយើងកំពុងតែស្វែងរកជនបង្ក ព្រោះក្រោយពីមានបញ្ហាគាត់បានរត់ចេញពីកន្លែងកើតហេតុបាត់ហើយហ្នឹង»។
លោក សុធី បានប្រាប់ដោយយោងលើរបាយការណ៍ របស់នគរបាលមូលដ្ឋានថា ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីថ្ងៃទី ២៨ តុលា នៅវេលាម៉ោង ៥ និង ១៥ នាទីព្រឹក ស្ថិតនៅតាមបណ្តោយផ្លូវជាតិលេខ ៥ ក្នុងភូមិ-ឃុំមោង ស្រុកមោងឫស្សី ខេត្តបាត់ដំបង ។
លោកបន្តថា គ្រោះថ្នាក់ចរាចរណ៍នេះ បានកើតឡេង រវាងរថយន្ត ១ គ្រឿង ម៉ាកហ៊ីណូ ធុនធំប្រភេទដឹកទំនិញ ពាក់ស្លាកលេខកំពង់ឆ្នាំង 3A-1566 (ពេលកើតហេតុដឹកថ្លៃស្វាយ) និងរថយន្ត១គ្រឿងទៀត ម៉ាកនីសាន់ ប្រភេទដឹកទំនិញពាក់ស្លាកលេខបាត់ដំបង 2B-2211 ដោយរថយន្តទាំង ២ គ្រឿង បើកបរក្នុងទិសដៅបញ្ច្រាសទិសគ្នា។
លោកបន្តទៀតថា ភ្លាមៗក្រោយកើតហេតុ សមត្ថកិច្ចជំនាញរបស់លោក បានធ្វើកោសល្យវិច័យពិនិត្យឃើញថា រថយន្តម៉ាកហ៊ីណូបានបើកពីទិសកើតទៅលិច ហើយបានចូលចំណែកផ្លូវស្តាំរបស់រថយន្តម៉ាកនីសាន់ និងបុកពេញទំហឹងបណ្តាលឱ្យអ្នកជិះក្នុងកាបិនត្រូវកៀបស្លាប់ទាំង ៥ នាក់ និងរបួសធ្ងន់ម្នាក់។
លោក ចាន់ សុធី បញ្ជាក់ថា ចំពោះសាកសពគឺសមត្ថកិច្ចរបស់លោកបានប្រគល់ជូនក្រុមគ្រួសាររៀងៗខ្លួន ដើម្បីយកទៅធ្វើបុណ្យតាមប្រពៃណី៕
